Danak dak "Blah harak anit ranam” daong ka urang đoàn, urang ngak gaok kan kandah hu nao palei mbang Tết

Biar harei 20-1, di Hà Nội, Thủ tướng Nguyễn Xuân Phúc mai ravang, ngak bruk saong Kapul pakat negar urang njauk jru mek klik kruac/dioxin Việt Nam (VAVA). Kapul urang njauk jru mek klik kruac/dioxin Việt Nam (VAVA) hu padang tagok di 63 tỉnh, ban, labaih 600 huyện, quận; 6.500 xã, phường gam saong labaih 400 rabau urang hội. Kuhria tal bilan 12-2020, Kapul jak ba hu labaih 2.264 tỷ đồng; ta-eng thun 2020, jak ba hu jaik 370 tỷ đồng. Yaom jien nan hu pandar piah daong pasiam sang, ngak sang anit ranam, daong jien bac, daong duah bruk ngak, daong phun jien ngak mbang, daong iek ruak saong alin hadiah jru, pasiam rup pabhap, daong sang kan kandah, daong pasiam khut khat kayua bala meng langik tasik, nao ravang, alin hadiah pandap tuk rija, roya ka yaok ratuh rabau mbang urang..Di var ngak bruk, Thủ tướng Nguyễn Xuân Phúc hu alin hadiah 50 baoh sang anit ranam brei ka dom urang njauk jru mek klik kruac saong 500 triệu đồng brei ka bruk iek glang, raong saong iek ruak ka urang njauk jru mek klik kruac/đi-ô-xin.

Tui pathau khan di Gah Y tế dunya, biến thể SARS-CoV-2 hu duah mboh camereip di negar Anh di kreik bilan 12-2020, urka ni nyu njom mbak tabiak 50 negar song bhum taneh. Akaok mintri Y tế Nguyễn Thanh Long ndom lac, khol drei pacang cakak hu jalan kapan haoh bo oh pacang cakak hu jalan kabak lac kol drei lah ye. Kayua yau nan ye dom tỉnh ban patagok jang gac bruk pasang iek catang di dom jalan tapen negar piah duah urang tame tabiak suan hukum, brei dok karei, khik ka bhap bini raok tết siam mekre. Di Việt Nam, kuhria tal 17 tuk harei 20-1, hu dom urang njom bahrau tame Việt Nam, hu brei dok karei chip hadei di tuk tame VN.

Di tuk uan Tết thun sak kubao 2021, Tổng LĐLĐ Việt Nam pambuak bruk haong Hãng kapal haoh Bamboo Airways peih danak dak "Blah harak anit ranam” piah daong ka urang đoàn, urang ngak gaok kan kandah hu nao palei mbang Tết. Tui kuhria, dom harak kapal haoh brei ka Liên đoàn lao động dom tỉnh, ban praong hu: Thành phố Hồ Chí Minh, tỉnh Bình Dương saong Đồng Nai yaok labik 150 harak, tỉnh Long An 50 harak. Dom LĐLĐ tỉnh, ban brei radaih pajeng dom urang hu alin harak kapal haoh tabiak mblang kapal haoh Tân Sơn Nhất.

Beir harei kabroi, Đảng uỷ, Bộ Tư lệnh Quân khu 7 peih bruk pok meyaom dom doanh nghiệp naih gheih dalam bruk padang ngak gah quốc phòng abih bhap bini pak di labik Quân khu thun 2020. Thun blaoh, Quân khu 7 hu ngak salah bruk padang ngak 63 labik dân quân thường trực tapen negar angaok mbaok haluk yaom 84 tỷ đồng; padang 28 labik dok jiak labik dân quân tapen negar hu 140 boh sang, yaom 19 tỷ đồng, yaok thun Quân khu padang labaih 300 boh sang yaom 24 tỷ đồng ka boh sang sarak karja, mik va bangsa takik. Dalam mbang Covid-19 meng bloh, tuk TPHCM jeng sa labik nao dahlau dalam bruk pacang caga jit ruak, dom tỉnh jeng klah rabha song ban raya tuk padang rilo labik brei dok karei, rik dong pacang jit siam lagaih, hu peih 240 labik brei dok karei, madataduan hu jiak 62 ribau urang, tuk tabung glong hu taduan labaih 60 ribau urang.

Hadei di 5 thun peih ngak danak dak ngak iek pilih ruah urang bac da-a glaong daok ranaih umo halan hatian mai ngak bruk di dom xã, daong patagok palei pala, hu 27 urang tut angan mai dom palei dalam tỉnh Bạc Liêu, tuk camereip ngak hu bruk biak njauk pok meyaom. Tui amuk Lâm Thị Sang, Phó Chủ tịch UBND tỉnh Bạc Liêu, dom urang ilamu daok ranaih umo nan tuk hu brei mai xã ngak bruk, hu Đảng ủy, UBND saong dom mban, ngành, kapul nyaom dom pakat sangka daong, ba mbuan lagaih saong brei bruk tui prein, tui ilamu piah ngak siam bruk hu jao brei. Dom urang ilamu ranaih umo mai xã ngak bruk hu brei bruk njauk ilamu saong njauk tui bruk bac megru. Tapa tukvak ngak bruk di puk palei, hu mbaok tame patagok palei pala bhum atah bayah, bhum biak kan kandah, dom urang nan rilo meng hu ba angan piah pilih ruah tame nyaom roya đảng bộ pakat puk palei tukvak 2020 - 2025.

Meng dalam harei camereip tagok rai, Tổng thống Mỹ Joe Biden hu mbaoh tangin tame rilo sarak piah cagar veik bruk di Tổng thống dahlau daih. Tổng thống Joe Biden batabiak adat brei padeih padang danieng tapen negar song Mê-xi-cô, padeih bruk pakauk nao mai song dom negar Islam, tabiak panuac hu mbaok tame Hiệp định pacang biến đổi khí hậu Paris song Gahkapul Y tế dunya, song mek veik bruk batabiak danak dak jalan nding menyek Keystone. Langiu di nan ong Joe Biden hu panuac ieu brei cuh patiah pacang mbaok di dom boh sang liên bang, padang sa jabat liên bang bahrau piah pacang caga Covid-19, song pasiam veik bruk quốc phòng song y tế dunya di Hội đồng an ninh quốc gia Nhà Trắng, Jabat ni njauk karja dahlau deih brei kreik mbang.

Negar Anh hu sa bruk biak duh hatai tuk hu tal jaik 2 rabau menuac metai kayua Covid-19 dalam harei 20/01, glaong di abih kuhria meng dahlau mai. Ini lac dom menuac metai rilo di abih dalam sa harei, oh lac di Anh bo daok hu di châu Âu kuhria meng di tuk jit praong Covid-19 tamuh tabiak di bhum taneh ini di 1 thun dahlau. Dom urang njom bahrau di Anh jeng hu labaih 38 rabau urang, tagok glaong veik dut saong 1 harei dahlau di nan. Di châu Âu, dom taneh ia Pháp, Tây Ban Nha jeng daok hu urang njom tagok khang veik.

Urang brei panuac di tổng thống Zimbabwe brei thau Ngoại trưởng Sibusiso Moyo di negar ni metai kayua COVID-19. Ong lac sa dalam takik urang jakar pakat glong metai kayua COVID-19.Hu rilo urang chính trị, urang pal rajaei pakat glong dương tính song virus corona ba tal viêm jalan suah yava cấp COVID-19 dalam thun tapa. Hu dom angan hu je yau duik pasang Tổng thống Mỹ Donald song Melania Trump njauk njom ruak dalam bilan 10-2020./.

Urang lang: M. Phương – Hani Pha – 21/01