Bảo hiểm xã hội Việt Nam bahrau brei 5 kapul nao alin 2.500 harak bảo hiểm y tế (BHYT) ka bhap bini 10 tỉnh bhum njauk ia sua di gah krieh negar saong Tây Nguyên, tui kuhria yaom jien buh tame labaih 2 tỷ đồng. Urang hu alin harak BHYT lac dom urang hu angan blei BHYT di baoh sang (min ka oh blei). Gam saong bruk ngak ni, BHXH Việt Nam jeng pato tacei BHXH dom tỉnh, ban jak ba dom kapul, urang rik jien tame blei harak BHYT alin ka bhap bini njauk kan kandah kayua ribuk, ia sua meng blaoh.

  Ribuk Goni dok khang  75 km/sa mon, tuk mai tal jiak takai tasik Quảng Ngãi - Khánh Hòa hu jeng áp thấp nhiệt đới, ba tal hajan khang di bhum kreih negar song Tây Nguyên. Tui pasak pathau khan Khí tượng Thủy văn pakat negar , mesup ni (4/11), pasak ribuk atah di palao Hoàng Sa labaih 320 km nao gah Nam Đông Nam. Pren hangin khang abih di pakat 8, handaok pakat 10. Bhum tasik meng Quảng Nam tal Ninh Thuận hangin khang tagok pakat 6, meng beir harei ni tagok sa pakat, riyak tasik glong  3-5 m. Ủy ban pacang caga bala song dong duah urang gaok bala pakat negar  brei thau,  Mintri  Quốc phòng hu pataom labaih 64.500 urang song 1.718 pandap panda, dalam nan hu radeih ôtô, radeih  đặc chủng, kapan gaiy song kapan haoh, caga dong ka bhap bini.

Gah y tế tỉnh Đắk Lắk brei thau lac dalam tỉnh bahrau hu sa urang metai kayua asau gila kaik. Urang ruak lac Y.S.Ê., 40 thun, bangsa Ê đê, daok di huyện Cư M’gar, tamuh ruak di harei 2/11, hu gauk gar ba tame pasak y tế huyện, hadei di nan hu ba tagok sang iek ruak Đa khoa bhum Tây Nguyên. Tal dah page harei 3/11, urang ruak nan metai. Tui panuac di gauk gar brei thau, urang nan njauk asau kaik min oh klauk jru vắc-xin pacang caga ruak. Meng akaok thun tal urak ni, Đắk Lắk hu 7 urang metai kayua asau gila kaik, jeng labik hu manuac matai kayua asau gila kaik rilo abih di bhum Tây Nguyên.

Sở Lao động - Thương binh saong Xã hội tỉnh Bình Phước brei thau, dom gah, dom puk palei dalam tỉnh dok samar ngak, kham merat tal abih thun 2020 Bình Phước meda trun hu 1.250 boh sang kan dalam bhpa bini bangsa takik. Danak dak yaok thun trun hu 1.000 boh sang kathaot bangsa takik  di tỉnh mek hu dom jak jeng prong. Thun 2020, Bình Phước hu pabak labaih 75 tỷ đồng piah dong ka bruk pasiam veik sang dok, padang ngak sang, dui jalan điện, dong ia pandar, padang ngak jaman, pato bruk ngak, dong duah bruk ngak ka dom boh sang kathaot… Langui di nan tỉnh dok dong ka dom boh sang kathaot mersriy  jien meng gilang pariak sarak karja piah ngak mbang pala drak, padang jalan ngak mbang duah jien ka bhap bini.

132 urang jaka daok ngak bruk di dom labik di Công an tỉnh Bình Thuận halain hatain nao ngak bruk di công an pakat huyện.  Đại tá Trần Văn Toản – Giám đốc Công an tỉnh brei thau, dom urang jaka hu ba nao huyện ngak bruk mbang ini hu pato pakai dalam, hu ilamo naih joi. Bruk brei rilo urang jaka di tỉnh nao ngak bruk di huyện lac piah padang công an pakat huyện khang kajap abih gah, pabak bruk di tukvak bahrau.        

  Hadei di 13 thun, dom negar  Mỹ, Úc, Ấn Độ song Japon  (dok ieu lac nyaom Quad) mbang camereip hu pasram haong gauk di  Vịnh Bengal. Kapan mesruh di nyaom  Quad harei  3/11 hu ba tame piah peih tabiak tuk vak ka I dui atah  4 harei id bruk pasram, pacang kapan njuk ia song dom sar kadha karei angaok bhum tasik dunya . Tuk vak ka II di bruk pasram  hu peih tabiak di angaok tasik  Ả Rập meng harei 17 tal harei  20/11 song hu glong jang. Mỹ kuhria ba sa kapan mbang kapan haoh  năng lượng hạt nhân. Bruk pasram rah tabiak dalam tuk  Trung Quốc dak harei dak jhak dalam bhum, gam gambrei mboh pren khang meng tasik biển  Đông tal bhum Ấn Độ Dương. Tui dom urang ilamu, bruk pasram Malabar 2020 hu mong lac bruk payua panuac brei Trung Quốc thau.

Dom urang njom SARS-CoV-2 min oh mboh hagait brei thau lac ruak dalam rahra di bhum Kashgar) Khu tự trị Duy Ngô Nhĩ Tân Cương, Trung Quốc jeng ka oh mboh patrun, nan ye labik ni njauk peih viek bruk dut iek dalam rahra mbang ka 4 meng harei 4/11. Bruk njauk caik dalam hatai, yaom lac hu peih bruk dut iek dalam negar tal 3 mbang, min dom urang njom ruak min oh mboh hagaih brei thau lac ruak di labik ni jeng daok tagok khang. Kuhria ta-eng harei 3/11, Kashgar hu tal 116 urang ruak min oh mboh hagaih lac ruak.

Dom bruk ngak di du thuyền di pabah lamnge  Yokohama daok jiak Tokyo - Japon dok hu peih veik  hadei di 8 bilan padeih kayua  jit prong Covid-19. Meng harei 2/11, du thuyền prong abih di Japon  lac Asuka 2 tabiak truh pabah lamnge saong pajeng labaih 330 tuai piah nao tal  pabah lamnge Shimizu di  tỉnh Shizuoka saong mai veik dalam vaktu 4 harei nao mai. Domtuai trun daok meteh prein pajeng di kapal, saong tong abih tuai brei dut iek Covid-19./.

Urang lang: Thu Thảo -H.Pha  4/11/2020  15:00:10