Bilan hè ini, mai hoang dom puk palei daok gaok ralo kan kandah, dom dam dara halar hatian dalam Chiến dịch “Bilan hè hijao” di Đắc Lắc hu patagok pren ranaih, bruk ba akaok ngak dahlau, halar hatian tapa dom bruk ngak biak siam hu mboh di meta. 

    Yaok thun tuk hè mai, bruk dom dam dara halar hatian mai palei pato bac, daong ka mikva hu jeng bhian randah haong bhap bani di bhum atah bayah Cư Pui, huyện Krông Bông – lac bhum căn cứ cách mạng dahlau diah di tỉnh Đắc Lắc. Hè thun ini jeng yau nan, bhap bani di palei Blăk saong palei buôn Đắc Tuôr, xã Cư Pui chreih chrai taduan raok kapul dam dara halar hatian mai hoang puk palei; meng urang taha tal dom adei sit, thei thei jeng uan tabuan. Tuk bahrau mai tal labik pataom pak sang palei Đắc Tuôr, dom dam dara halar hatian di sang bac Trung cấp sư phạm Đắc Lắc samar ngak randap haong labik daok bahrau, parabha bruk cambaih laih ka yaok urang. Ayut Lê Thị Lan Hương, sinh viên Sang bac Trung cấp Đắc Lắc khan lac: Khaol dahlak trun ini hu 14 urang, rabha jeng 3  nyaom, nyaom pato pakai, nyaom hậu cần saong nyaom lao động. Nyaom pato pakai hu 3 urang pato ka dom adei, nyaom hậu cần daok pak sang ngak mbang ngak huak ka dom ayut nao ngak saong dom ayut nao pato mai, daok dom ayut daok veik nan ndih dalam nyaom lao động. Dom bruk ngak yau kuac kuah ribaong kraong atau daong ka bhap bani ye khaol dahlak meda pataom veik pak nyaom lao động. Bruk njauk biai nan lac dom ayut dalam nyaom thau gul pataom, klah rabha dom dom bruk ngak.

       Dalam luac sa bilan rah tabiak chiến dịch, dom dam dara halar hatian tỉnh Đắc Lắc hu daong mikva dom bruk ngak yau: pato ka dom adei sit bac akhar haroh, peih dom bruk ma-in bui sambai ka dom adei ma-in hè, kuac rok ribaong, puh ramik vệ sinh môi trường, daong dom baoh sang kan kathaot ngak hareik, ramik taneh, pasiam veik sang danaok. Dom ayut caik tukvak nao rivang, alin hadiah pandap ka dom baoh sang sarak karja, urang buh pren yava ka taneh ia daok dalam palei. Urang dahlau diah ngak bol lin angan Y Sơn Hlong di palei Đắc Tuôr, xã Cư Pui, huyện Krông Bông lac: Xã đoàn peih bruk halar hatian di palei ini daong ka bhap bani, pato tacei  anek kamuan ma-in bóng chuyền, blaoh daoh tamia. Hu urang pato, blaoh hu urang nao ngak, ngak hreik, puh ramik  vệ sinh môi trường ka bhap bami. Baoh sang halei kan kandah ye dom kamuan daong. Yau dahlak urak ini umo taha pren takik jeng hu dom kamuan daong veih patau piah ngak padai. Dom kamuan thei jeng abih hatai, dahlak mboh phong trào peih ngak bak palei, mboh biak siam.

        Yaom lac tukvak oh suai lavik, min dom bruk bo dam dara halar hatian Bilan hè hijao ngak hu nan, nyu caik veik ralo kadha oh var hu, ngak jeng rup binguk siam gheih di urang dam dalam hatai di mikva pak ini. Tok dalam sa bilan, 60 đội hình dam dara halar hatian “Bilan HÈ hijao” di tỉnh Đắc Lắc peih hu jaik 400 tal pato hè ka labaih 8.500 anek saih, peih hu labaih 130 van pathau khan, tacei pato ilamu pala, iek glang phun cà phê, amaraik kalu, phun padai, phun bơ ka labaih 3.500 bhap bani di puk palei,  ngak hu jaik 240 công trình saong yaom jien jaik  2 tỷ meteh… Sa-ai Võ Văn Dũng, Phaok bí thư Tỉnh Đoàn, Urang dang akaok chiến dịch “Bilan Hè hijao” tỉnh Đắc Lắc brei thau: Tamat chiến dịch dalam sa bilan ye tapa taong yaom mboh hu kein laba biak rilo, kasa, bruk ôn tập văn hóa hè ka dom adei sit  pachreih hu biak ralo dom adei sit hu mbaok tame, kadua lac bruk padang tổ chức đoàn, tổ chức hội pak dom puk palei ye pachreih hu biak rilo đoàn viên dam dara. Taphia di nan peih ngak hu dom mblang ma-in ka dom adei ranaih. Abih di nyu lac dalam thun 2016, langiu kapul nyaom menuac urang di tỉnh ba mai ye dom  huyện, bal sit, bal prong jeng jak ba hu bruk  daong pren meng xã hội hóa, padang ngak hu dom bruk yau: tuh bê tông jalan mbak nao mai dalam palei, ngak dom baoh ribaong, ngak mblang ma-in bóng chuyền, pasiam veik sang taik tahak ka dom urang dahlau diah ngak bol lin, baoh sang liệt sĩ.

        Hu mbaok tame chiến dịch “Bilan hè hijao” oh lac bruk ngak piah ka dom ayut dam dara bac megru, patagok hatai sahneng bo daok brei mboh bruk  di dam dara harei ini ngan haong puk paga, palei negar. Chiến dịch “Bilan hè hijao” thun ini tamat bloh, ngan haong dom ayut dam dara halar hatian, ini lac dom kadha oh van hu dalam rai sinh viên. Daok ngan haong mikva di dom puk palei, dom bruk ngak hu makna di dom dam dara halar hatian hu ngak ka bhap bani mboh anit ranam jang, iek prong jang./.