Ong Nên tacei pato pak di nyaom biai 

Biar harei 16/12, Thành uỷ TPHCM peih nyaom biai pataom iek veik 5 thun peih ngak Sarak 05-CT/TW di Mintri Chính trị saong pok meyaom dom kapul nyaom, menuac urang ngak siam bruk bac megru saong ngak tui siam mekre hadah krah di Hồ Chí Minh, vaktu 2016 - 2021. Tapa nan, jaik 400 urang yau kreih camin hadah dalam bruk bac megru saong ngak tui jalan hadah krah siam mekre di Hồ Chí Minh hu pok meyaom, dalam nan hu 5 kapul nyaom, menuac urang hu taduan harak meyaom di Thủ tướng Rajaei. Tui Bí thư Thành ủy TPHCM, Nguyễn Văn Nên, bruk mesruh pacang caga COVID-19 meng blaoh brei mboh cambaih abih prein khang di hatai anit ranam gauk, jum pataom gauk di bhap bini. Taphia di nan, ong Nguyễn Văn Nên jeng hu tacei tabiak lac jeng daok hu dom urang đảng ndom min oh ngak, daok ba rup drei pa-atah di rahra, daok ngak palai pajoa, ngak brei lahik hatai jia di bol bhap rahra tame Đảng.

UBND tỉnh Quảng Bình hu peih mbang họp báo, brei thau ka dom bruk ngak anak tal dalam Harei pahadar 110 thun Harei manek Đại tướng Võ Nguyên Giáp. Tui nan, Harei pahadar 110 thun Harei manek Đại tướng meda hu peih tabiak di harei 22.12.2021, pambuak bruk Pahadar 110 thun manek Đại tướng haong Pahadar 77 thun harei padang Bol bala bhap bini Việt Nam saong 32 thun harei Quốc phòng abih bhap bini. 

Harei 16/12, Sở GTVT tỉnh Bà Rịa - Vũng Tàu brei radaih peih tapa jalan roya 56, jalan plaih ban sit Bà Rịa. jalan ini atah labaih 12km hu padang ngak haong yaom jien labaih 1.167 tỷ đồng piah patrun patakik radaih nduac tame dalam ban sit Bà Rịa ba tal gar jalan, dui katut panak tukvak pajeng pandap meng dom labik ngak kong, labik pabah lamnge Cái Mép - Thị Vải, labik ngak kong Long Sơn tabiak jalan nduac samar Biên Hòa - Vũng Tàu. 

Mintri Y tế bahrau hu harak njauk hatai haong panuac caong di Sở Y tế TPHCM ka bruk ngak iek brei patut viek tukvak daok karei pataom gauk trun daok 7 harei ngan haong F0 oh mboh hagait, hu klauk ginup 2 mbang vaccine saong dut iek mboh âm tính di harei ka 7. Tuk urang ruak abih tukvak brei daok karei di labik taduan raok urang tame taong ruak, brei tui iek di sang tui adat. Daok bruk tabiak truh sang iek ruak saong caga bruk njom mbak, ngak tui pato tacei iek glang bruk taong ruak kayua Mintri Y tế ba tabiak di sarak ka 4689 harei 6/10.

Anak bruk Campuchia hu menuac camereip njaom anek ruak Omicron, piah pacang caga anek ruak ini njaom tame taneh ia drei tapa jalan tapen negar, urak ini rilo tỉnh ban gah meraong brei patagok menuac khik piah pacang buôn lậu gam haong pasang iek jit. Tỉnh Kiên Giang hu ieu pataom jaik 2.000 urang jakar, urang lin di rilo gah (quân sự, biên phòng, công an, dân quân tự vệ, y tế) padang labaih 180 bilai pasang iek rah tui jalan tapen negar meng Giang Thành tapa TP Hà Tiên. Yaok 3 bilai khik iek di labik ye meda hu 1 kapul pasang iek nao mai hu mbaok luac harei melam. Dalam tuk nan, di angaok bhum tasik meng Kiên Hải tabiak Phú Quốc saong tabiak pulao Thổ Châu, gah chức năng tỉnh Kiên Giang jeng brei patagok bruk khik iek, gam haong ghe nduac samar, ghe sit min hu jamriak praong khang daong pabak bruk khik iek, abih di nyu lac di tuk melam.

Gah Y tế dunya harei kabroi hu ba tabiak panuac kakei anak meta ka bruk pambuak dom janih vắc-xin caga COVID-19 meng dom gah karei di gauk ngan haong mbang klauk ka 2 saong dom mbang klauk paglaong. Tui nan, iek tui vắc-xin hu blaoh, vắc-xin caga COVID-19 hu công nghệ mRNA yau ye di Pfizer atau Mô-đơ-na meda hu pandar klauk mbang hadei di dom mbang klauk camriep lac vắc-xin AstraZeneca saong gilac viek. Meda klauk Vắc-xin AstraZeneca saong dom janih vắc xin công nghệ mRNA halei karei hadei di dom mbang klauk vắc xin bất hoạt camriep di Sinopharm. Panuac kakei hu ba tabiak hadei di mbang roh duah di adit dahlau brei mboh bruk klauk vắc-xin Mô-đơ-na    9 adit hadei di mbang klauk akaok meti di dom mbang klauk AstraZeneca atau Pfizer / BioNTech daong hu prein pacang cakak jit ruak biak siam jang.

Labaih 300.000 menuac njauk klaak sang danaok saong dom labik padeih padei tapen tasik tuk ribuk Rai (daok hu angan ieu lac rabuk Odette) tuh tame dom labik gah meraong saong bhum kreh negar Philippines. Thị trưởng ban Surigao, Ernesto Matugas brei thau, rabuk nyu palai pajoa ban hu labaih 170.000 menuac ini dalam dom mon, ngak brei khat lahik biak trak. Dom baoh sang tayah tayac yau njauk mbom saong dom jalan jeng oh nao mai hu kayua glut jaleih. Tui dom pathau khan tuk camereip, jabat bala meng langik tasik negar Philippines brei thau, 1 urang metai saong 2 urang karei njauk rambus dalam rabuk. Tui kuhria, rabuk  nao tame bhum Biển Đông di harei page saong pamaong tal Việt Nam.

Jabat an ninh tỉnh Khammuane di Lào brei thau, harei 15/12 kapul cảnh sát pacang caga jru phin barau cap mek sa mbang pajeng aphin biak praong trak abih tih 352 kg. Dahlau di nan, meng puac bilan 10 meng blaoh, kapul pacang caga jru phin Lào hu taong tayah sa mbang pajeng jru phin trak 7 tấn, lac bruk pajeng jru phin hu brei thau lac praong abih meng dahlau mai dalam bruk pablei salih  jru phin rahtabiak di Lào njauk kapul chức năng taong tayah. Lào lac taneh ia hu sa binah taneh daok dalam labik Tam giác vàng, lac labik pasak ngak tabiak saong pablei salih jru phin. Bruk pablei salih, pajeng ba jru phin di Lào tukvak tapa tui kuhria mboh tagok, ngak kan kandah trak tal an ninh trật tự saong salamat di rahra./.

Urang lang: Thu Thảo- Mousaphuong -17/12