Yam tame thun bac bahrau 2017 – 2018, anek saih di ban sit Biên Hòa, tỉnh Đồng Nai oh daok bac “ka 3” tra. Bac ka 3, bruk kan jia min hu biak di sa ban lac đô thị loại 1hu tamat abih hadei di jaik 10 thun. Yaom lac bac ka 3 oh daok tra,  min bruk tal bac, sang bac jeng daok lac bruk kan kandah, nan ye bac ka 3 meda hu veik bo makna di nyu lac menuac sia caih menek biak samar, dalam tuk labik bac da-a oh ka pabak ginup. Urang vak Xuân Lượng, daok di ban raya Hồ Chí Minh hu kadha vak ndom tal bruk ini.

Dalam sa tukvak suai livik, sang bac Tiểu học phường Trảng Dài lac sa dalam dom labik pandiak bac ka 3 rilo abih di ban sit Biên Hòa. Baoh sang bac ini hu 9 thun peih pato ka anek saih bac 3 ka dalam harei lac: mesup, jala pandiak saong biar harei. Yau nan, lingiu 2 var bac di tuk mesup saong biar harei, anek saih dom tal bac njauk nao bac meng 10h30 mesup 2h biar harei, lac oh lagaih.  Anai Phạm Thị Ngọc An, gru pato tal 5, sang bac Tiểu học Trảng dài khan lac: bac ka 3 biak glaih glar ka gru saong anek saih. Tukvak oh lagaih, nan ye pren yava saong bruk bac da-a di anek saih oh siam, oh glaong. Thun ini, gru saong anek saih sang bac biak bui sambai kayua oh daok bac ka 3”. Anai gru Phạm Thị Ngọc An bui sambai lac: "Biak anit ka anek saih, tuk padeih padei ye dom adei nao bac. Rilo adei tanauk meta khin ndih, gru duah jalan daong ka dom adei oh tanauk meta min oh jeng. Thun ini klaak bac jala pandiak, gru pato mboh bui sambai lô, anek saih nao bac hu mbuan lagaih jang"

Dreih yau nan, dom anek saih jeng mboh chreih chrai jang biak rilo tuk oh daok bac var jala pandiak. Adei Phạm Lê Khánh Nhi, anek saih tal 5, sang bac tiểu học Trảng Dài lac: Jala pandiak tame bac nan ye bac oh siam, tanauk meta ndih lô. Amaik ame jeng galih glar kayua ba anek nao bac di tuk jala pandiak. Bac mesup li-an bingi ye bac da-a hu siam jang.

Hu yau nan lac kayua di phường Trảng Dài hu bahrau sa baoh sang bac tiểu học tra. Lingiu di nan, thun bac ini, sang bac Tiểu học Trảng Dài daok nyim hu 38 dut bac di sa sang bac pakat 2 daok jaik nan piah pato var biar harei. Dreih yau nan di dom phường karei, meng 4 baoh sang bac bahrau ngak saong yaok pluh dut bac nao nyim, anak meta ban sit Biên Hòa oh daok bac ka 3 dalam thun bac 2017- 2018.

Oh daok bac ka 3, min sang bac Tiểu học Phan Bội Châu (phường Long Bình, ban sit Biên Hòa) njauk mek phòng chuyên môn, atau hội trường piah pato bac. Yaom lac hu nyim bloh 3 dut bac di sang bac pakat 2 tapen nan, min dom dut bac di sang bac jeng oh ginup. Taneh saoh di sang bac daok hu, ban sit jeng daok kuhria padang 12 dut bac, min mbiah tal urak ini jeng daok di angaok harak gar. Anai Nguyễn Thị Dung, Hiệu trưởng sang bac Tiểu học Phan Bội Châu brei thau, meyah oh samar padang rilo dut bac tra, ye thun bac tal, bac ka 3 lac bruk kan plaih hu.

Bruk kurang sang bac, tal bac di Biên Hòa urak ini dak harei dak trak. Kuhria ta-eng sa sang bac Tiểu học phường Trảng Dài thun ini hu jaik 5.000 anek saih ngan saong 102 tal bac, lac bruk biak kan jia hu di sa sang bac pakat tiểu học. Daok meyah kuhria abih ban sit Biên Hòa, abih tih anek saih tiểu học saong trung học cơ sở lac jaik 47.000 adei, rilo jang 10.000 adei duk saong thun bac dahlau. Njauk di nyu, sa tal bac tui quy định di Mintri pato megru lac oh rilo jang 35 adei. Min di Biên Hòa, dom tal bac bhian hu labaih 50 atau labaih 60 adei jeng lac bruk bhian mboh.

Anek saih rilo yau nan, khin patrun cuang kandah ye njauk padang pabak sang bac, dut bac. Thun bac ini, ban Biên Hòa hu ngak bahrau 4 baoh sang bac hu  186 duk bac, brei ka dom xã, phường daok bac ka 3. Min dom sang bac bahrau ngak ini, jeng bahrau patrun hu hasit min, oh ka pabak ginup. Daok bruk nyim duk bac, nyim sang bac tok lac dalam sa tukvak halei min. Ong Bùi Văn Phượng, Phó akaok jabat Pato Megru ban sit Biên Hòa brei thau:” Biak di nyu, ini lac jalan ngak di anak meta. Kayua dom anek saih tagok biak samar, pabak oh ginup njauk nao nyim labik bac. Tui bruk patagok menuac sia yau ini, lac naong trak ka ban Biên Hòa. Kol dahlak daok kham merat oh caik rah tabiak bruk bac ka 3 mbiah tal thun 2020.”

Tui kuhria mboh oh ka ginup abih, tui bruk anek saih yau ini, ban Biên Hòa caong hu labaih 600 tỷ đồng, padang ngak bahrau 12 baoh sang bac bahraupiah pabak ka anek saih bac da-a. Lac sa ban hu rilo menuac nhập cư, Biên Hòa daok dang anak bruk patagok menuac sia biak samar, nan ye anek saih tame sang bac jeng rilo jang tapa yaok thun. Yaom lac oh daok bac  3 var hadei di jaik 10 thun, min bruk bac ka 3 meda rah tabiak veik kayua kurang sang bac, kurang tal bac. Anek saih tagok rilo, sang bac oh pabak ginup, bruk bac da-a oh thau yau habar meyah sang bac oh pabak ginup ka anek saih./.