HUM TANEH KAN KANDAH NINH THUAN MBEIK DREI TAME XUAN

*********** 

Ndom tal Ninh Thuận, urang bhian sahaneng tal bhum taneh bak pandiak, rilo angin saong dom mbuan cuah praong tok hu phun daruai meng diuk hu. Min, dalam langik tasik kan kandah yau nan, bhapbini tinh Ninh Thuan jeng ye bhapbini Cam daok di dom bhum biak kan kandah, bhum thu lagu kham merat yam tagok meng pren yava di drei, ngak jeng bhum hijao drei sir, ba angin xuan mai. Dalam tuk tet mai, xuan tal, da a mikva saong grauk yut gam saong Thúy Linh, urang vak di rayo sap ndom VN daok di ban raya HCM nao ravang bhum bhapbini Cam tinh Ninh Thuan piah mboh bruk salih bahrau di bhum taneh thu lagu, rilo pandiak saong angin ini.

Mai ravang palei Cam La – U, huyện Thuận Nam, tỉnh Ninh Thuận di tuk xuân ini meng mboh hu bruk salih bahrau pak ini. Meyah 10 thun dahlau thiah, palei La – U biak joa lange kayua bhapbini rilo meng ba gauk tagok ceik tame glai piah ngak mbang; cơ sở vật chất oh hu hagait ye urak ini hu salih bahrau biak rilo. Menhek, jalan, sang bac, balai y te, ia pandar di palei hu padang ngak siam, jalan nao mai dalam palei hu peih praong, hu tuh bê tông; sang danaok di bhapbini hu dak padang barau taphia gauk. Dalam yaok baok sang, tivi, tủ la ar, mô tô… hu dom sang blei ginup. Langiu dom janih phun pala, yaok ratuh hecta glai, labaih 2.000  tapol pabe, 600 tapol limo daok ba mai ka mikva jien mek tame tani tanat. Ông Thiên Sanh Tuấn, Phó akaok uy mban bhapbini  xã Phước Nam khan brei kol dahlak thau, urak ini, raidiuk di mikva Cam palei La – u karei jang duk saong dahlau thiah. Mikva oh lac thau patagok kinh te sang bo daok sangka tal bruk bac da-a di anek bhik, rik daong saong puk palei dak padang bruk bac megru…Ông Thiên Sanh Tuấn brei thau : Tal tukvak ini ia mbaok palei ia La – U yaom lac daok dom kan kandah, min meyah pasang iak saong dahlau thiah mboh salih jang. Meng di nan, dom adei hu nao bac, urak ini daok diuk rai saong ngak bruk di dom tinh ye : Bình Dương, Đồng Nai saong ba mai lợi nhuận, jien mek tame ka sang. Yau nan ye, hu blei dom pandap caik dalam sang di dom harei tet ”

Dreih yau palei La – U, dahlau deih, raidiuk bhum bhapbini Cam palei Cuah Patih, xã Phước Hải, huyện Ninh Phước jeng biak kan kandah, glaih glan kayua taneh pala drak takik saong thu lagu. Ngak tui sarak di Dang saong Karja ka bruk patagok kinh te – xa hoi, meng phun jien di dom danakdak mục tiêu, xã Phước Hải hu buh jien tabiak padang ka palei Caoh Patih dom kết cấu hạ tầng yau : menhek, jalan, sang bac, balai y te, kraong rabaong dalam mblang hamu pabak ka bruk pala drak…Bruk ba tame pandar sumu gaok dom công trình nan hu ba mbuan lagaih ka mikva patagok kinh te sang, dak harei dak paglaong raidiuk.

Bilan xuân ini, Ông Báo Hưng – sa taha palei hu angan je di palei Cuah Patih bak 80 thun. Kak pagam saong puk palei meng dom pluh nan, jang urang halei karei, ong Hưng mboh hu bruk salih barau di palei negar. Ndom saong kol dahlak, ông Báo Hưng brei thau : dahlau thiah, raidiuk di mikva Cam palei Cuah patih biak kan kandah, glaih glan, oh hu sang danaok praong laneng yau urak ini; ia pandar jeng oh hu, rilo meng pandar ia bingun, ia nyar; labaih 10 thun ini mai, raidiuk di mikva Cam palei Cuah Patih hu salih bahrau mboh di anak meta : sang danaok praong, siam, hu jalan ia hacih ba mai tal sang… Lingiu di nan, mikva pak ini daok thau padang bein njam hacih, njam siam, ngan haong taneh pala labaih 20 hecta hu dom janih phun pala ye : trong ndaiy,  cà rốt, meriak, lathun tím…; hu mbaok tame bruk palimek limo ba mai kein laba jang dua mbang duk saong raong glang yau dahlau deih. Oh lac patagok kinh te thaoh, mikva Cam tuk halei jeng thau patagok bruk jum pataom, daong ba gauk, dak padang Talei pajaih pachreih bac, baoh sang pachreih bac, talei pajaih tự quản ka an ninh trật tự, pato pakai anek taco plaih atah dom tệ nạn xã hội, klaik mbang, oh menyum alak mbia ngak lahik an ninh trật tự … Ông Báo Hưng ndom lac : dahlak lac urang taha dalam palei, dahlak mboh lac Caoh Patih mengkan biak lụp xụp, oh ka hadah hadai, oh ka bac megru ye urak ini. Urak ini, Caoh Patih hu rilo bác sỹ, rilo kỹ sư, rilo urang jakar, rilo sinh vien cao đẳng daok bac megru saong ngak bruk ka karja saong daong ka sang, ka puk palei. Gru pato hu karja brei mesraiy jien blei ridaih, dak padang sang danaok. Palei urak ini, meda atau kan kathaot sang halei jeng hu dua tal klau sruh ridaih…

 Ong Châu Văn Biết – Phó Bí thư Đảng ủy xã Phước Hải, huyện Ninh Phước, tỉnh Ninh Thuận daok brei thau lac : Burak ini, mikva kham merat di ngak mbang pala drak, blei anek limo, pabe piah raong glang, paglaong jien mek tame; khang hatai ba dom alamu barau tame pala drak; Baok cakrok veik lac sang kan kandah, kan kathaot min jeng hu brei ka anek nao bac, oh hu thei klak bac meteh jalan, thei jeng hu bang cap piah duh ka drei saong ka xa hoi.

Dalam langik li-an bingi di bilan xuân ini, bhapbini Cam bhum biak kan kandah, bhum thu  lagu tỉnh Ninh Thuận daok ba pren tabiak ngak mbang, pala drak, iek glang dom bein phun mbang baoh atau dom bein njam hijao piah raok tết, bui sambai xuân, raok sa raidiuk drei sir, haniem phuan./.

Thúy Linh