Tui Chi cục khik ramik môi trường - Sở TN-MT tỉnh Đồng Nai, ia di danao Trị An oh ginup tanut brei adat

Bier harei 5/4, Quốc hội hu buh phiếu kandauk, njauk gauk pok ong Phạm Minh Chính, Ủy viên Mintri Chính trị, akaok mBan Tổ chức Trung ương, tagok ngak Thủ tướng rajaei. Thủ tướng rajaei bahrau tuyên thệ sa hatung hatai haong taneh ia, haong bhap bini, haong sarak tui adat tuk taduan bruk ngak anak Quốc hội. Ong Phạm Minh Chính ndik tapui thun 1958. Daok di xã Hoa Lộc, huyện Hậu Lộc, tỉnh Thanh Hoá; Ủy viên Mintri Chính trị mbang XII, XIII; Bí thư Trung ương Đảng mbang XII; Ủy viên Ban Chấp hành Trung ương Đảng mbang XI, XII, XIII; Urang lambuak Quốc hội mbang XIV.

Harei 5/4, lambaok Cục pajeng ba jalan kapal haoh VN (mintri jalan mbak pajeng ba) brei thau hu panuac ieu dom hãng kapan haoh peih ngak siam bruk tacei ba tuai pathau khan y tế điện tử tuk ngak harak gar tapa jalan online. Meyah brei tuai oh ka pathau khan y tế tagok kapan haoh, dom hãng kapan haoh lac ngak suan adat hukum. Dom hãng kapan haoh brei hu menuac pak di labik check-in piah dong song tacei pato tuai pathau khan y tế.

Harei ini, Vụ Tổ chức urang jakar - Mentri Y tế brei panuac ka ong Vương Văn Tịnh, Yam ndoc Sang iek ruak Tâm thần Trung ương 1 vak harak kiểm điểm bruk ngak di drei tuk caik rah tabiak bruk ngak suan hukum di sang iek ruak, payua mai Mentri dahlau harei 7/4. Dahlau di nan, Công an Ban Hà Nội pasang iek drah samar labik taong ruak di urang ruak Nguyễn Xuân Quý di Sang iek ruak Tâm thần Trung ương 1; chap mek jaik 2,8 kg matuy; labaih 1,6 kg Ketamin; 569g Methamphetamin. Pambuak tal bruk nan, Công an Ban Hà Nội brei ba tabiak kaoh 5 urang ngak suan hukum.

Tui Chi cục khik ramik môi trường - Sở TN-MT tỉnh Đồng Nai, ia di danao Trị An oh ginup tanut brei adat. Labik gah angaok danao Trị An song tatua La Ngà, dom janih hữu cơ, dinh dưỡng song anek ruak dalam ia yam tapa tanut brei adat; chraoh Gia Tân njauk nerak song ka oh pasiam veik. Makna nerak lac kayua ia tathuak meng bruk rong glang song pandar ia meng dom labik dok. Danao Trị An hu makna prong dalam bruk pabak ia pandar ka yaok triệu bhap bini gah ala krong, dalam nan hu ban raya HCM.

Jala pandiak harei ini 5/4, sa bala rah tabiak di jalan radaih pui tapa HiệP Bình Chánh, Ban Thủ Đức, Ban raya HCM ngak ka sa urang kumei umo labaih 50 thun njauk radaih lik klaik dua gah takai, tuk muk nao tapa jalan radaih pui. Urang njauk bala nan hu dom urang y tế daong iek ruak saong ba tame sang iek ruak dalam tuk jaik si metai. Hadei tuk rah tabiak bala, radaih pui padeih labaih 25 minit saong peih nduac veik hadei tuk labik nan hu ramik. Urang jakar Ban Thủ Đức daok pasang iek ngak brei cambaic laic.

Lin tasik Mỹ, Úc, Japon, Ấn Độ song Prang daok peih bruk pasram 3 harei angaok vịnh Bengal meng harei 5/4. Ni lac mbang camereip Prang hu mbaok tame pasram song kapul Tứ giác kim cương (QUAD) pak di labik pabah mbang tame tabiak Biển Đông. Harak mbao Nikkei Asia di Japon ndom lac panuac ba tabiak tapa bruk pasram ni biak cambaih laih: Prang song nyaom QUAD khin patagok bruk pambuak gauk gah pajeng ba jalan tasik song payua panuac cảnh báo Trung Quốc.

Bruk taduan vắc-xin dunya (COVAX) caong lac dom taneh ia hu brei klauk jru vaccine pacang Covid-19 meda tagok, meng 84 tagok labaih 100 dalm dom adit anak tal. Ini lac panuac di Gah Y tế dunya dalam tuk kurang vaccine jeng yau bruk takik taduan hu jru daok ngak brei kan kandah tal dom bruk kham merat brei klauk jru di dunya. COVAX nan lac danak klauk jru caga ruak di dunya praong abih kuhria meng lavik mai hu pambuak harak blei labaih 2 tỷ mbang jru. Yau nan min, jaik abih tok pabak hu di puac thun ini.

Anek saih song gru pato di 70 sang bac tiểu học song trung học cơ sở di ban Kha-ba-rốp-xcơ (Khabarovsk) dalam bhum Viễn Đông di Nga harei kabroi njauk panduan nao labik karei chip kayua taduan hu panuac khan lac tong bom tame. Khaw tin Nga harei ni (5/4) brei thau, hu labaih 65 ribau anek saih hu ba tal dom labik pato pakai jiak tapen atau hu brei nao sang. Urak ni jabat chức năng dok peih bruk pasang irk piah duah tabiak janih patuh./.

Urang lang: Ái Nghiêm – Hani Pha – 05/04 16:56:02