Puac bilan 10, hu dom mbang hajan praong tui gauk tuh trun bhum taneh pasak tua riya Thuận Nam di tỉnh Ninh Thuận. Dom mblang hamu thu klang taneh, labaih 1 thun tapa klak bilau kayua oh hu ia, urak ini meng hu ia tame. Mikva urang nong jak gauk li-ua takaik, ngak taneh piah pala drak veik. Bilan ini, njauk mai ngak padai min rilo mikva urang nong brei pala hareik saong dom janih phun takik pruh ia, dang hu di pandiak. Sa-ai Kiều Văn Khánh daok di palei Ram Văn Lâm 1, xã Phước Nam hu 3 sào hamu di mblang hamu Ram. Birau pala blaoh 2 sào hareik Prang dalam hamu hu ia, sa-ai Khánh brei thau:

“Meyah ngak padai ye 2 bilan tra oh hu ia. Huac kurang ia yau nan ye drei salih tapa pala hareik. Pala hareik nyu takik khat jang.”

Urak ini, yaom lac ia langik saong ia meng ribaong kraong hu ginup piah trun pajaih padai; min tui kuhria mboh dahlau lac langik El Nino meda dui atah tal kreh thun 2016, mikva urang nong di bhum tua riya Ninh Thuan daok salih khang janih phun pala. Karja palei  hu samar khan brei mikva thau jalan pala drak, abih di nyu nan lac bruk salih janih phun pala di palei. Ong Đạt Chung Vui, urang jakar gah ngak nong xã Phước Nam, huyện Thuận Nam, tỉnh Ninh Thuận brei thau:

‘Xã nao tal yaok baoh sang piah jak ba mikva, kham merat tal bilan 11 brei pala drak taong abih taneh hu ia ngak. Daok dom labik mbuan kurang ia ye brei salih tapa pala hareik saong tangei hlai piah pabak ka bruk raong glang.”

Taneh ngak padai oh caga hu ia pruh, ong Từ Công Chu daok di palei Văn Lâm 3, xã Phước Nam, huyện Thuận Nam birau hu karja palei daong 4 kg asar pajaih hareik piah salih janih phun pala. Bilan dahlau sang ong Chu pala hareik hu 1 sào, urak ini hu daong asar pajaih, ông peih praong taneh pala hareik hu 2 sào. Ong Chu chreih chrai khan lac:

 “Karja daong pajaih, hu ye drei peih praong taneh pala. Hu pajaih, drei pala veik. Pala hareih oh huac tua riya.”

Dalam bilan Đông Xuân aval thun ini, di bhum pasak tua riya Thuận Nam hu 1.800 hecta taneh ba tame pala drak. Binek Tân Giang urak ini birau padang hu 12 triệu m3 ia, oh ka tal tatut padang ia di binek. Anak tal, hajan oh daok ralo, yau nan ye halau ia khik caga meda tal akaok thun 2016 oh ginup ka bruk ngak padai di bhum taneh tua riya Thuận Nam. Yau nan, bruk salih janih phun pala nan lac jalan brei ngak dahlau. Ong Trần Quốc Hoàn, Akok jabat Ngak nong saong Patagok palei pala huyện Thuận Nam, tỉnh Ninh Thuận brei thau:

 “Huyện daok kham jak ba, tacei pato dom xã brei jak ba mikva salih janih phun pala di taneh ngak padai tapa dom janih phun karei takik ia yau: tangei, ratak, hareik…”

Bhum tua riya trak Thuận Nam peih bruk pala drak bilan Đông Xuân aval jang dalam bilan 11 ini. Tui kuhria, 1.000 dalam 1.800 hecta taneh ngak padai brei salih tapa pala dom janih phun dang hu dalam tua riya, takik pruh ia. Meng phun jien pacang tua riya, huyện Thuận Nam daok daong pajaih tangei hlai saong hareik veik ka urang nong piah salih janih phun pala. Dom hagait daok peih ngak, bhum taneh tua riya trak ini di Ninh Thuận daok caong patrun patakik khat lahik dalam bruk ngak nong anak dom kan kandah kayua El Nino./.