Meng dua plak tangin saoh, sa-ai Đổng Thị Hòa, bangsa Cam daok palei Như Ngọc, xã Phước Thái, huyện Ninh Phước, tỉnh Ninh Thuận padang hu sa trang trại praong 20 hecta, dalam nan pala 7 hecta padai saong raong hu labaih 300 drei limo, pabo…Langiu di nan, sa-ai daok blei mac li-ua, mac pajeng, mac chrai brah piah trun takik bruk glaih glar ka urang ngak saong piah patagok bruk ngak mbang. Oh lac ngak mbang pablei salih naih joi, sa-ai Đổng Thị Hòa daok abih hatung dalam bruk ngak pahala di palei.  

Praong tagok dalam sa baoh sang kan kathaot hu dua adei sa-ai, ame palang lihik, amaik sup meta yau nan ye umo thun 13, sa-ai Đổng Thị Hòa nao ngak rilo bruk piah duah jien diukrai. Meng daok apah duh bruk sang, ka urang, yuak padai buac hareik mbang apah tal  mbang pah cakaong, khalam…bruk hagait sa-ai jeng ngak. Thun 1985, sa-ai tok pasang padang raidiuk saong hu ame, amaik gah pasang brei 3 sào hamu. Sa-ai Hòa saong pasang lac sa-ai Hán Minh Sì ba tangin tame ngak mbang padang raidiuk. Meng 3 sào hamu, sa-ai ngak padai  saong mesre phun jien di gilang pariak 5 triệu đồng blei 2 drei kubao piah li-ua mbang apah. Dom thun hadei, patak pataom hu hasit jien gam saong jien pablei dua drei kubao, sa-ai blei mac li-ua piah ngak taneh saong li-ua mbang pah ka mikva dalam palei. Ngak hu jien, min sa-ai kuhri kuhria cai pandar biak patak pataom piah jien blei taneh peih paraong bruk pala drak. Meng 3 sào hamu tuk camereip, mbiah tal harei ini, sa-ai hu sa trang trại praong 20 hecta, dalam nan hu 7 hecta taneh ngak padai, sa taphon limo, pabo, pabui  labaih 300 drei saong blei hu dom sruh mac li-ua, mac pajeng, mac chrai brah…Ngan saong mikva dalam palei nan lac drap ar biak praong, tapa nan brei mboh bruk kham merat ngak mbang di diuk pasang sa-ai. Urak ini, jien mek tame di baoh sang sa-ai hu labaih 500 triệu đồng sa thun, Sa-ai Đổng Thị Hòa brei thau: "Meng kanthaot rambah, drei meng yam tagok hu khang kajap, kayua hu phun jien mesre patruh iek  patrun kan kathaot, diuk pasang pang gauk, drei thau patak pataom livik livik harei menh hu yau harei ini".

           Sa-ai Hòa oh lac ngak kaya meda ka baoh sang di drei saoh bo daok daong ka mikva kan kandah dalam palei. Sa-ai hu ba bruk ngak ka 5 urang dalam palei, jien bilan jaik 4 triệu đồng ka yaok urang yaok bilan; apah dua baoh sang iek glang limo, pabo, jien bayar ka yaok baoh sang 25 triệu đồng yaok thun. Sa-ai Nại Thị Tưởng daok di palei Như Ngọc, sa baoh sang ngak nong gaok kan kandah dalam bruk pala drak hu sa Hòa daong li-ua hamu, pajaih padai, urak ini raidiuk hu tani tanat jang. Sa-ai Tưởng lac: " Hu sa-ai Hòa daong, tacei pato jalan ngak mbang, baoh sang dahlak biak thau dhar phol".

Dalam dom bruk jak ba rik jien tame padang ngak palei pala birau, sa-ai Hòa tuk halei jeng lac urang ba akaok nao dahlau, gam saong karja palei peih ngak siam dom bruk pakacah gauk. Ong Hán Tấn Luận, phaok akok Uy mban Mat tran negar xã Phước Thái, huyện Ninh Phước, tỉnh Ninh Thuận mboh lac: "Sa-ai Hòa lac urang naih gheih, njauk lac sa-ai Hòa thau kham merat yam tapa kan kandah yam tagok ngak kaya meda. Sa-ai tuk halei jeng halan hatian klah rabha dom kan kandah di mikva dalam puk palei. Sa-ai Hòa daok lac urang kham merat ngak bruk Kapul nyaom, ngak pahala yau nan ye mikva dalam palei thei jeng anit ranam sa-ai".

Ngan saong dom jak jeng dalam bruk ngak mbang patagok kinh tế baoh sang, sa-ai Đổng Thị Hòa hadah mbaok meta hu Thủ tướng Rajaei, Kapul Urang kumei Viet Nam alin brei harak meyaom saong hu dua mbang tabiak Hà Nội pataom mbaok tame Nyaom biai ka bruk Urang nong ngak mbang, pablei salih naih joi. Sa-ai Hòa nan lac urang urang kumei yam tapa khan kandah ngak kaya meda meng palak tangin saoh, sa-ai daok ngak brei hadah mbaok meta ka mikva bangsa Cam daok di palei Như Ngọc./.