Tui bruk ngak di drei, urang jakar, urang lin hu nao tal puk palei piah “4 gam”, nan lac: gam mbang, gam daok, gam ngak, gam ndom sap bangsa saong mikva puk palei piah  padang talei rohim quân dân saong khik caga yaok geng jameng  taphia negar, jalan taphia negar di taneh ia. Trung tá Hà Công Hải, Phaok akaok Đồn Biên phòng Mù Cả ndom lac: “khin ngak siam bruk di drei di labik taphia negar, brei pambak tame bhap bini. Dom urang jakar, urang lin iek đồn lac sang, taphia negar lac puk palei, bhap bini bangsa lac adei saai ralo drah nan ye nao daok jaik piah daong ka mikva”.

Đồn Biên phòng Mù Cả hu padang 2 kapul ngak bruk di palei Tó Khò, palei Phìn Khò daok atah pasak xã piah thau bruk di puk palei saong tacei pato bhap bini ngak kinh tế, yam tagok truh kan kathaot. Dom thun tapa, Đồn Biên phòng Mù Cả hu jhul khang dom bruk peih taneh bilau piah ba bhap bini nao daok jaik taphia negar, bruk ngak padai dua vụ patagok sản lượng, iek ruak saong brei jru saoh ka bhap bini. Harei lễ tết, mban chỉ huy đồn mai rivang saong alin hadaih pandap ka dom baoh sang sarak karja, anek saih yam tapa kan kandah bac daa naih joi, taduan iek glang 2 anek saih kan kathaot. Meng bruk sit tal bruk praong, tuk bhap bini caong ye dom urang lin biên phòng hu mbaok, oh huac kan kandah, abih hatai daong ba. Rilo đơn vị, baoh sang bhap bini, menuac urang  thau dhar phon dom urang lin biên phòng meng bruk likau kết nghĩa, bhian nao mai rivang gauk yau gauk gar dalam sang.  

Ong Toán Ma Tơ, Bí thư Đảng ủy xã Mù Cả brei thau: “Meng talei rohim anit ranam gauk yau ikan saong ia, dom urang lin biên phòng tuk halei jeng hu mbaok chip tuk bhap bini gaok kan kandah. Bruk salih barau di Mù Cả harei ini meng hu pren di dom urang lin biên phòng hu “4 gam” saong bhap bini”. Xã Mù Cả dahlau daih njauk yau angan ieu di nyu, hu ralo janih “oh” yau: oh hu điện, oh hu jalan, oh hu sang bac, oh hu blai y tế… luac harei ia kakua me-om pacang. Urak ini, jalan ô tô tame tal pasak xã, hu điện, hu sóng điện thoại, sang bac khang kajap, yaok thun baoh sang kan kathaot trun 10%, oh hu thei nyil njuk, jien mek tame labaih 12 triệu đồng sa urang sa thun.

Thau hu hatai anit saong pren yava di dom urang lin biên phòng, mikva dalam palei caik abih hatai ranam ka dom urang lin yau anek dalam sang. Tuk lễ tết, tuk uan sang barau, caik angan ka anek… mikva hu nao tal đơn vị daa dom urang lin biên phòng mai sang gam bui sambai. Dom mbang tuần tra jalan tapen negar di bộ đội biên phòng, bhap bini abih hatai hu mbaok tame, melam daok veik dalam glai hu mikva daa tame sang mbang ndih.

 “Tuk mikva jia, anit ranam ye kol dahlak pathau khan, jak ba sarak, hukum di Đảng saong karja ye bhap bini njauk hatai pang tui, ngak tui. Meng panuac khan di bhap bini, rilo bruk yau pablei salih saong njil ma túy, pablei menuac tapa negar, kandah gauk, mesao gauk … hu duah mboh, langyah chip, khik kajap an ninh trật tự di puk palei. Talei rohim quân dân labik taphia negar hu kak kajap meng bruk halan hatian , haok ia hauk, buh pren yava tame  “4 gam” saong mikva puk palei”, trung tá Hà Công Hải khan lac yau nan./.