Adei Lê Nguyễn Thanh Thùy bac taong guitar

Oh hu nao bac, daok pak sang hu rilo tukvak nan ye adei Lê Nguyễn Thanh Thùy, tal 8A1, sang bac THCS Tân Bình, ban sit Đồng Xoài hu tukvak piah ngak bruk drei takre. Yaom lac bahrau bac taong guitar min tuk lahaiy, adei mek guita pathram paik ka nyu siam dom kadha daoh drei takre. Thùy daok hu gheih gah Mỹ thuật. Langiu di cih tui hatai takre, Thùy daok hu mbaok tame pakacah cih blah rup cih ngan haong kadha ba gauk pacang caga jit Covid-19 kayua Hội đồng Đội Trung ương ba tabiak.

Ndom ka blah rup cih daok tô màu oh ka salah, Thùy khan lac: “blah rup cih di adei daok cih hu makna ba gauk pacang caga Covid-19, hu dom bruk ngak, yau rao tangin, khik ka rup babhap hacih sa-at, puh ramik sang danaok; menyum rilo aia, mbang rilo baoh karaoh saong njauk cuk siuk pabang mbaok tuk nao tabiak gah langiu; plaih pataom gauk rilo manuac... Ini lac asal kadha adei caong khin payua tal anek saih saong bol bhap thau piah pacang khik rup babhap, baoh sang saong rah ra, plaih pambak prong jit  Covid-19”.

Oh nao tal sang bac min oh lac yau nan bo Thùy var klaak bruk bac. Langiu di ngak bài tập tui kadha di sang bac jao brei, adei daok hu tut angan tame dom mbang bac trực tuyến piah pakhang veik ilamu saong tuk lahaiy daong amaik ame ngak bruk sang, mong iek adei, tuh aia ka phun cảnh.

Padeih daok pak sang min yaok harei 2 adei sa-ai Trương Tấn Phong, tal 11 tài năng 1, Sang bac THPT Đồng Xoài saong Trương Gia Nghi, tal 2/4, Sang bac tiểu học Tân Phú B, TP. Đồng Xoài jeng daok bac di sang saong ngak domkadha kayua sang bac jao brei, hadei di tuk ngak salah blaoh ye thaot kadha ngak blaoh payua ka anai gru cei gru tapa mạng xã hội. Phong brei thau: “Dalam dom harei padeih, adei bhian mek tapuk tabiak bac, tagok mạng pang dom kadha giảng trực tuyến di dom anai gru cei gru saong ngak bài tập piah pathram kỹ năng. Sang bac jeng bhian ba bài giảng, kadha pasang iek tagok  website di sang bac daong ka dom adei pabak ilamu saong khik hu bruk pato pakai. Langiu di tuk bac, adei pang nhạc, iek phim, puac tapuk”.

Bruk ma-in dom janih lagaih haong hatai takre di yaok anek saih nan lac bruk njauk hu, daong ka dom adei hu cakrok patagok ilamu di drei. Kayua yau nan ye, hadei di sa harei daok pak sang kayua jit ruak saong pandiak bhang ye biar harei la-an drei lac tukvak siam lagaih piah ka dom adei nao ma-in dom kadha ma-in bo drei takre piah pathram pren yava. Adei Phạm Minh Quân, tal 5/3, Sang bac tiểu học Tân Bình, ban sit Đồng Xoài brei thau: “Anek daok pak sang bac megru puac tapuk, mong iek tivi, biar harei la-an drei nao nduac patin dalam mblang pak sang nan ye mboh chreih chrai dalam hatai”.

Dalam tukvak taong abih gah di karja saong bhap bani ba gauk pacang caga jit prong Covid-19 ye dom adei jeng hu baoh sang saong bol bhap rah ra sangka iek glang, pacang khik. Dom adei daok hu paglaong akaok saneng, rik daong tame bruk peih ngak dom paka di Mentri Y tế piah pacang khik pren yava ka rup drei, baoh sang saong bol bhap rahra. Phaok bí thư Tỉnh đoàn, Akaok Hội đồng Đội tỉnh Lê Thị Hồng Phấn brei thau: “Hội đồng Đội tỉnh hu tacei pato dom jabat di drei peih bruk pakacah cih rup cih brei ka uranaih “harei pataom sambo màu” thun 2020, vaktu 1, ngan haong kadha “Pacang khik pren yava saong pacang caga jit ruak Covid-19”; pakacah vak hatai sahneng saong bruk pakacah “Akhar vak meng baoh hatai” kayua Hội đồng Đội Trung ương peih tabiak. Tal tukvak ini, Hội đồng Đội tỉnh taduan mek hu jaik 1.000 kadha vak, kadha cảm nhận saong blah rup cih di uranaih dalam tỉnh. Dalam nan, bruk pakacah “Akhar vak meng baoh hatai”, Bình Phước hu 2 anek saih Sang bac THCS Tân Tiến (Đồng Phú) naih jioy laik tame  top 60 kadha vak cảm nhận gheih abih dalam adit.

Tapa dom mbang pakacah hu ngak jeng mblang ma-in kein laghaih ka uranaih dalam tỉnh, daong ka dom adei pacang khik hu pren yava saong paglaong akaok saneng pacang caga jit Covid-19. Dom blah rup cih, kadha vak di dom adei brei mboh hu hatai ranam taneh aia palei negar, tapa nan jeng klah rabha hu dom thaot binguk gheih mekre, hatai thau dhal phol ngan haong dom urang daok ngak bruk di labik pacang khik pren yava ka bhap bani saong khik sron mbon salamat ka taneh aia./.

Urang lang: Jasi-25/4