Dahlau diah, kayua bhian randap tui bruk du canh, du cư nan ye mikva dua palei Cầu Gãy saong Đá Hang dalam xã Vĩnh Hải, huyện Ninh Hải, tỉnh Ninh Thuận diukrai pagam pambak tame hamu puh nan ye rai diuk biak kan kandah. Gam haong karja palei, thun 1998, Bộ đội Biên phòng Ninh Thuận hu pathau khan, jak ba mikva trun ceik daok, padang rai diuk bahrau. Meng nan tal ini, urang jakar – urang lin Bộ đội Biên phòng bhian hu mbaok di puk palei, daong ba mikva ngak mbang patagok kinh tế, dak padang rai diuk. Mbaok meta dua palei Cầu Gãy, Đá Hang meng nan bo hu salih bahrau.

Dahlau diah, sang ong Mấu Văn Lết tok thau pala tangeiy, pala padai angaok hamu puh. Min meng harei mai daok di labik bahrau, hu Bộ đội Biên phòng tacei jalan ngak mbang, abih di nyu nan lac jalan ngak phun padai aia, baoh sang ong hu ginup, meda, oh daok huac iek lipa tuk cang bilan yuak. Ong Mấu Văn Lết – Akaok palei Cầu Gãy, xã Vĩnh Hải huyện Ninh Hải lac: Dahlau diah mikva tok thau ngak hamu apuh min. Hadei ini mikva pak Thái An salih hamu ka mikva ngak padai aia. Taphia di nan, hu adei sa-ai Đồn Biên phòng tacei pato ilamu iek glang phun padai aia. Tui nan, mikva thau ngak padai, oh daok huac kurang brah mbang tra.

Dua palei Cầu Gãy saong Đá Hang dalam xã Vĩnh Hải, huyện Ninh Hải, tỉnh Ninh Thuận hu labaih 120 baoh sang ngan haong labaih 500 menuac lac urang Raglai. Atah di ini oh lavik, phun padai aia daok biak atah haong mikva Raglai pak dua palei ini. Yau nan bo urak ini, meng hu Bộ đội Biên phòng tacei pato, mikva rilo meng thau ngak padai aia. Labaih 4 ha padai aia that hijao, năng suất 60 tạ yaok ha yaok vụ kayua mikva urang Yuan palei Thái An brei veik ka mikva pala drak, dalam nan hu pren pathau khan, jak ba oh lac sit di Bộ đội Biên phòng Ninh Thuận. Mblang hamu hu ba mai ralo padai brah brei mboh talei jum pataom Yuan – Raglai adei sa-ai, daong ka rai diuk di mikva dak harei dak trei sil. Ong Mang Hàn – Akaok palei Đá Hang xã Vĩnh Hải, huyện Ninh Hải, tỉnh Ninh Thuận brei thau: Hu Đảng saong Karja sangka biak ralo. Biên phòng jeng sangka ralo. Bộ đội Biên phòng Đồn Vĩnh Hy tacei pato mikva raong glang, pala drak, pato pakai anek kamuan bac da-a, tacei pato bruk ngak ka mikva. Mikva trun pak ini urak ini hu patruh eik, patrun kathaot.

 Gah Biên phòng Vĩnh Hy daok kham merat tacei pato mikva ba ilamu  tame ngak padai aia, raong hani mek danko, raong limo menek, raong pabe palimek saong pala dom janih phun pala karei hu yaom kinh tế. Meng labik lac hu rilo sang kurang mbang dalam bilan cang yuak, tal urak ini dom sang nan hu ginup padai brah mbang dalam thun, baoh sang kathaot trun daok 40%; anek saih dom pakat tame sang bac hu 95%; jaik 100% baoh sang hu sang daning kiak saong ginup abih pandap panda piah pandar dalam sang; hu điện, hu aia hacih, jalan bê tông,.. Ong Cao Văn Đen – Bí thư chi bộ palei Cầu Gãy – Vĩnh Hải – Ninh Hải brei thau: Dut haong dahlau diah mboh rai diuk di mikva hu salih bahrau ralo gah, abih di nyu nan lac gah kinh tế. Dalam nan hu bruk sangka di dom sa-ai pak Đồn Vĩnh Hy tagok ini tacei pato mikva patagok bruk ngak mbang pala drak, raong glang cakrok kinh tế, pambuak pagam haong bruk pathau khan, pato pakai mikva  thau pan njauk tui sarak di Đảng, hukum di karja.

 “Gam mbang, gam daok, gam ngak”  – dom urang lin biên phòng đồn Vĩnh Hy hu rik daong ngak brei salih bahrau rai diuk di mikva Raglai daok pak dua palei Cầu Gãy haong Đá Hang. Bruk ngak di urang jakar, urang lin  đồn Biên phòng Vĩnh Hy padang hu hatai jia di mikva ngan haong Đảng, Karja. Thượng tá Nguyễn Vinh Dự  – Chính trị viên Đồn Biên phòng Vĩnh Hy, tỉnh Ninh Thuận lac: Dahlau di abih nan lac kham merat di pakat ủy, karja palei saong urang jakar di labik ini  gam haong mikva gam mbang, gam daok, gam ngak, gam ginum biai; ba ilamu khoa học kỹ thuật tame bruk ngak mbang pala drak, raong glang ka mikva.

Yaom lac rai diuk daok gaok ralo kan kandah, min bruk eik lipa, kathaot rambah oh daok lac bruk di mikva daok pak dua palei Đá Hang saong Cầu Gãy. Baoh tatua tual tapa craoh dalam, harei melam jeng ba takai yam di dom urang lin biên phòng mai haong puk palei, daong ka mikva dak padang rai diuk dak harei dak trei sil, haniem phol./.