Biar harei 20/7, Quoc hoi hu palih ruah 4 Phaok Akok QH saong 13 urang di Ủy ban Thường vụ Quốc hội meng bruk buh phieu. Tapa nan, taong abih 17 urang hu ba angan tame jeng hu palih ruah tame abih, dalam nan 13 urang hu palih ruah veik saong 4 urang hu tame mbang akaok meti. Dom sarak ka bruk palih ruah Phaok akok QH saong palih ruah urang di Ủy ban Thường vụ Quốc hội hu brei tapa. Cambaih laih lac, 4 Phaok Akok QH mbang XV nan lac: ong Trần Thanh Mẫn;  ong Nguyễn Khắc Định; ong Nguyễn Đức Hải; Thượng tướng Trần Quang Phương. Dahlau di nan, Akok Quoc hoi Vương Đình Huệ hu panuac tuyen the brei abih hatai saong taneh ia, saong Bhap bini saong Hukum negar  hadei di tuk QH mbang XV palih ruah pok ngak Akok QH vaktu birau.

Biar harei kabroi, Phó Thủ tướng Vũ Đức Đam, akaok mban tacei jalan pakat negar ka bruk pacang caga jit Covid-19 ngak bruk haong urang par akaok ban raya HCM ka bruk pacang caga jit saong bruk klauk vaccine. Phó Thủ tướng ndom lac, bruk paatah di gauk njauk ngak biak catang, yaom lac hu rilo labik brei paatah di gauk biak kan min jeng njauk ngak catang. Ngan haong dom labik hu jit rilo ye yam tal bruk brei patah di gauk khang jang, piah ngak brei suai bruk njom mbak di jit ruak. Tui Phó Thủ tướng, mintri Y tế meda brei dahlau pandap panda iek ruak ka ban raya HCM, min, tapa panuac likau di ban raya ngan haong 18 janih, hu rilo janih biak kan blei, kayua yau nan ye njauk pambak tame dom pandap panda hu blaoh saong kham marat ngak patrun bruk urang F0 hanjual jeng trak.

Thứ trưởng Mentri Y tế Nguyễn Trường Sơn brei thau, Ban raya HCM lac labik hu rilo urang njom ruak abih di negar nan ye Mentri Y te daok brei dahlau vaccine ka ban raya. Tui kuhria, tal puac bilan 7, ban raya hu labaih 2 triệu mbang vaccine. Tal puac bilan 8, akok bilan 9, Mentri Y tế brei parabha ka ban raya labaih 3 trieu mbang veik, kuhria abih tih labaih 5 trieu mbang. Mentri Y te saong Ban raya HCM njauk gauk oh brei klauk jru vaccine ka urang F0 bo brei klauk jru tui sarak ba tabiak. Tui nan, oh neh rabha vaccine bo njauk brei iek dom vaccine lac yau gauk, kayua taong abih vaccine nan hu Gah Y te Dunya saong Mentri Y te taong yaom siam. Tui kuhria dalam dom harei tal, Ban raya HCM peih bruk klauk vaccine mbang 5.

Biar harei 20/7, urang par akaok pasak pasang iek ruak kik tỉnh Ninh Thuận (CDC Ninh Thuận) brei thau, hadei di tuk gah y tế peih bruk pasang iek dom urang njom ruak di khu phố 12, ban sit Phước Dân, huyện Ninh Phước (lac labik sruh jit hu 3 urang njom di bier harei 19/7) hu mboh 6 urang dương tính haong SARS-CoV-2. Piah plaih njom mbak jit ruak tabiak dalam khu phố, CDC Ninh Thuận saong pasak Y tế huyện Ninh Phước daok samar pasang iek, duah labik pambak ruak, pruh jru pametai anek ruak vil val dom labik hu manuac dương tính daok, saong hu nao tal. Kuhria tal maong 5 bier harei 20/7, Ninh Thuận hu 49 urang dương tính haong SARS-CoV-2.

  Pambuak tal bruk ba rahra mai veik palei, tui urang lambaok Công ty cổ phần Vận tải jalan pasei Sài Gòn, urak ini hu rilo tỉnh, ban pambuak saong C.ty piah ba tabiak jalan pajeng ba bhap bini diuk rai saong daok ngak bruk di Ban raya HCM saong dom tỉnh gah Meraong negar mai palei. Yau ye, Sở Giao thông Vận tải dom tỉnh Hà Tĩnh, Nghệ An, Thanh Hóa, Thừa Thiên-Huế, Đà Nẵng, Phú Yên…saong Hội đồng hương dom tỉnh, ban  jeng pok panuac likau dom mentri, dom gah brei palagaih ka bhap bini diuk rai di Ban raya HCM nao palei meng radaih pui. Urak ini, Công ty cổ phần Pajeng ba jalan pasei Sài Gòn sap pagap blaoh radaih, urang duh radaih, pambuak saong dom tỉnh, ban saong jabat chức năng hu jalan pacang caga jit, brei ka urang ndik radaih hu salamat tuk taduan raok saong bayar tuai. Gah radaih pui daok cang panuac javap jalei  meng Ban raya HCM.

Biến thể Delta daok ngak ka jit ruak Covid-19 di rilo negar biak sarau kadhau. Châu Âu jeng bhum camriep di dunya hu labaih 50 triệu urang njom Covid-19. Nga lac taneh ia di châu Âu njauk kan kandah trak damak abih saong jaik yam tapa tanut 6 triệu urang njom. Anh jeng ieu kakei dom urang halei hu nao tal dom kalup kapul melam saong dom labik pataom rilo manuac brei hu harak lac hu klauk ginup mbang vắcxin caga COVID-19, oh daok lac tok brei hu harak dut iek mboh âm tính. Sarak ni meda hu pandar meng puac bilan 9.

Kayua jit ruak pambak praong veik, negar Sangapo meda ba tabiak veik dom jalan ngak piah pacang caga. Tui nan, meng harei 22/7, yaok bruk ngak di gah langiu oh brei pataom rilo jang 2 urang. Dom sang oh brei taduan raok tuai rilo jang 2 mbang yaok harei. Dom nhà hàng, meng gah dalam tal gah langiu, tok brei pablei ba nao. Dom rạp chiếu phim daok hu peih pabah mbang min oh brei pablei pandap mbang.

Bol bala Mỹ harei 20/07 hu peih bruk cuh meng kapal haoh tame kol hu pambuak haong gah khủng bố dunya Al-Qaeda di Somalia. Ni lac mbang taong camriep di bol bala Mỹ daok di Somalia kuhria meng di tuk ong Joe Biden tagok ngak Tong thong. Bộ Tư lệnh châu Phi di bol bala Mỹ  saong rajaei Somalia hu pambuak gauk peih mbang taong ni, tui taong yaom camriep di Bộ Tư lệnh châu Phi brei mboh oh hu rahra halei njauk rambuac atau metai lahik di mbang taong ni./.

Urang lang: A.Nghiem &Thu Thao - 21/7/2021