" Dahlau daih daok dalam glao klo, oh hu điện, jalan nao jeng kan. Tian oh trei, eik lipa, ruak kik tui miat.  Urak ini tabiak pak ini hu sang, hu taneh biak siam lô, drei thau dhar phor Đảng, dhar phor karja. Urak ini njauk kham merat ngak mbang."

Nan lac bruk bui sambai di sa-ai Điểu Phong, bagsa S’tiêng daok di khu tái định cư xã Đồng Nai, huyện Bù Đăng, tỉnh Bình Phước. Daok ala ini, lac panuac khan di sa-ai Cao Thị Ênh, bangsa Khmer jeng daok di khu tái định cư xã Đồng Nai, huyện Bù Đăng:

 "Dahlau daih daok di  thôn 5, xã Bình Minh, oh hu sang, oh hu taneh, urak ini hu karja brei tame daok di khu tái định cư ini, bloh daok brei 1ha taneh pala drak tra. Sang dahlak pala pa-ok blait. Daok diuk pasang saong dom urang anek jeng nao kuah katak. Hu sang bahrau, Tết ini bui sambai lô.Thau dhar phor Đảng, dhar phor karja."

Ini oh lac bruk bui sambai di ta-eng sa-ai Điểu Phong atau sa-ai Cao Thị Ênh bo nan jeng lac bruk bui sambai di 66 sang bhap bini bangsa takik daok di khu tái định cư thôn 8, xã Đồng Nai, huyện Bù Đăng, tỉnh Bình Phước. Rah tapen jalan tuh menyek lac jalan điện hu padang ngak khang kajap gam saong sambo hijao di dom bein phun kayau, yau brei mboh bruk jak jeng meng kham merat ngak bruk dalam 2 thun tapa di mikva pak ini. Dom baoh sang praong, siam hu padang tagok ngak brei hadah jang ka bhum palei bak hatai jia ka sa raidiuk trei sir, siam mekre, oh daok eik lipa, kathaot rambah.

Jeng yau dom baoh sang bhap bini bangsa takik karei karei, meng labik oh hu sang, oh hu taneh pala drak, raidiuk di sang sa-ai Điểu Phương tuk halei jeng kurang anak, kurang likuk. Meng tuk mai daok di khu tái định cư sóc Hai Căn, xã Phú Nghĩa, huyện Bù Gia Mập, raidiuk di diuk pasang sa-ai Điểu Phương mbuan lagaih jang biak rilo. Lingiu di bruk iek glang 1ha phun pa-ok blait saong tangei, diuk pasang sa-ai daok mek  asar pa-ok blait mai paok kanduh tuk lahaiy. Mblang taneh klaak saoh gah likuk sang, sa-ai pala phun bơ saong njam patam. Dua urang anek di sa-ai jeng hu nao bac, oh daok bak anek tagok puh yau dahlau deih tra. Dalam baoh sang bahrau, praong jaik 50m², sang sa-ai Điểu Phương daok di sóc Hai Căn oh padauk hu bui sambai. Sa-ai brei thau, meyah oh hu bruk sangka di Đảng, Karja ye baoh sang ini ngan saong sa-ai, ndih lipei jeng oh ka mboh. Sa-ai Điểu Phương brei thau:

" Sang kan kandah, ngak oh ginup mbang, hu brei sang uan tabuan lô. Urak ini sang sa-ai hu tani tanat. Oh lac brei drei limo, karja daok hu daong brei nao kuah katak. Ndua dhar phor Karja bial rilo."

Bruk bui sambi oh lac di ta-eng sang sa-ai Điểu Phương bo nyu daok pambak tal rilo sang kathaot urang bangsa S’tiêng karei karei di khu tái định cư ini. 15 baoh sang bahrau, yaok baoh yaom labaih 60 triệu đồng di khu tái định cư  sóc Hai Căn, xã Phú Nghĩa, huyện Bù Gia Mập kayua Đoàn Kinh tế Quốc phòng 778 ngak pô đầu tư bahrau ngak bloh saong ba brei ka bhap bini di puac thun 2016 meng bloh.

Jeng yau bhap bini S’tiêng daok di sóc Hai Căn, xã Phú Nghĩa, huyện Bù Gia Mập, bhap bini S’tiêng khu tái định cư di xã biên giới Lộc Thành, huyện Lộc Ninh, tỉnh Bình Phước dalam dom harei puac bilan Mat, bruk caga mbang Tết biak chreih chrai, bui sambai. Kayua raidiuk di mikva dak harei dak tani tanat. Kol dahlak hu mbaok di sang ong Điểu Ka Ló, tuk sang daok ngak pei nung caga Tết. Ong Ló brei thau, lingiu di ngak har, sang ong daok caga ralo, ikan, khan ao bahrau. Dom thun dahlau kan kandah lô, thun ini siam jang rilo ye.

" Tuk nan daok dalam daih rambah lô, urak ini hu tabiak ini, uan tabuan lô, sang siam, điện ginup. Uan tabuan lô. Oh thau ndom habar piah dhar phor Karja. Dahlau deih rambah lô."

Khu tái định cư di bhum biên giới, xã Lộc Thành, huyện Lộc Ninh urak ini hu cuk tagok sa blah ao bahrau salih ka bhum taneh bo 3 thun dahlau daok joa lange, klak saoh saong tok hu dom baoh sang... Dom jalan mbak, jaln điện, sang bac, balai iek ruak, ia hacih hu padang ngak piah dui brei jaik jang bhum atah bayah saong pasak huyện thị chreih chrai. Saong piah daong ka bhap bini bangsa takik di dom khu tái định cư bhum biên giới tỉnh Bình Phước hu mbang Tết bui sambai, trei sir, Bộ đội Biên phòng tỉnh Bình Phước jeng hu nao rivang, alin hadiah pandap ka mikva. Đại tá Nguyễn Văn Liên – Chỉ huy trưởng Bộ đội Biên phòng tỉnh Bình Phước daok brei thau lac:

 "Di bhum biên giới, raidiuk di bhap bini bangsa takik daok gaok rilo kan kandah. Mikva kak kajap haong bhum tapen negar, kak kajap haong bộ đội biên phòng tỉnh Bình Phước meng tuk padang tagok mbiah tal harei ini. Tuk Tết jaik tal, Đảng ủy, Bộ chỉ huy Bộ đội Biên Phòng Bình Phước pambuak haong pakat ủy, karja tỉnh iek glang Tết ka bhap bini dom bangsa takik bhum tapen negar."

Bình Phước urak ini ngak hu bloh 9 dự án định canh định cư ka bhap bini bangsa takik, daong ka 681 sang tani tanat raidiuk di bhum dự án. Dalam tỉnh hu labaih 6.490 sang kathaot lac urang bangsa takik, samu 44% dom sang kathaot dalam tỉnh. Dalam nan rilo meng lac bhum bhap bini S’tiêng, M’nông saong Khmer. Ndom ka bruk caga Tết ka bhap bini bangsa takik kan kathaot, ong Võ Văn Mãng – Giám đốc Sở Lao động – Thương binh saong Xã hội tỉnh Bình Phước brei thau:

" Ngan saong bhap bini bangsa takik kan kathaot, meyah dom đơn vị, dom kapul nyaom iek glang oh abih, ye kadung jien karja tỉnh daong pabak tame. Lingiu di nan, sang halei eik lipa tuk daok cang bilan yuak, ye  tỉnh hu tacei pato dom puk palei daong pacang eik lipa ka bhap bini."

Yaom lac daok rilo kan kandah, min meng bruk rik pren tame daong di dom pakat, dom gah, gam saong bruk kham merat yam tagok di mikva, mbaok meta dom khu tái định cư saong raidiuk bhap bini di tỉnh Bình Phước dak harei dak salih bharau, hadah hadai. Mikva uan raok thun bahrau dalam trei sir, chreih chrai, bui sambai./..