Bilan 7, langik Quảng Trị pandiak yau pui. Angaok mblang taneh ginreih ini, inem mek bom mìn mesruh metak hu kadun atah. Jalan nao tal taneh kubo pakat negar Trường Sơn hijao hadah haong dom glai cao su praong, atah. Daok angaok dom baoh mbon hijao di phun thông dalam xã Vĩnh Tường, huyện Gio Linh, tỉnh Quảng Trị lac labik pataom mai di labaih 10 rabau liệt sĩ hu mesruh metak saong ndih trun angaok jalan Trường Sơn ginreih.

Taneh kubo Trường Sơn hu labiah 10 rabau baoh kubo di dom urang anek  tabiak nao di tuk umo 20 thun. Dalam sauk gilau, dalam joa kandang, dom sap haiy drut drui. Sa-ai Lê Thị Thơm lac anek di liệt sĩ Lê Anh Hiến, palei daok di tỉnh Thái Nguyên, lahik thun 1973 di jalan 9 Nam Lào. Tuk ame lahik, sa-ai oh ka tal 6 bilan, tok thau mbaok ame tapa blah thaot. Tal thun 2000, sa-ai mbang camereip meng hu gaok ame di taneh kubo Trường Sơn. Blaoh hadom anit ranam dalam luac  30 thun hu pataom veik dalam sap ieu “ame lơi!” di labik ginreih ini:

Mbang camereip mai haong ame, daok angaok radaih pui, bahrau tal Quảng Bình ye dahlak mboh biak drut drui paje. Dahlak haiy biak rilo, caong hu mboh mbaok ame yaom lac urak ini tok lac baoh kubo. Yaok thun, hu dom jabat, kapul nyaom, hu bhap bini dalam taneh ia thau dhar phor. Nan ye dahlak mboh sahanang hatai caik ka ame ndih veik labik ini haong ayut sahabat, dahlak oh ba ame nao palei tra.

Urak ini di taneh kubo Trường Sơn jeng daok hu yaok rabau baoh kubo oh ka thau angan. Daok di taneh kubo liệt sĩ pakat negar jalan 9, dalam labaih  10.700 baoh kubo, hu tal labaih 6.000 baoh kubo liệt sĩ oh ka thau angan. Angaok yaok candaih patau mbong patih nan, ala baoh patuk kanyik sarak akhar bhong: “Liệt sĩ oh ka thau angan”, ngak ka yaok urang mai tal ini jeng oh klah di pandik harao. Angan dom sa-ai hu jeng angan TANEH IA. Saong di labik halei nan angaok bhum taneh Quảng Trị anh hùng ini, jeng daok hu yaok rabau liệt sỹ oh ka duah mboh. Ong Nguyễn Đức Nhuần, urang dahlau daih ngak bol lin, mai meng tỉnh Hòa Bình oh pacang hu ia meta sraiy tuk mai tal ini:

Dahlak biak drut drui, oh ndom tabiak sap kayua dom kubo oh hu angan biak rilo.

Yaok thun, taneh kubo jalan 9 haong taneh kubo Trường Sơn taduan raok biak rilo gauk gar liệt sĩ mai duah gauk gar. Urang dahlau daih ngak bol lin angan Hoàng Chí, akaok mBan Khik ramik taneh kubo Liệt sĩ pakat negar Trường Sơn, hu labaih 20 thun daok jaik đồng đội daok ndih veik pak ini mboh drut drui dalam hatai tuk mboh oh thau hadom sang oh ka duah mboh gauk gar yaom lac nao duah dalam yaok pluh thun:

  Urak ini dak harei dak kan duah, hu kubo thau hu menuac, hu labik duah mẫu sinh phẩm min biak kan piah dut iek. Lingiu di nan talang ralai biak rilo. Nan ye kan thau hu. Kayua yau nan ye, dahlak sahneng lac karja njauk brei mek mẫu sinh phẩm di gauk gar saong dang tabiak dut iek.

Dalam tỉnh Quảng Trị urak ini hu 72 taneh kubo, lac labik ndih veik miat di labaih 60.000 liệt sĩ. Yaok tấc haluk, yaok phun hareik di labik ini, lac brei mboh ka bruk var klaak rup drei saong caong khin tự  do di abih bangsa. Bilan 7, nao tal dom “địa chỉ đỏ” saman dahlau angaok bhum taneh ginreih Quảng Trị, kuk kaok hadar tal dom urang anek gheih ghang di palei negar ndih veik miat, yaok urang yau mboh hatai biak trak, biak pandik harao, mboh lac, njauk diukrai yau habar ka nyu njauk jang haong bruk var klaak rup drei di ame, di sa-ai, di rai dahlau./.

Urang lang: M.Phương - 26/7/2020