Mik va bangsa takik hu iek ruak pak di labik 

Tui panuac khan di bhap bini daok di xã Vĩnh Gia, xã Lạc Quới, huyện Tri Tôn saong dom xã jaik taphia dalam huyện Giang Thành, tỉnh Kiên Giang, meng tuk hu bilai iek ruak quân dân y pambuak gauk di Vĩnh Gia, mikva dalam bhum oh daok glaih glar nao atah tal pasak huyện piah iek ruak yau dahlau, abih takik jien ndo jang ka bruk iek ruak. Ong Đặng Văn Thanh, daok di xã Vĩnh Phú, huyện Giang Thành, lac urang bhian tapa bilai ini piah iek ruak, khan lac: Meng sang nao tal bilai y tế xã atah lô nan ye bhian tapa ini piah iek ruak. Oh lac tuk ruak trak, bo tuk mboh rup pabhap glaih glar, having akaok…ong jeng tapa ini piah hu dom bác sĩ iek ruak saong tame ia brei. Bác sĩ di pak ini biak siam hatai haong bhap bini saong iek glang abih hatai, iek ruak pak ini biak lagaih saong abih takik jien ndo:

Hu bilai iek ruak ini biak lagaih saong patuah ka mikva. Tabiak ini dom sa-ai biên phòng biak rap ar saong bui sambai. Dahlak hu ruak hagait ye dahlak tabiak ini, lavik nao jeng randap, bác sỹ Dũng iek ruak biak gheih, biak bui sambai nan ye dahlak biak takre”.

Đại úy Trịnh Đức Hiếu, Phó đồn trưởng, Đồn Biên phòng Vĩnh Gia brei thau, xã Vĩnh Gia saong xã Lạc Quới, lac 1 dalam dom xã biên giới kan kathaot di abih dalam huyện Tri Tôn, jeng lac xã jaik tapen huyện Kiri Vong, tỉnh Tà Keo, negar Campuchia. Bhap bini dalam xã rilo meng ngak hamu, nan ye raidiuk oh lac kan kandah gah kinh tế, bo daok kan kandah gam gah iek glang prein yava kayua  dahlau daih oh ka hu bilai iek ruak xã. Lingiu di nan, meng pasak xã tal sang iek ruak huyện biak atah, jaik 50km, nan ye, tuk ruak kik, bhap bini tok pasiam ruak meng hala kayau, iek ruak tui ilamu meng kan, tuk ruak trak meng ba tagok sang iek ruak huyện. Mboh hu kan kandah di mikva, BĐBP An Giang hu jak ba phun jien meng dom doanh nghiệp padang ngak bilai iek ruak saong yaom jien ngak abih labaih 500 triệu đồng. Bilai iek ruak hu 6 papan ndih iek ruak haong dom thiết bị y tế piah iek ruak, hu peih tabiak iek ruak meng bilan 9/2009. Bilai oh lac iek glang prein yava ka bhap bini bhumn tapen negar saong ka bộ đội, bo daok iek ruak ka bhap bini haong urang jakar dalam bhum tapen negar taneh ia Campuchia. Đại úy, Trịnh Đức Hiếu daok brei thau lac:

 “Meda lac bhap bini dalam xã, dalam huyên Giang Thành, di labik jaik taphia jeng bhian tapa Bilai iek ruak quân dân y di đồn piah iek ruak. Jalan ngak di Bộ chỉ huy haong Ban chỉ huy đồn lac daong ka bhap bini, dom urang kan kandah ye iek ruak brei saoh; daok menuac hu jien ye mek jien jru min.”. 

Njom tame dalam hatai panuac pato di Chủ tịch Hồ Chí Minh “Thầy thuốc như mẹ hiền”, meng trách nhiệm di urang lin, meng abih hatai jai haong bruk ngak, dom bác sĩ, y tá cuk quân hàm hijao di bilai lac menuac piah ka dom urang ruak caik hatai jia. Angan siam dane atah, urak ini bilai iek ruak quân dân y pambuak gauk di xã Vĩnh Gia hu jeng labik caik hatai jia di urang ruak kan kathaot di bhum tapen negar ini. Tui kuhria yaok thun, bilai hu iek ruak brei ka jaik 9.000 mbang urang ruak. Di tuk puac thun, yaok harei hu meng 50-70 mbang urang ruak meng dom xã jaik taphia negar di huyện Kiri Vong, Campuchia tapa iek ruak. Abih di nyu nan lac, hu dom urang ruak sang kan kandah, ruak trak, hu ba tagok sang iek ruak praong, tuk ruak cadu ye likau mai iek ruak di bilai. Kayua yau nan ye, tuk halei bilai jeng quá tải.

Thiếu tá, Bác sỹ Phạm Văn Dũng, dang akaok bilai iek ruak quân dân y pambuak gauk di xã Vĩnh Gia brei thau, yaok harei lingiu di bruk iek ruak, brei jru ka mikva, urang jakar y tế di bilai daok hu pathau khan ka bruk ndih tapui anek tui sarak karja, iek glang prein yava urang amaik, uraniah saong padang kalup kapul oh ndih tapui anek ka 3, jak ba bhap bini padang labiik daok siam mekre, mbang, ndih haci hacih, tuk ruakkik njauk nao tal bilai y tế piah ka dom bác sĩ iek glang, pasiam ruak... Tapa nan, hatai sahneng di bhap bini dak harei dak glaong. Min urak ini, bruk iek ruak ka bhap bini jeng gaok oh takik kan kandah, kayua kurang menuac, labik iek ruak daok sit sot saong kurang rilo janih. Thiếu tá, Bác sỹ Phạm Văn Dũng daok brei thau lac:

“Drei duh ka mikva nan ye mikva anit drei, hu tuk mikva nao blei jru menyum jeng vaih tame blei. Jeng hu urang gaok bala tuk ngak bruk, gaok bala tuk nao angaok jalan, mai tal drei ye drei sơ cứu tuk camereip, kayua dom bala nan brei hu xét nghiệm, chụp hình…, drei oh ginup pandap piah ngak, habar ngak hu. Dahlak jeng caong hu máy siêu âm piah duh ka mikva”

Meng trách nhiệm di urang lin, meng abih hatai haong bruk ngak, dom bác sĩ, y tá tual quân hàm hijao di Bilai iek ruak quân dân y pambuak gauk di xã Vĩnh Gia tuk halei jeng iek glang prein yava ka bhap bini oh lac di bhum tapen negar huyện Tri Tôn, bo daok hu bhap bini di huyện Kiri Vong, Campuchia, rik daong kak kajap talei jum pataom di bhap bini 2 taneh ia, khik kajap biên giới hòa bình, hữu nghị./.

Urang lang: Mousaphuong -27/2