Tuk hu sua tangi ka bruk bayar veik taneh glai ka Bein Negar Bù Gia Mập, ong Điểu Quýt saong ong Điểu M Rá daok di thôn Bù Dốt, xã Bù Gia Mập, huyện Bù Gia Mập, tỉnh Bình Phước lac:

“Njauk paje taneh glai di Karja ye Karja mek veik blaoh bayar jien ka drei, hu hagait bo duh hatai”

“Drei oh hu hagait piah haduh hatai. Taneh riya ye hu karja bayar jien, taneh apuh diah hu bayar jien paje”

Tui bruk bayar veik taneh glai ka Karja piah pala glai, ralo baoh sang pak ini oh duh hatai hagiat ka rai diuk, kayua lac dahlau di nan, mikva hu karja jao brei dom taneh karei piah pala pa-aok bleit, jeng hu  baoh ralo thun ini mai.

Peih ngak “Dự án panduan ba saong grap tanat bhap bani lih mek taneh glai dalam Bein Negar Bù Gia Mập piah pala drak”, dom thun tapa, mBan  khik iek Bein negar hu panduan Sali hka 130 baoh sang ngan haong mblang taneh labaih 160 ha taneh pala drak dalam labik lõi di Bein tabiak mblang taneh dự án. Taong abih mblang taneh hu jao brei bahrau hu brei harak chứng nhận quyền pandar taneh piah  grap tanat harei hadei. Taphia di nan, mBan khik iek Bein jeng grap tanat pak di labik ka 89 baoh sang ngan haong mblang taneh labaih 120 ha hu taneh glai saong sang daok dalam bhum dự án. Ong Vương Đức Hòa, Phaok Akaok Ban khik iek Bein negar Bù Gia Mập brei thau: “Dự án panduan ba ini hu mikva pachreih tui. Kayua langyah hu kein laba di bhap bani saong kein laba di karja, bein negar dalam bruk pala glai. Mblang taneh 1 ha salih 1 ha. Bhap bani hu brei quyền pandar taneh hadei di tuk panduan salih daok karja grap tanat kein laba ka bhap bani saong khik ka dự án hu peih ngak samar drah”

Dom mblang taneh pa-aok bleit daok samar thanh lý piah brei labik ka dom janih phun glai hu yaom meda hu trun pajaih dalam dom harei anak tal. Cambaih laih, meda hu jaik 80 ribau 700 phun glai yau: kayau bhong, giáng hương, cẩm lai, Trôm, ươi… hu pala trun, pabak hijao ka labaih  145 ha taneh glai hu jao brei. Dalam tukvak mikva thanh lý bein phun, Bein negar Bù Gia Mập jeng caik hatai sangka khik iek glai, plaih njaik bruk kaol kanjah jhak lợi dụng jah tak glai suan adat. Ong Lê Vũ  Phương Nam, Akaok Trạm Kiểm lâm ka 1, Bein negar  Bù Gia Mập ndom lac: “Trạm jeng hu brei manuac tui iek ka mikva jah tak phun pa-aok blait dalam bein klak. Daok dom phun daok dalam mblang taneh glai ye caik tamo yau nan saong tui mong iek oh brei ka kaol kanjah jak tame cagaik phun dalam mblang taneh bein negar”.

Tok dalam dom harei tra min, dom phun glai hu pala trun labik bo dahlau diah lac bein apuh di bhap bani lih mek taneh glai piah pala drak. Tuk mblang taneh bein kayau di bhap bani oh daok pablak haong mblang taneh glai, bruk khik iek saong pacang khik glai di Ban khik iek Bein negar Bù Gia Mập jeng hu mbuan lagaih jang.

Meng bruk njauk hatai jao bayar taneh veik ka Bein negar Bù Gia Mập di bhap bani ye anak tal, labaih 145 ha glai ngan haong dom janih phun hu yaom meda hu pala trun  piah duh ka bruk khik ramik saong patagok kinh tế ka mikva daok jaik taphia bein. Meng dự án ndung bak tính nhân văn ini hu brei mboh sa kadha lac: Tuk ý Đảng bhauk haong hatai bhap bani ye kan kandah hagait jeng meda langyah hu./.