Pathau mikva saong taong abih gauk:

Ngak tui panuac pato di Wa Hồ: “pakacah gauk lac ranam taneh ia – ranam taneh ia ye brei pakacah gauk”, dom thun tapa saai Phạm Xuân Tư, Bí thư Chi đoàn 3 xã Hồ Tùng Mậu, huyện Ân Thi, tỉnh Hưng Yên tuk halei jeng kham merat hu mbaok tame  bruk Đoàn saong ba akaok nao dahlau dalam bruk ngak kinh tế joi. Urang vak Nguyễn Hiền hu khan ka kreih camin urang likei hadah krah ini. 

Ndih tapui tabiak saong praong tagok dalam sa baoh sang ngak nông, meng sit Phạm Xuân Tư hu hatai caong khin ngak kaya meda angaok bhum taneh palei drei. Thun 2013, tuk huyện Ân Thi peih ngak danak dak pataom taneh salih hamu, meng hatai khin tabiak truh kan kathaot, Phạm Xuân Tư saong baoh sang pataom taong abih taneh pala oh hu kein laba di baoh sang piah padang trang trại VAC. Thun 2014, hadei di tuk bac tamat trung cấp kỹ thuật điện Hưng Yên, Tư mai palei patagok  kinh tế baoh sang. Barau padang mbang ngui, kayua oh ka hu ilamu, gam lac oh kuhria caga dahlau dom ilamu ka bruk raong glang nan ye saai Tư njauk khat lihik. Menuk ada raong mbang camereip njom ruak metai jaik abih. Oh taduan lah, Phạm Xuân Tư tut angan tame dom tal bac pasram ilamu kỹ thuật. Gam saong nan, saai jeng nao taom gaok dom po trang trại hu jak jeng piah bac megru saong pataom ilamu ka rup drei. Yam tapa dom kan kandah, tal urak ini saai Phạm Xuân Tư hu peih praong trang trại di drei jaik 4 ha, dalam nan pandar 1,5 ha raong kaya ikan; 5000 drei ada. Langiu di nan saai pambuak saong raong menuk, pabui saong pala 3000 phun mbang baoh dom janih yau darang, kruoc bung, drum Đài Loan, pa-aok Thái Lan. Meng trang trại di drei, yaok thun saai Tư mek tame hu labaih 500 triệu đồng, hadei di tuk kaoh bloh phun jien saai daok laba hu 250 triệu sa thun. Saai Phạm Xuân Tư lac: 

 “Drei caik hatai panuac di wa “ndom takik ngak ralo”, “bruk hagait caong dam dara hu, bruk hagait kan hu dam dara”, bac megru tui wa tuk halei  drei jeng ba akaok nao dahlau dalam patagok kinh tế saong rèn đức. Tuk barau raong glang jeng gaok ralo kan kandah, oh ka hu ilamu palih ruah anek pajaih siam, saong tame thời vụ, ruak kik, jit ruak, pablei sản phẩm. Drei nao tangi sua dom saai nao dahlau, pasiam veik dom kan kandah bhian gaok”.

Meng ilamu di rup pabhap dalam padang bruk ngak kinh tế trang trại, Phạm Xuân Tư hu tham mưu saong kapul dam dara – hội liên hiệp dam dara xã Hồ Tùng Mậu padang klup kapul dam dara daong gauk patagok kinh tế. Urak ini dom klup kapul jeng ba bruk ngak tani tanat ka ralo dam dara dalam palei. Daok saai Tư tuk halei jeng abih hatai jai tacei pato ka dom urang đoàn dam dara padang bruk kinh tế trang trại di puk aplei. Saai halan hatian pabak anek pajaih, tacei pato kỹ thuật, ilamu raong glang piah daong dom ayut barau yam tame dak padang kinh tế baoh sang, patakik dom bala dalam tukvak sản xuất. Oh lac ngak kinh tế joi, 10 thun ngak Bí thư chi đoàn, urang đảng ranaih umo Phạm Xuân Tư tuk halei jeng abih hatai jai ba akaok nao dahlau dalam yaok bruk ngak di đoàn. Saai bhian saneng ngak yau habar piah salih barau dom bruk ngak di đoàn piah dui pachreih ralo urang đoàn dama dara hu mbaok tame; taphia di nan patagok khả năng, tinh thần xung kích di dom ayut ranaih dalam bruk padang ngak palei pala barau, bruk halan hatian. Taong yaom ka Phạm Xuân Tư, Bí thư Đoàn dam dara huyện Ân Thi, Đinh Quốc Hưng brei thau:

 “Urak ini bruk ngak ini lac sa dalam dom bruk ngak hadah krah abih di huyện Ân Thi ka trang trại saong gia trại. Tapa bruk ngak ini oh lac adei saai urang đoàn, dam dara di huyện mai rivang iek saong bac megru, bo dom đơn vị huyện ayut yau Phù Cừ, Tiên Lữ jeng mai bac megru piah peih praong di puk palei drei”.

Meng dom jak jeng yau nan, saai Phạm Xuân Tư lac sa dalam dom kreih camin dam dara hadah krah ngak tui panuac wa di tỉnh đoàn Hưng yên./.