Danak dak salih bruk ngak nong tui jalan đô thị, ngak nong ilamu glaong pambuak haong công nghiệp chế biến daok hu tỉnh Bình Dương peih ngak, daok ba mai ralo siam mekre njauk uan tabuan. Urak ini, langiu 4 khu ngak nong công nghệ glaong ngan haong mblang taneh praong abih tih 991 hecta, Bình Dương daok hu 184 hecta taneh pala njam hacih, bingu, phun cảnh; 1.660 hecta phun mbang baoh  đặc sản saong labik raong glang ilamu glaong daok hu padang tagok. Yau nan min, danak dak ini jeng daok hu ralo tavak tavaiy njauk langyah piah peih prong mblang taneh, paglaong chất lượng saong brei mboh angan je kaya nong Bình Dương.

Urak ini, yaok rituh urang nong, po trang trại pak Bình Dương hu pandar dom  công nghệ bahrau yau: sang halăm sir, sang halăm hở, hệ thống pruh aia tự động, pruh tui tanjaoh, pruh phun sương dalam pala drak atau pandar hệ thống máng mbang, máng menyum, ngak mát tự động dalam raong glang. Dom công nghệ ini  nyu daong patakik pren ngak, paglaong bruk ngak saong pasiam chất lượng, kein laba di bruk raong glang, pala drak. Bình Dương jeng hu buh tabiak 418 tỷ đồng piah padang ngak 4 khu ngak nong công nghệ glaong. Min tui taong yaom di dom gah chức năng saong urang nong dalam tỉnh ye dom bruk ngak hu ini oh ka samu haong pren khang di nyu. Ong Giang Mạnh Tuấn, sa urang nong ngak siam bruk pala njam thủy canh trụ đứng di phường Hiệp Thành, bal Thủ Dầu Một brei thau:Piah peih ngak patagok pambak prong bruk  ngak nong tui jalan  công nghệ glaong, dom sở, ban ngành njauk pathau khan ka mikva thau lac pandar công nghệ glaong ba mai kein laba  yau habar. Patui di nan brei ka mikva nao mong iek tapak piah pachreih mikva hu mbaok tame ngak.

Tui ralo urang nong Bình Dương, piah peih ngak bruk ngak nong đô thị, ngak nong công nghệ glaong hu praong - dalam, tỉnh njauk hu quy hoạch cambaih laih jang. Dalam nan, oh lac quy hoạch gah taneh riya, hạ tầng saoh bo daok brei hu gah phun pajaih, anek raong saong abih di nyu nan lac ba ilamu bahrau mai tal urang nong tui jalan siam di abih. Ong Đoàn Minh Chiến, sa po trang trại tổng hợp pak huyện Tân Uyên brei thau: Ngan haong labik patagok bruk ngak nong đô thị, UB bhap bani  saong gah ngak nong tỉnh njauk hu quy hoạch cambaih laih, abih di nyu nan lac dom labik meng huyện tagok tal thị xã. Khaol drei njauk ngak habar pandar pajaih phun pala, anek raong saong ba ilamu công nghệ bahrau dalam bruk ngak nong mai tal urang nong di  đô thị.

Taong abih dom caong khin ini di urang nong daok hu gah chức năng pak Bình Dương duah jalan peih ngak. Anak meta, gah ngak nong meda patagok bruk jao brei ilamu bahrau, pambak prong bruk ngak nong pandar công nghệ glaong laik haong bruk pala drak di urang nong. Nan lac, ngak habar piah ka urang nong di đô thị jeng ngak hu bruk ngak nong công nghệ glaong, hu kein laba angaok dom mblang taneh sit. Taphia di nan, gah ngak mbang pablei salih daok pato pathram ilamu pablei pandap, xúc tiến thương mại ka dom hợp tác xã saong urang nong, ngak jeng talei pambuak urang nong haong gah pablei salih, urang blei pandar piah peih prong labik pablei tabiak kaya nong. Ong Nguyễn Phong Huy, Phaok Chi cục Khik caga phun pala tỉnh Bình Dương brei thau: Jalan ngak di gah ngak nong nan lac meda ba brei ka mikva urang nong dom ilamu glaong piah ngak tui, tận dụng dom mblang taneh sit dalam dom khu công nghiệp saong labik daok di bhap bani piah ngak tabiak pandap panda brei ka urang pandar bo daok khik  hu năng suất, kein laba saong hacih sa-at.

Bruk phun jien jeng lac sa dalam dom kadha cuang kandah urak ini. Tui  adat, khin hu  pilih ruah brei mesre phun jien ye urang nong brei hu jalan ngak mbang saong khin hu peih brei jien mesre ye urang nong brei hu harak hóa đơn, chứng từ brei mboh jalan pandar jien mesraiy. Yau nan, bruk padang phướng án jalan ngak mbang nan lac kan, bruk hu harak hóa đơn, chứng từ lac bruk dak kan jang. Tal tukvak ini, Kadung jien đầu tư patagok tỉnh Bình Dương bahrau mboh tangin brei mesre 20 dự án ngan haong yoam jien mesre labaih 5,8 tỷ đồng, dalam nan bahrau peih jien brei mesraiy hu labaih 2,2 tỷ đồng. Jien jhung brei mesre ưu đãi piah patagok bruk ngak nong đô thị, ngak nong công nghệ glaong jeng oh daok laghaih. Ong Phạm Văn Bông, Phaok akaok Sở Ngak nong saong patagok palei pala Bình Dương ndom lac: Dalam salih bruk ngak nong ilamu glaong, ngak nong đô thị ye urak ini sarak oh daok lagaih kayua gilang pariak brei mesre jien jhung ưu đãi 6% min sarak nan hu peih ngak meng 2-3 thun dahlau, urak ini trun paje. Gah ngak nong hu pathau khan saong urak ini daok cang Ủy ban tỉnh mong iek brei patrun jien jhung piah daong salih bruk gah ngak nong. Kiến nghị di Sở nan lac meng 0 tal 3%.

Anak meta mboh lac, kein laba di dom bruk ngak nong ứng dụng công nghệ glaong nan biak prong. Kayua yau nan ye, Bình Dương thau lac: njauk patagok hu tiềm năng saong pren khang di dom bruk ngak ini. Dom kan kandah, tavak tave tamuh tabiak dalam tuk peih ngak daok hu tỉnh samar langyah./.