Rayo sap ndom Việt Nam song Hiệp hội Du lịch tỉnh Quảng Nam pambuak bruk peih parang me-in danak dak “Hội An Show”

Bier harei 28/3, nyaom biai tapa jalan online pakat negar roh duah, bac magru, brei thau cambaih sarak nyaom roya mbang ka 13 di Đảng hu tamat dalam siam mekre hadei di 2 harei ngak bruk. Nyaom biai hu papar tapak meng Trung ương di bilik ginum biai Diên Hồng, sang Quốc hội tal 67 labik di dom tỉnh ủy, thành ủy, đảng ủy di Trung ương saong peih praong tal labaih 7 ribau 400 labik di dom tinh, ban. Bí thư Trung ương Đảng, akaok mBan Tuyên giáo Trung ương Nguyễn Trọng Nghĩa brei thau, meng labaih 7 ribau 400 labik di dom tinh, bal, hu jaik 1 triệu urang đảng dalam negar hu thau cambaih, hu bac magru sarak ngan haong hatai biak samar drak. Yau nan ye, khol drei hu khan brei thau cambaih saong peih ngak catang meng akaok sarak nyaom roya mbang ka 13 di Đảng hu brei thau cambaih lac njauk pandar khoa học công nghệ tame bruk pato magru saong pathau khan.

Melam kabroi (28/3), di ban klaak Hội An, UBND ban Hội An, Rayo sap ndom Việt Nam song Hiệp hội Du lịch tỉnh Quảng Nam pambuak bruk peih parang me-in danak dak “Hội An Show”. Labaih 150 urang daoh tamia song bhap bini di Kapul daoh tamia bhap bini Chăm Ninh Thuận, urang daoh tamia negar langiu hu mbaok tame ngak dom urang pablei salih, tuai rivang main song bhap bini hu mbaok tame danak dak . “Hội An Show” lac dalikan brei mboh veik meneing bruk pablei salih di pabah lamnge Hội An meng kan, padang veik dalikan ka chùa Cầu. Danak dak dok hu ndom tal dalikan ka bruk ngak lan, asar di sa bhum taneh Hội An tapa bruk padang ngak bahrau ka tamia Chăm, kadha doh chòi…
Patui bruk duah talang liệt sỹ di labik glai cao su di puk Măng Cải, xã Lộc Thiện, huyện Lộc Ninh, meng bier harei 27 tal puac harei 28/3, kapul pataom talang liệt sỹ (kapul K72), Bộ Chỉ huy Quân sự tỉnh Bình Phước hu duah mboh veik 8 bộ talang liệt sỹ. Tui nan,dalam tuk kuac dauh, kapul K72 duah mboh hu 4 liệt sỹ hu dar karei tui yaok kubo saong sa kubo dar pataom gauk hu 4 talang liệt sỹ gam haong dom drap ar di liệt sỹ yau ye: dép cao su, cing aw, baoh patuh, rilo dang talei điện, sa baoh đồng hồ cuk tangin talei kalik. Yau nan, meng akaok bilan 3/2021 tal urak ni, kapul K72 hu duah mboh saong pataom hu 22 bộ talang liệt sỹ di puk Măng Cải, xã Lộc Thiện, huyện Lộc Ninh. Tui duah thau, talang di 22 liệt sỹ hu duah mboh di puk Măng Cải meda lac di Sư đoàn 7, Quân đoàn 4, metai di thun 1967. Kapul caong khin dom urang bhian hu mbaok tame bruk mesuk metak di labik nan pabak khau tin piah thau cambaih angan di dom talang.

Ong Huỳnh Quang Hưng, Akaok Ubbhap bini ban Phú Quốc (tỉnh Kiên Giang), brei thau , pagam tal bruk 10 urang tame VN suan hukum tui jalan tasik meng Campuchia di harei 22/3 (dalam nan hu 3 urang dương tính song SARS-CoV-2) urak ni duah thau hu 9 urang, dalam nan: 5 urang meng Phú Quốc mai TP.HCM, 2 urang tal Hải Phòng, 1 urang tal Hà Nội song 1 urang tal Gia Lai.Dok veik 1 urang, Jabat chức năng dok samar pasang iek dom camera duah thau di labik phường An Thới song dom mblang kapan gaiy, mblang kapan haoh piah duah... Karja ban palao kaoh ni hu panuac ieu bhap bini paglong hatai pambuak bruk song jabat y tế jiak di abih piah nyaih bruk oh siam.

Jabat cảnh sát khik iek gah trật tự xã hội Công an ban raya HCM (PC06) meda padeih taduan harak likau ngak CCCD di jabat meng haerei ni 29/3 piah daong prein ka Công an ban Thủ Đức saong quận, huyện. Tui nan, Công an TP.HCM meda peih bruk ngak CCCD pagam chip ka bhap bini tal yaok labik daok di bhap bini (tổ dân phố, khu phố). Bhap bini caong ngak bahrau, salih, ngak veik CCCD pagam chip ye nao tal Công an ban Thủ Đức saong công an 21 quận, huyện labik bhap bini tut angan hộ khẩu daok piah taduan harak gar.

Karja bang Queensland di Australia bahrau tabiak bruk lac meng beir harei ni brei pacang cakak pasak di bang ni lac ban Brít-xbần song dom labik jiak tapen dalam 3 harei. Bruk ni hu batabiak hadei di tuk hu 4 urang njom Covid-19 bahrau dalam bhap bini hu anek ruak meng negar Anh. Abih menuac sia tok hu tabiak truh sang ngan song 4 makna lac blei pandap mbang, pasram rup pabhap, ngak bruk, iek glang y tế.Meng harei page, lingiu dom labik khik iek uraniah dom sang bac mẫu giáo, dom sang bac di labik ni brei kreih pabah mbang. 

Dah page ni (tui maong pak ni), sa bala pui khuah praong rahtabiak di sang mac halang manjek Balongan kayua công ty manjek quốc doanh PT Pertamina di Indonesia pan akaok. Sang mac halang manjek ni atah ban ine Jakarta labaih 200 km gah timur. Sa sap patuh praong hu mahit dahlau di tuk labik ni khuah apui biak praong. Tui dom urang maong mboh, pui khuah meda maong mboh hu tuk daok atah labaih 5 km. Urak ni, urang lambaok Cty PT Pertamina ka oh ba tabiak panuac hagait ka bala ni. Jeng ka oh thau cambaih makna ba tal pui khuah.

Urang brei panuac ka gah quốc phòng song an ninh Omar Saranga harei kabroi (28/3) brei thau, hu yaok pluh urang metai dalam mbang tong tame bak drah rah tabiak di ban Palma adit bloh. Gah “thánh chiến” hu peih sa mbang tong khang tame ban sit tapen tasik meng beir harei 24/3 meng bloh.Tui gah pasang iek nhân quyền, khol taong tame nan hu pagam tal nyaom Al-Shabab di pak ni. Ni lac nyaom hu rilo mbang taong tame dalam 3 thun tapa di tỉnh Cabo Delgado, labik hu rilo khí đốt tự nhiên di Mô-dăm-bích./.

Urang lang: Thu Thảo – Hani Pha – 29/03 10:49:09