Rilo tỉnh ban hu peih bruk Hiệp thương pak di labik 

Harei 15/4, di jabat rajaei, Thủ tướng Phạm Minh Chính dang akaok mbang nyaom rajaei piah ba tabiak bruk di rajaei dalam vaktu atal tal. Ini lac mbang nyaom rajaei camereip abih hadei di tuk rajaei hu ramik veik di mbang nyaom ka 11, QH mbang XIV. Di mbang nyaom, dom urang dalam rajaei hu ginum biai ka danak dak bruk ngak di rajaei peih bruk ngak tui sarak nyaom roya  Đảng mbang XIII; Sarak ngak bruk di rajaei, peih brei phun jien di karja piah padang ngak, pacang caga jit COVID-19 saong klauk vaccine; bruk duh ka mbang pilih ruah urang ka QH mbang XV saong urang ka HĐ bhap bini dom pakat vaktu 2021-2026; bruk peih mbang pakacah trung học phổ thông pakat negar thun 2021. Ndom rilo tal bruk paglaong trách nhiệm, khin sahneng, khin ngak, taduan suan njauk bruk ngak di drei, Thủ tướng Phạm Minh Chính ieu dom mintri, dom gah njauk pataom tame bruk ngak, oh njaik plaih bruk.

Bier harei kabroi 15/4, UBMT negar Việt Nam tỉnh Ninh Thuận peih mbang ginum biai Hiệp thương mbang ka 3 piah njauk gauk ba tabiak angan dom urang piah pilih ruah ka Quốc hội mbang XV saong urang ka HĐ bhap bini tỉnh tukvak 2021-2026. Dom urang dalam nyaom biai njauk gauk ka dom menuac hu tabiak mbaok piah pilih ruah ka Quốc hội mbang XV tỉnh Ninh Thuận lac 10 urang dom urang QH hu pilih ruah lac 6 (trun 2 urang dut saong Hiệp thương mbang ka dua). Dalam dom urang tabiak mbaok piah palih ka Quốc hội hu 3 urang lac bangsa takik; 4 urang lac urang lambuak ka dom tinh, bal hu tabiak veik.

Biar harei 15-4, UBMT negar VN ban sit Cần Thơ peih nyaom biai hiệp thương mbang ka 3 piah pilih ruah, padang angan dom menuac piah pilh ruah ka QH kayua ban sit Cần Thơ yaih khan. Di nyaom biai nan, hu 4 urang likau suak angan tabiak. Ong Phạm Văn Hiểu, akaok Hội đồng bầu cử TP Cần Thơ, brei thau, duk saong angan  di nyaom biai hiệp thương mbang ka 2 (15 urang), lingiu 4 urang likau suak angan yau khan blaoh nan, daok hu 1 urang oh hu bruk pachreih tui di menuac urang labik  urang nan daok. Jeng dalam biar harei, urang hu njauk gauk ka bruk pilih ruah, padang angan 87 urang tabiak mbaok piah pilih ka HĐND TP Cần Thơ vaktu 2021-2026.

Tui pathau khan chỉ số prein khang meriak gauk pakat tỉnh PCI thun 2020 di jabat pablei salih Việt Nam bahrau brei thau, 4 dalam 5 tỉnh Tây Nguyên hu trun điểm số dut saong thun 2019. 3 tỉnh Tây Nguyên dalam kapul mbaih di thun 2019, hu 2 tỉnh laik tame kapul trung bình. 3 tỉnh Tây Nguyên hu taong abih điểm số prein maraik gauk glaong, di kapul mbaih thun 2019 lac Lâm Đồng, Gia Lai saong Đăk Lăk, ye thun ni, njauk hu Lâm Đồng daok veik dalam kapul ni, yaom lac trun 1,8 điểm. Đăk Lăk saong Gia Lai laih trun kapul trung bình.

Sang iek ruak Chợ Rẫy brei thau, urang ruak Phan Hữu Ng. (37 thun, daok di tỉnh Vĩnh Long) hu tabiak truh sang iek ruak hadei di 11 thun tame sang iek ruak saong tapa 26 mbang blac raih kayua ruak Hemophilia A (sarau kadau khal darah). Dalam tuk iek ruak, urang ruak hu BHYT biyar jien tal 38 tỉ 300 triệu đồng. Ini lac urang ruak hu kadung jien BHYT bayar yaom jien praong abih kuhria meng dahlau mai di TPHCM, tapa nan brei mboh bruk siam lagaih di BH, khik caga quyền lợi glaong di abih ka urang ruak..

Harei 15/4, negar France hu jeng negar ka klau di châu Âu saong ka 7 di dunya yam tagok tanut biak pandiak harao lac hu labaih 100 ribau urang metai kayua Covid-19. Min, tanut ni hu negar France yam tapa meng rilo adit dahlau. Tui roh duah bahrau hu brei thau di Viện Y tế saong roh duah y khoa negar France, pamaong tame di dom harak chứng tử hu pabak, negar France yam tapa tanut 100 ribau urang metai kayua Covid-19 meng rilo adit dahlau.

Harei 15-4, Mintri Y tế Campuchia brei thau taneh ia ini hu gac 344 urang njom, tui nan abih tih urang ruak COVID-19 tagok tal 5.218. Phnom Penh lac labik hu menuac njom bahrau rilo abih, lac 243 urang. Báo Phnom Penh Post vak lac dom urang njom lac biak njauk duh hatai. Thủ tướng Hun Sen hu tagok rayo papar binguk Campuchia ndom lac: "Kol drei daok di kreh jalan metai atau diuk. Meyah kol drei oh ba tangin tame haong gauk, kol drei meda ginuh tame bruk metai lahik biak biai”….

Tổng thống Mỹ Giâu Bai-đừn harei kabroi brei thau, Mỹ saong Nga jeng daok hu jalan piah pambuak bruk haong gauk, min Mỹ jeng daok khik caga kein laba saong halain hatain cagar veik dom bruk ngak di Nga. Panuac di Tổng thống Mỹ hu ba tabiak hadei di tuk negar ni brei thau lac ba tabiak ngak dom jalan taong phat pamaong tame Nga, dalam nan hu gam bruk patakik di kinh tế saong pataut 10 urang ngoại giao negar ni haong dom panuac lac ba tangin tame bruk bầu cử di Mỹ saong taong tame mạng. Meng di tuk nan, Nga hu ieu pataom urang lambuak Mỹ piah cagar veik bruk ngak ni. Điện Kremlin jeng khan brei thau, yaok jalan ngak taong phat di Mỹ taong tame Nga jeng lac suan adat hukum, saong Nga meda hu jalan taong biyar veik dalam tukvak aval di abih./.

Urang lang: Thu Thảo -Mousaphuong- 16/4