Phaok thủ tướng Vũ Đức Đam tame dom siêu thị kakei urang pablei  biak tani tanat 

Bier harei kabroi 4/2, di jabat rajaei, Phó Thủ tướng Vũ Đức Đam, akaok mban pato tacei pakat negar pacang caga jit COVID-19 ginum biai online haong Mintri Y tế saong tỉnh Gia Lai ka bruk pacang caga jit dalam tukvak urak ni. Tal harei ni, Gia Lai hu abih tih 18 urang, langiu di nan, 5 urang medil lac njom COVID-19, daok hu tui iek prein yava saong dut iek veik, abih dom urang F0 jeng pambuak tal 2 sruh jit di  Cheo Reo saong xã Ia Trôk (huyện Ia Pa). Brei thau di mbang ginum biai, Phó Thủ tướng Vũ Đức Đam ndem lac: bruk jit ruak di Hải Dương, Quảng Ninh, Hà Nội, tal urak ni, hu pacang cakak. Di Gia Lai, bruk paglaong dut iek saong taong ruak, piah caga oh njauk lac ka tỉnh bo daok caga ka dom tỉnh di gah Tây Nguyên dalam bruk pacang caga jit COVID-19. Meng kham marat di pak ni, caong lac tal dahlau di Tết, bhap bini meda hu rok Tết siam makre, saron mbon.

Meng sa urang khan gah y tế oh njauk ba tal rilo urang gah y tế di Sang iek ruak Nhi đồng 1 njauk brei daok karei, Sở Y tế Ban raya HCM iew bhap bini njauk ndem tapak hatai dalam tuk brei thau y tế tuk tame iek ruak di dom labik  y tế. Tui nan, Sở Y tế Ban raya HCM tacei pato dom labik iek ruak peih ngak catang bruk khan brei thau y tế ngan saong taong abih bhap bini tuk nao tal la bik y tế.

Bier harei kabroi (4/2), Phó Thủ tướng Trương Hòa Bình hu nao raivang, alin labaih 500 paok pandap Tết ka bhap bini Cam saong dom baoh sang kan kandah di ban raya HCM. Phó Thủ tướng Trương Hoà Bình payua panuac tadhau yuh bhap bini Cam rok Tết biak bui sambai, haniem phol, jak ba bhap bini kham marat piah yam tagok dom kan kandah di dalam raidiuk, rik tame bruk padang taneh ia siam makre, khang kajap. Ni lac bruk ngak yaok thun brei mboh bruk sangka di Đảng, kanja, dom doanh nghiệp saong dom urang ngak pahla ngan haong bhap bini Cam. Phó Thủ tướng Trương Hòa Bình jeng brei thau, dalam thun 2021 ni meda padang sa kadung jien bac daong ka anek kamuan bhap bini Cam yam tapa kan kandah bac da-a naih joi.

Tết thun ini, QK 5 palih ruah huyện Bác Aí, tỉnh Ninh Thuận piah peih ngak harei pataom “ Xuân khu 5 jum pataom - Tết bak hatai anit ranam bol lin haong rahra” piah brei mboh bruk hadar dhar phol saong thau en ngai di urang jakar, urang bol lin gah QK5 tal bhum taneh anh hùng, bhum taneh ngan saong rilo bruk jak yah hadah mbaok metam, jum pataom, anit ranam, kham merat yam tapa dom kan kandah, glaih glar saong var klak rup drei brei ka taneh ia di  bhap bini Raglai, K’ho, Chu Ru…Bhum taneh ini ndih tapui tyabiak dom urang jak gheih hu  tame dalam sajarah dakrai bol lin Việt Nam, yau dom anh hùng tapon nyaom bol pan phao karaong Pi năng Tắc, Pi năng Thạnh, Chamaléa Châu... 

Maong 1 jala pandiak harei 4/2 di sa sang trọ angaok jalan 73 phố Tam Khương, phường Khương Thượng, quận Đống Đa, Hà Nội hu pui khuah ngak ka 4 urang likei dam metai. 5  sinh viên đại học peih bruk kakuk b apataok Ging tagok langik, hadei di tuk kakuk blaoh hu cuh ba-ar vàng mã anak pabah pambang bilik trọ. Hadei di nan, abih dom urảng nan tame huak lasei blaoh nao ndih, oh tuh ia padam pui jang yau kuac bau. Yaom lac dom urang jaka saong bhap bini kham marat padam pui, daong duah, min pui khuah ngak ka 4 urang metai. Manka camriep abih brei thau lac kayua mebuk thak, khí độc. Bruk pandik harao ni sa mbang tra brei mboh bruk mbuan khuah sang tuk cuh gilau, vàng mã dalam tuk Tết.

Costa Rica harei kabroi (04/2) chap khik 2 tấn matuy hu padauk dalam sa công-ten-nơ (Container) piah pajeng ba tapa Bỉ pablei. Mentri Nội vụ Costa Rica brei thau, matuy hu jaik katin jeng 2000 paok cocaine, yaok paok tral labaih 1kg saong hu pandauk dalam sa di dom công-ten-nơ pajeng baoh menaih di labik  tapen gilai Moanh (Moin), gah Tinur taneh ia ini. Tui cảnh sát pacang caga matuy di Costa Rica, sa dalam dom jalan pablei salih kanduak, pajeng ba matuy bhian hu dom kapol tội phạm pandar lac padauk tui jalan pajeng ba baoh kayau tapa jalan tasik.

Cao ủy Liên hợp quốc ka urang tị nạn (UNHCR) brei thau, labaih 400 urang nduac klaak negar hu daong sraong di langiu tasik Li-bi (Libya). Dom urang nan hu dua sruh gilai di Li-bi  ba mai ban ine Tripoli. Meng di thun 2011 tuk urang par akaok dahlau dieh Muammar Gaddafi njauk pajaleih, yaok ribau urang châu Phi pilih ruah yam tagok Địa Trung Hải meng Li-bi piah tame châu Âu suan hukum piah plaik bruk  sarau kadhau di negar Bắc Phi.Tui yaok pataom di gah Di cư dunya, thun 2020 labaih 300 urang nduac klaak negar metai saong labaih 400 urang karei lahik, jaik 12 ribau urang nduac klaak negar hu daong ba mai veik Li-bi.

Dalam panuac brei thau harei 04/02 ngan saong bruk njauk gauk di 15 urang, Hội đồng bảo an Liên hợp quốc kakei lac njauk brei khik dom jalan ngak  brei yam tal dân chủ, takik taong paoh gauk saong eik praong quyền tự do saong hukum di Myarma. Panuac nan  jeng hu iew brei palao muk Ang Xang-xu-chi (Aung San Suu Kyi) saong dom urang jakar kayua bol lin Myanmar chap mek tui nan brei mboh bruk haduh hatai brei ngak samar di taneh ia ini. Hội đồng bảo an jeng kakei brei ndem menyai saong ba siam tui hatai caong khin saong kein laba di bhap bini Myarma./.

Urang lang Thu Thảo -Ái Nghiêm -5/2