Thun ini lingik siam, oh hu ribuk ia sua, nan ye urang pala bingu, phun cảnh di ban sit Hội An, tỉnh Quảng Nam njauk bingu Tết. Tal tukvak ini, 70% phun quất cảnh di dom bein hu pablei tabiak darak pasar Đà Nẵng saong dom tỉnh Thừa Thiên Huế, Quảng Ngãi…. Dahlau bilan Tết thun ini, dom janih bingu, phun cảnh di Hội An pablei hu yaom, dom pô bein jeng hu laba. Kadha vak di urang vak di rayo sap ndom Viêt Nam daok di bhum kreh negar brei thau ka bruk nan, da-a mikva saong taong abih gauk tui pang.

Dom harei ini, rilo bein pala quất cảnh, sa dalam dom janih phun   me-in Tết di Hội An hu urang meng dom labik karei mai blei jaik abih. Sang ong Nguyễn Viết Ái daok di phường Cẩm Hà, ban sit Hội An pablei hu jaik abih dom quất cảnh dalam bein. Ong Ái brei thau, thun ini oh hu ribuk ia sua nan ye quất cảnh takik njauk ruak kik halak halin, yaom glaong jang meng 10% tal 20% nan ye hu urang laba hu jien tỷ. Sang pala takik yau sang ong Ái jeng duah hu jaik sa rituh triệu đồng: Tal urak ini, dom sang dalam palei Thanh Hà hu quất siam jeng pablei hu abih pak di bein. Hu sang yau sang ong Nguyễn Văn Liên pala 2.000 chậu laba hu labaih sa tỷ đồng. Daok ong Nguyễn Kim Nhứt pala 700 chậu, laba hu 400 triệu đồng.

Lingik siam, dom janih bingu Tết meng kan di Hội An yau hồng, cúc, vạn thọ, mãn đình hồng, ly ly, … jeng tamuh siam. Ong Võ Như Tùng, urang jakar  Jabat Kinh tế ban sit Hội An, tỉnh Quảng Nam brei thau: Jabat pambuak bruk haong bilai khik caga phun pala, bilai pachreih nông, peih tal pasram ka urang nong ilamu pala bingu, pala phun cảnh. Ka dua lac khan bruk lingik tasik brei ka urang thau piah caga pala drak. Jabat jeng hu blei dom janih bingu, phun cảnh mai pala iek di palei, hu darak pasar takre blei saong bhap bini ba tame pala. Lingiu di nan, urang nong jeng thau nao duah dom janih bingu mai pala piah pabak parilo jang dom janih bingu dalam palei.

Bingu, phun cảnh daok jeng phun pala praong ba jien tame rilo jang dom janih phun pala karei nan ye hu rilo sang urang nong salih meng ngak padai, njam patam tapa pala bingu. Di ban sit Hội An, urak ini hu jaik 1.200 sang pala bingu, phun cảnh. Lingiu taneh daok pala, rilo sang daok nao pah taneh piah pala bingu Tết. Amuk Nguyễn Thị Vân, akaok jabat Kinh tế ban sit Hội An, tỉnh Quảng Nam brei thau: jien duah hu meng bingu, phun cảnh di Hội An dalam tuk Tết thun bloh jaik 38 tỷ đồng, rilo jang jaik 6 tỷ  đồng dut saong bilan bingu thun dahlau nan: Hội An hu padang palei bingu di phường Tân An brei ka rilo sang tame pala. Meyah urang nông caong hu phun jien ye tapa dom mô hình, Gilang pariak sarak karja kol dahlak jeng hu tacei urang padang dự án saong urang hu mbang tui yaom lãi suất ưu đãi piah ngak. Dua tra lac, tapa dom bruk  patagok sản xuất tuk padang palei pala bahrau, kol dahlak daong pajaih bingu piah ka bhap bini patrun yaom jien buh tame ngak./.