Harei pataom pakacah Daoh tamia dom Sang bac Phổ thông Bangsa gam bac gam daok di tỉnh Sóc Trăng thun 2021

Biar harei 8/4, brei panuac di tuk jao veik bruk ngak di Thủ tướng, ông Phạm Minh Chính ndom lac brei ba kein laba di Đảng, taneh ia, bangsa, bhap bini tagok angaok di abih; ba abih hatai hajai, prein yava ngak bruk ka Taneh ia, ka bhap bini. Akok negar Nguyễn Xuân Phúc brei mboh hatai jia tame Rajaei ala tacei ba di Thủ tướng Phạm Minh Chính, lac urang hu rilo ilamu meng dom bruk ngak karei di gauk meda ngak salah bruk, ba taneh ia patui jalan cak rok patagok. Di var nan, Akok negar Nguyễn Xuân Phúc hu jao brei dom sarak di Akok negar pok ngak Phaok thủ tướng ngan saong ong Lê Minh Khái, ong Lê Văn Thành. Thủ tướng Phạm Minh Chính hu jao brei dom sarak di Akok negar brei pok ngak dom Akok Mentri birau.

Mintri Y tế mesup 9/4 brei thau, sa urang dương tính nCoV, lac menuac mai meng Angola hu brei dok karei chip di Bắc Ninh. Yau nan, 24 tuk tapa hu 10 urang njom ruak jeng lac urang VN meng negar lingiu tame. Tong abih urang tao gaok jiak song tame meng bhum jit dok hu brei dok karei lac jiak 37.000 urang.

UBND tỉnh Bình Dương birau tacei pato dom gah brei padang biển báo brei thau piah caga bala di 23 labik glut jaleih di tapen kraong Đồng Nai, jalan tapa ban sit Tân Uyên atah abih tih labaih 7.200 m piah pacang caga bruk manuac gaok bala, lahik drap ar. Glut jaleih taneh ngak kan kandah tal 106 baoh sang. Bruk ba tal glut jaleih nan kayua kuac mek cuah ala kraong. Urang ngak praong tỉnh Bình Dương tacei pato UB bhap bini thị xã Tân Uyên brei pakhang bruk pasang iek, langyah catang dom mbang urang kuac mek cuah dauk; jhul pakhang bruk peih ngak Danak dak padang ngak ar pacang glut jaleih ar kraong Đồng Nai.

Công an ban Phan Thiết, tỉnh Bình Thuận brei thau, bahrau mboh hu sa urang negar langui – angan Glen Jeffrey Evans, quốc tịch Canada pala 476 phun kacha di sang duik di ong dok di xã Thiện Nghiệp. Cảnh sát jeng duah mboh pok nylon hu chất dẻo sambo juk pak di sang ong. Ngak bruk song jabat pasang iek, ong Evans batabiak sa harak, ndom lac adat di gah chức năng Canada brei adat ka ong pala oh tapa 25 phun kacha piah iek ruak. Công an dok pasang iek dom phun kacha nan, duah thau dom harak gar pagam tal piah langyah tui hukum di Việt Nam.

Harei pataom pakacah Daoh tamia dom Sang bac Phổ thông Bangsa gam bac gam daok di tỉnh Sóc Trăng thun 2021 peih tabiak meng ini tal harei 10/4, kayua Rayo papar sap saong papar binguk Sóc Trăng pambuak saong Sở Pato megru tỉnh peih ngak. Ini lac bruk ngak piah dom anek saih bangsa takik hu taom gaok, bac megru gauk; Gam haong nan, lac jalan khik ramik saong patagok ilamu daoh tamia di bangsa. Tui Ban peih bruk, harei pataom pakacah thun ini hu abih tih 10 sang bac Bangsa gam bac gam daok di tỉnh, ngan saong jaik 300 urang jakar, gru pato saong anek saih.

Gah Y tế dunya song Liên minh vắcxin GAVI tabiak panuac brei thau, hadei di 6 adit peih tabiak, danak dak klah rabha vắcxin COVAX hu parabha labaih 38 triệu mbang vắcxin caga Covid-19 ka labaih 100 negar song dom gah kinh tế di 6 châu lục. Tui kuhria bahrau di ni, COVAX meda pabha takik di abih 2 tỷ mbang vắcxin dalam thun 2021.

Thủ tướng Ấn Độ Narendra Modi brei thau, bruk njom mbak ruak SARS-CoV-2 di taneh ia ini urak ini biak njauk haduh hatai. Ong iew dom palei brei jhul pasamar dut iek ruak, pacang caga catang tui labik sit gam pakhang bruk klauk jru vaccine. Urak ini, abih tih urang njom ruak Covid-19 di taneh ia Nam A1 ini lac labaih 12 trieu 900 ribau, labaih 166.000 urang metai, lac bhum jit praong ka 3 di dunya. Thủ tướng Ân Độ jeng hu ndem tal bruk brei klauk jru caga ruak pambak praong dalam dom harei meng 11-14/4 anak tal ka taong abih bhap bini daok dalam nyaom menuac hu klauk jru.

Mintri jien ndua Mỹ batabiak bruk tong phạt sa doanh nghiệp patau quý di karja Myanmar piah cakak jalan jien di bol bala Myanmar. Ni lac bruk ngak bahrau abih di karja Mỹ piah tong phạt urang jakar bol bala Myanmar pagam tal bruk di negar ni. Mỹ brei thau meda kateik greik ngan song dom pok jien di karja Myanmar tal tuk dom urang njauk chap khik hu palao tabiak, thiết quân luật song bruk samai samar jang yau dom pacang cakak viễn thông hu yah klaak./.

Urang lang: Ái Nghiêm – Hani Pha – 09/04 10:59:38