Dahlau daih, yau rilo puk palei bhum glaong karei, di xã Pá Hu bhian hu bruk likhah gam ralo drah dalam bhap bini Mông, ba tal dom kadha oh siam. Sang saai Sùng A Sử daok di palei km 16 lac yau nan. Hadei di likhah, saai ndih tapui, anek njauk biến dạng di mbaok njauk nao tal HN blac draih, min mbaok di adei jeng oh siam hu. Atau yau baoh sang saai Mùa A Hờ jeng daok di palei km 16, xã Pá Hu. Thun 2007, saai Hờ tok saai Hờ Thị Chử. Dua urang gam ralo drah, min kayua sahneng kuhria oh ka tal, nan ye oh thau lac ngak yau nan nyu suan hukum likhah caga saong baoh sang. Saai Hờ lac:

 “Dahlau daih drei tok diuk gam ralo drah min oh thau, hadei ini tok bloh meng thau lac suan hukum. Dua diuk pasang tok gauk livik ye oh ka hu anek. Urak ini oh hu jalan halei karei”.

Ngak yau habar piah oh daok bruk likhah gam ralo drah dalam bhap bini bhum glaong lac bruk bo pakat ủy đảng saong karja palei bhian sahneng duah. Hadei di rilo mbang nyaom, urang dang akaok xã Pá Hu tacei pato dom puk, palei ba asal  kadha di bruk oh likhah caga gam ralo drah tame adat puk, palei, taphia di nan tui iek catang bruk peih ngak. Ong Giàng A Lồng, akaok UB bhap bini xã Pá Hu brei thau: 

“Xã jeng hu tacei pato khang, brei bruk ka dom urang dalam mban tacei pato trun dom palei tacei pato dom akaok palei họp peih ngak adat puk,  palei piah bhap bini ngak tui, dalam tuk peih ngak hu bhap bini biak pachreih tui”.

Taphia dom  adat puk, palei, Pá Hu jeng hu salih barau bruk pathau khan, meng bruk pathau khan di dom mbang họp tapa pathau khan tapak tui jalan yau Yuan lac “mưa dầm thấp lâu”. Oh lac nao tal sang, urang jakar xã saong puk palei daok tui mikva tuk tabiak puh atau tuk nao ngak hamu, pathau khan dalam tuk nao mbang likhah dalam dom palei. Dom taha palei, akaok palei jeng ba pren tame saong karja palei dalam bruk ngak ini, yau taha palei Vàng A Giao daok di palei Pá Hu atau taha palei Sùng Tráng Thào daok di palei Km 16...Kapul ini daok jak ba anek kamuan dalam baoh sang ngak tui dahlau piah urang ngak tui.

Saai Giàng A Sùng, urang jakar ilamu - xã hội xã Pá Hu brei thau: asal kadha pathau khan hu ndom tapak tal dom kanjah jhak di bruk likhah caga gam ralo drah piah mikva caik hatai meng tuk camereip hu pang:

“Kol dahlak bhian nao pathau khan, ralo meng lac pathau khan meng cambuai, pathau khan piah bhap bini thau lac likhah gam ralo drah hadei di ini ba tal dom kanjah jhak lac hu anek oh siam, atau lac dị tật. Drei pathau khan tal urang taha piah urang pathau khan veik ka anek bhik”.

Kuhria meng urang likhah gam ralo drah puac abih di thun 2007, tal harei ini Pá Hu oh hu urang halei tra. Jalan ngak di Pá Hu njauk caik ka dom labik bhum glaong karei bac megru saong ngak tui./.