Bilan paik baoh caphe di huyện Bù Đăng 

Tỉnh Bình Phước hu 16.000ha cà phê, pataom rilo di dom huyện Bù Đăng, Bù Gia Mập saong Đồng Phú. Karei jang dom tỉnh Tây Nguyên, cà phê di Bình Phước oh hu pala pataom sa labik bo pala rah rah angaok rilo labik. Di dom bein, tukvak ini jaik abih dom bein cà phê daok yaom tame tukvak tasak, hu năng suất glaong jang dom thun dahlau. Min yaom cà phê that tok daok 6.000 đồng/kg, cà phê asal trun tagok meng 30.000 - 32.000 đồng/kg, lac biar di abih kuhria dalam 10 thun mai ini.

Ong Lê Văn Tấn (daok di xã Thọ Sơn, huyện Bù Đăng) hu labaih 13 thun pala cà phê brei thau, sang ong hu labaih 1,7ha cà phê saong thun dahlau mek hu labaih 5 tấn cà phê asal, pablei yaom labaih 37.000 đồng/kg. Ong kuhria dahlau lac thun ini năng suất meda mek hu labaih 7 tấn min kayua yaom daok 32.000 đồng/kg cà phê asal nan ye sang ong biak duh hatai. Ong Lê Văn Tấn brei thau, labaih pluh thun pala cà phê, oh ka thun halei yaom bier yau thun ini. Thun bier abih jeng hu  35.000 đồng/kg cà phê asal. Meyah yaom oh tagok, urang pala cà phê meda oh hu  laba, oh ginup pabak ka pren mong iek. Kayua yau nan ye, sang ong oh ka pablei  bo khik piah veik piah cang hu yaom.

Tiểu khu 23, xã Đắc Nhau (huyện Bù Đăng) daok jaik taphia tỉnh Đắc Nông nan lac bhum taneh atah bayah, jalan mbak nao mai kan kandah nan ye mikva pala  cà phê bhian njauk urang mai blei kateik yaom jaik 31.000 đồng/kg cà phê asal. Anak bruk yaom cà phê trun biar, sa-ai Nông Văn Phương (daok di tiểu khu 23) hu jaik 10 thun kak kajap haong phun cà phê, brei thau, sang sa-ai hu 1,5ha cà phê pala pablak haong pa-aok bleit, yaok thun yaom lac pala oh njauk, min phun caphe hu yaom mbiah nan ye pabak hu yaom jien buh tabiak. Thun ini năng suất cà phê glaong jang hasit min yaom biak biar.

Huyện Đồng Phú urak ini hu labaih 877 ha cà phê, pataom rilo di dom xã Tân Hưng, Tân Phước, Thuận Phú, Đồng Tiến, Đồng Tâm ngan haong năng suất kuhria rah tapa 2 - 3 tấn/ha. Tukvak ini, rilo baoh sang daok jak gauk paik asal  cà phê gam taha saong meda bo oh sangka hagait tal chất lượng. Lac baoh sang pala 2ha cà phê labaih 10 thun ini mai, sa-ai Hoàng Văn Pảo (daok di xã Đức Hạnh, huyện Bù Gia Mập) lac sang ginup meda dalam bhum, min urak ini sang sa-ai daok duh hatai. Sa-ai Pảo lac: “Mùa vụ thun bloh, dahlak paik hu labaih 10 tấn asal nan ye ginup jien piah ngak veik paglaong năng suất vụ hadei. Thun ini, tui kuhria năng suất meda glaong jang thun dahlau dom tấn min yaom biar yau urak ini, bruk ngak veik meda gaok rilo kan kandha. Meyah pala njauk min yaom lap daok rah tabiak, dahlak brei trun meneng phun jien tabuh tame ngak”.

Jaik sang sa-ai Pảo, meng 2ha cà phê pala pablak haong pa-aok blait, ong Điểu Rên pah manuac paik yaom 1.000 đồng/kg cà phê that. Tui yaom pablei 6.000 đồng/kg cà phê that, hadei di tuk kaoh abih jien pah manuac paik, tok daok 5.000 đồng/kg. Mùa vụ thun ini, sang ong oh khin pah manuac paik bo tok salih prein daong gauk paik cà phê. Ong brei thau, bruk ngak veik bein phun tok njauk ngak cầm chừng oh daok khin khang hatai yau dahlau diah. Oh hu jien ye njauk buh khak, pruh jru, pruh aia takik veik. Urak ini sang ong jeng oh ka khin pablei, cang yaom tagok piah duah  hasit harak jien buh tame ngak. Ngan haong rilo urang nong di Bình Phước, cà phê nan lac bruk duah jien piah raong diuk baoh sang, nan ye bruk yaom kaom trun bier daok ngak ka urang nong oh duh hatai. Jien mek tame vụ mùa oh ginup piah pabak veik phun jien buh tame ngak ye bruk buh jien tame ngak veik ka phun pala thun hadei meda gaok rilo kan kandah./.

Urang lang: Jasi-13/12