Rilo anek di grauk labik dalam negar taduan hu kadung jien 

Bilan 3 ini, lac tukvak kadung jien bac Vừ A Dính ginup 22 thun. Meng hatai caong lac yaok paok jien bac hu brei nao, atau sa danak dak hu peih ngak, lac hu sa hatai caong hu pambuak seok par atah, Kadung jien hu ieu pataom, jak ba menuac sia daong brei jaik 400 tỷ đồng meng jaik 5.000 mbang daong brei. Tal urak ini, kadung jien hu alin jaik 90 rabau pok jien bac yaok thun ka anek saih SV di 54 bangsa adei sa-ai, dalam nan hu gam anek saih Việt Nam daok di Campuchia, Lào, Thái Lan, Cu Ba.  Meng rilo danak dak hu peih ngak, tal urak ini, kadung jien hu daong ka 1.200 mbang anek saih SV hu mbang tui meng dom danak dak. Abih di nyu lac dalam nan hu jaik 200 adei bac tamat ĐH, CĐ, 6 anek saih hu nao bac negar lingiu. Kadung jien jeng hu jak ba padang hu 18 sang bac, ngak 6 jalan, 39 mbaik tatua saong 166 sang anit ranam.

Bình Phước hu labaih 20% rahra lac bhap bini bangsa takik (DTTS), rilo  meng ngak nong, daok di dom labik bhum ceik, bhum atah bayah nan ye raidiuk kan kandah, rilo meng lac dom sang eih lipa, kan kathaot. Dalam dom thun jaik di ni, tỉnh pataom rilo prein yava, daong ka dom sang kan kathaot lac bangsa takik hu prein tabiak truh kathaot, yaok thun trun jaik 2% dom sang kan kathaot. Dalam dua thun 2019 saong 2020, tỉnh buh tabiak jaik 137 tỷ đồng kadung jien kanja piah peih bruk patrun 2.000 sang kathaot lac bangsa takik; tapa nan daong ka bhap bini yam tagok tabiak truh kathaot khang kajap. Di rilo xã, kapul urang kumei hu peih dom danak dak, bruk ngak siam lagaih daong ka urang dalam kapul lac bhap bini bangsa takik cak rok patagok kinh tế baoh sang, meng nan paglaong jien mek tame, salih bahrau raidiuk.

Tui Sở Ngak nong saong patagok palei pala Kiên Giang, yaom lac oh pachreih trun pajaih, min tal tukvak ini urang nong trun pajaih aval bilan padai Hè Thu 2021 hu labaih 11.420 ha. Tui kuhria, taneh pala drak padai aval ini daok tagok dalam dom harei anak tal. Makna urang nong trun pajaih aval bilan padai Hè Thu 2021 lac kayua padai di darak pasar daok hu yaom. Bruk trun pajaih yau nan, lingiu di mbuan kurang ia kayua langik pandiak, ia mbak njom tame, ye pôn, nerang hadei di tuk yuak bloh padai dahlau di nan mbuan ba tal ngộ độc hữu cơ, oh cakak hu halak halin, ruak kik meda tamuh tabiak ngak khut padai..

Ủy ban salamat jalan mbak pakat negar ba tabiak harak ieu kakei akaok UBND lac akaok mban salamat jalan mbak dom tinh, bal hu jalan langyah siam lagaih piah pacang caga bruk dam dara, anek saih ka oh ginup umo peih radaih mô-tô, radaih mac ba tal dom bala di jalan mbak biak trak. Tukvak jaik di ni, dalam negar rahtabiak dom mbang bala di jalan mbak biak trak pambuak tal urang peih radaih tuk ka oh ginup umo saong oh hu harak adat peih radaih yau ye: bala jalan mbak rahtabiak di harei 12-3 di Hải Phòng kayua 2 anek saih peih radaih ginuk tame ô-tô, metai chip.; bala jalan mbak rahtabiak di harei 11-3 di Vĩnh Phúc, dua anek saih peih radaih oh coak tamo bảo hiểm nduac biak samar ginuk tame kapul cảnh sát jalan mbak daok ngak bruk ngak ka sa urang cảnh sát njauk rambuac; bala biak

Piah patagok sap Việt ka uraniah Mầm non, anek saih Tiểu học bhum bhap bini bangsa takik, rilo sang bac di Gia Lai hu sangka padang gilang tapuk. Bruk pabak rilo tapuk, truyện tranh bahrau, nyu pachreih uranaih takre puac tapuk, pachreih anek saih mai puac tapuk, meng nan patagok sap Việt ka dom adei. Tapa 5 thun peih ngak danak dak, rilo sang bac di Gia Lai mboh lac sap Việt di dom adei hu tagok siam, bruk bac da-a hu tagok tapa yaok thun.

Tổng thống Joe Biden bahrau ni brei thau Mỹ meda  hu  100 triệu mbang  vắc-xin caga Covid-19 di harei 19/03 (tui maong pak ni). . Min, Tổng thống Bai-đừn jeng sa mbang tra kakei bhap bini Mỹ: "ni lac tukvak piah chreih hatai, min oh njauk lac tukvak piah pacadu. Dom urang ilamo hu ngak cambaih laih lac dom bruk meda jeng kan kandah jang mayah dom biến chủng njom mbak praong. Klauk vắc-xin lac sa bruk ngak siam di abih piah ka khol drei jhul kandun likuk dom biến chủng".

Đức, Prang, Tây Ban Nha, Ý... khan lac samar brei klauk veik vắc xin AstraZeneca hadei di tuk Jabat Jru tavao châu Âu (EMA) hu panuac lac nyu salamat. Thủ tướng Anh haong Thủ tướng Prang khan lac meda klauk vắc xin dalam harei 19-3. Urang dang akaok EMA, amuk Emer Cooke brei thau "UB duah thau vắc xin AstraZeneca di EMA hu panuac khan cambaih: ini lac janih vắc xin siam mekre, salamat". Min jabat ini jeng ndom lac, oh tah klaak hu abih bruk pambuak gauk di vắc xin haong bruk khal darah takik mboh.

Harei 18/3, gah hải quan saong bol lin Mexico hu pataom mek 5.775 mbang vaccine caga COVID-19 Sputnik V ja di mblang kapar haoh Campeche, gah Đông Nam negar ni. Hadei di tuk taduan hu panuac khan, Quỹ Đầu tư tapak di Nga (RDIF) – gah iek bruk pablei tabiak negar lingiu vaccine Sputnik V, thau lac ini lô vaccine ja tapa langyah thaot binguk thiết kế saong mẫu mã. Jabat chức năng Mexico daok brei thau lac lô vaccine ja kayua sa sruh ahaoh tư nhân pajeng piah nao tal Honduras./.

Urang lang: Thu Thảo- Mousaphuong -20/3