Hãng kapal haok Bamboo Airways birau brei thau ba 3 jalan kapal haok par tapak tal Côn Đảo

Bier harei 10-9, Ủy ban Thường vụ Quốc Hội tui viek danak dak mbang nyaom ka 48 brei panuac ka harak pathau khan di rajaei ka bruk peih ngak sarak ka 76/2014/QH13 brei jhul khang bruk ngak brei patrun kathaot khang kajap tal thun 2020,  akaok Quốc hội Nguyễn Thị Kim Ngân ndem lac, bruk biak uan tabhuan lac sarak ka 76/2014/QH13 hu cak rok siam lagaih, bruk patrun kathaot di dom tinh, ban lac biak siam. Akaok Quốc hội jeng brei thau lac, dom jabat jaka njauk pamaong tal rilo urang hu njauk lac sang kathaot halei oh atau lac urang gaok kan kandah njauk mbang tui jien daong xã hội, kayua yau nan ye njauk pasang iek veik dom urang ni piah khik hu siam mekre harak pathau khan.

“Oh caik ka bruk urang negar langiu tame Việt Nam ngak jeng sruh jit birau” nan lac panuac di Thủ tướng Nguyễn Xuân Phúc ndom haong dom gah, dom tỉnh ban di mbang nyaom online ka bruk pacang caga ji Covid-19 page harei ini 11/9. Langiu di nan, Thủ tướng jeng tacei brei hu jalan ngak sumu piah  pasiam kinh tế, hu sarak sumu pabak caong khin di dom urang ilamu, po đầu tư tame negar Việt Nam brei ngak tani tanat min oh biak catang, oh kareik pabah mbang negar. Ong Mai Tiến Dũng – Akok mentri, Chủ nhiệm Văn phòng Chính phủ, brei thau harei 15-9 brei peih 4 jalan kapal haok pal meng Việt Nam tal Trung Quốc, Nhật Bản, Hàn Quốc, Đài Loan. Mbiah tal harei 22 bilan 9 peih  2 jalan kapal haok par veik tal Campuchia saong Lào. Hu labaih 20.000 urang tame negar Viet Nam dalam bilan 9 ini

Di mbang nyaom online di Thường trực rajaei ka bruk pacang caga jit Covid-19, dah page ni, ong Nguyễn Minh Châu, Phó akaok UB bhap bini ban raya HCM brei thau, ban raya HCM daok pasang iek hu siam bruk jit ruak Covid-19 tuk 43 harei tapa, oh hu urang halei njom bahrau dalam rahra. Urak ni, ban raya HCM daok pataom abih gah piah pataom tame cak rok patagok kinh tế, patagok bruk peih brei mesraiy, peih ngak paok jien daong ka 2 ka doanh nghiệp gaok kan kandah kayua Covid-19, pasang iek brei jaik 7.000 chuyên gia negar langiu, urang ngak bruk hu  ilamo glaong tame ban raya piah ngak bruk.

Hãng kapal haok Bamboo Airways birau brei thau ba 3 jalan kapal haok par tapak tal Côn Đảo, lac jalan par meng  Hà Nội - Côn Đảo; Vinh - Côn Đảo; Hải Phòng - Côn Đảo meng bilan 10 thun 2020. Camereip, jalan par meng Hà Nội - Côn Đảo brei par dua mbang sa harei, jalan par meng Vinh saong Hải Phòng nao Côn Đảo peih sa mbang par dalam sa harei. Piah par dom jalan par nan, Hãng kapal haok Bamboo Airways, pandar pal haok sit Embraer E195 mbang camereip hu pandar di Việt Nam, pajeng 124 urang tuai. Hãng pablei vé ka dom jaln par nan meng harei 10 bilan 9.

Pambuak tal bruk rilo uranaih di baha Kỳ Quang 2 njauk tame sang iek ruak piah taong ruak tui saneng lac njauk jru mek pandap mbang, dah page ni 11/9, dom bác sỹ sang iek ruak Nhi đồng 1 ban raya Hồ Chí Minh hu brei ka 20 ranaih tabiak truh sang iek ruak, prien yava di 6 ranaih daok viek daok hu tani tanat. Dahlau nan, dalam bier harei saong melam 10/9, sang iek ruak Nhi đồng 1 hu taduan 26 uranaih meng baha Kỳ Quang 2 tame cấp cứu dalam tuk mboh ndok aok, pandiak tung. Tui panuac khan meng baha, krieh pandiak 10/9, dom ranaih hu huak lasei saong ralaow ngak haong baoh saong ia bhai baoh kadaoh, ralaow kho haong baoh hu ngak meng dahlau nan sa harei saong truon tagok pui piahharei hadei mbang. Hadei var mbang dom maong, rilo ranaih mboh ghieh glar, pandik tung, ndok aok saong hu ba tame sang iek ruak piah taong ruak. Baha Kỳ Quang 2 (quận Gò Vấp, Thành phố Hồ Chí Minh) lac labik raong yaok rituh ranaih joh jo, oh hu sang danaok meng rilo thun tapa.

Dom mbang ribuk khang  dalam dom adit jaik di ini di dom taneh ia gah Pei saong Trung Phi ngak kan kandah tal raidiuk di labaih 760.000 bhap bini. Tui kuhria mboh birau abih meng Jabat Điều phối dom bruk ngak pahala di Liên hợp quốc, Burkina Faso, Cameroon, Chad, Ghana, Niger, Mali, Nigeria, CHDC Congo saong Senegal lac dom taneh ia gaok kan kandah trak abih kayua dom mbang ribuk dalam thun ini, ngak takik abih 111 urang metai. Dom urang ilmu  y tế kakei dahlau jit ruak meda tamuh hadei di tuk  ribuk ngak kurang ia hacih saong nerak tachrauk.

Urang jaka ngak praong di CHDC Congo brei thau 58 bhap bini metai dalam mbang pmaetai manuac bahrau abih di tỉnh Ituri, gah Đông Bắc negar ni. Tui nan hu 23 urang metai dalam mbang pametai manuac di harei 8/9 saong 35 urang metai harei 10/9 di labik Irumu gah maraong di tỉnh.Urak ni 17 urang jeng daok lahik meda lac njauk cap khik. Tỉnh Ituri lac labik bhian rahtabiak dom mbang pametai bhap bini di labik gah barak di bhum taneh Djugu. Sa kapul jaka pakat glaong meda nao tal Ituri harei ni piah langyah dom bruk pambuak tal an ninh.

Tổng thống Mỹ Đô-nan Trăm birau brei dui atah tukvak pakauk bruk pablai salih saong Cuba sa thun tra, mbiah tal harei 14/09/2021. Mỹ pakauk bruk pablei salih saong Cuba di thun 1962 hadei di bruk Cách mạng Cuba pajaleih karja độc tài Ba-tít-xta hu Oa-sinh-tơn daong gah likuh. Thun 2015, Tổng thống Mỹ dahlau diah lac Ba-rắc Ô-ba-ma tabiak panuac pambuak veik talei rohim saong taneh ia Cuba saong peih veik đại sứ quán di dua taneh ia. Rajaei di ong Ô-ba-ma jeng hu brei cadu bruk pakauk pablei salih saong atah klak dom bruk oh lagaih gah dulich, payua jien…Yau nan min, hadei di tuk tagok pan akaok negar meng harei 20/1/2017,  Tổng thống Đô-nan Trăm khan lac rajaei di ong pasang iek veik dom sarak di rajaei dahlau  ngan saong Cuba./. 

Urang lang: Ái Nghiêm – Thu Thảo – 11/09 16:28:56