Mai  veik xã Lộc Phú, huyện Lộc Ninh di sa harei kreih bilan 3, dom jalan hajan gluk bok, pandiak dhur mun, dom baoh sang hala taik tahak di mikva bhum bangsa takik jeng oh karei jang 5 thun dahlau, tuk xã ini peih ngak danak dak padang ngak palei pala barau. Meyah thun 2015, Lộc Phú mek hu 7/19 tanut ka padang ngak palei pala barau, ye tal thun 2017 ini trun abih sa tanut, kayua dom baoh sang kan kathaot patagok. Urak ini, xã ini daok hu labaih 30% dom baoh sang kan kathaot saong jaik si kan kathaot dalam abih tih 6.700 baoh sang, min oh hu công nhận lac xã kan kathaot.

Ong Trần Văn Tiến, Phaok akaok UB bhap bini xã Lộc Phú brei thau, meng tuk peih ngak danak dak bruk ngak negar ka padang ngak palei pala barau tal urak ini, xã tok hu parabha brei 270 triệu đồng. Kayua yau nan ye, xã tok ngak hu 4,3km jalan bê tông.  Yaom jien daok veik, xã blei hu 54 drei pabe pajaih brei ka 18 baoh sang kan kathaot raong. Yaok thun tal bilan pandiak, 134 baoh sang di xã ini kurang ia pandar. Dalam xã hu 80% baoh sang bhap bini hu pandar điện, min bhian cakak dalam bilan pandiak. Ong Trần Văn Tiến lac:

“Xã ini biak praong. Piah jak ba ngak hu sa jalan, yaok baoh sang brei buh tabiak meng 7-10 triệu đồng. Bo bhap bini bangsa takik di labik ini biak kan kandah. Urang tok ngak padai mek brah mbang”.

 Dom kan kandah di xã Lộc Phú jeng lac kan kandah di dom xã daok peih bruk padang ngak palei pala barau di huyện Lộc Ninh. Dalam huyện hhu tal 13/15 xã bahrau mek hu meng 6-13 tanut. Dua xã daok veik lac Lộc Hưng  saong Lộc Hiệp daok hu huyện daong piah ngak xã điểm peih ngak bruk ini. Ong Nguyễn Gia Hòa, phaok akaok UB bhap bini huyện Lộc Ninh brei thau:

  “Bruk padang ngak palei pala barau di huyện Lộc Ninh dalam tukvak tapa suai jang duk saong kuhria. Min, tal tukvak ini, bruk padang ngak palei pala barau hu jhul khang jang. Thun 2017 ini, kol dahlak daok pataom taong abih dom nguồn lực piah ba 2 xã ngak hu bruk padang ngak palei pala barau”.

Hadei di labaih 5 thun peih ngak danak dak padang ngak palei pala barau, dom tanut bình quân dalam 92 xã di tỉnh Bình Phước mek hu biak biar lac 12,51. Dalam nan, hu 22/92 xã tok mek hu meng 5-9 tunut. Dalam tukvak peih bruk padang ngak palei pala barau, tỉnh Bình Phước oh pachreih hu ralo nguồn lực meng doanh nghiệp saong bhap bini. Abih tih phun jien ieu pataom dalam 5 thun tapa di tỉnh lac 5.850 tỷ đồng. Dalam nan, bhap bini rik tame 221 tỷ đồng.

Meda lac bruk padang ngak palei pala barau di tỉnh Bình Phước gaok ralo kan kandah yau urak ini lac kayua tỉnh Bình Phước praong, menuac sia daok atah di gauk. Lac tỉnh hu tal 42 bangsa adei saai, akaok saneng di mikva bangsa takik daok biar oh ka saneng njauk saong oh ka pachreih tui danak dak  padang ngak aplei pala barau. Taphia di nan, biến đổi khí hậu ngak kan kandah trak tal bruk pala draki saong rai diuk di bhap bini tỉnh BP. Mbang pandiak bhang dui atah dalam bilan thu thun bloh ngak khat lahik yaok ritruh ha phun mbang baoh, phun công nghiệp saong njam patam di bhap bini.

Biak di nyu, tỉnh BP jeng padang hu dom mô hình sản xuất, patruh eik patrun kathaot dalam dom xã palei pala, bhum urang bangsa takik yau: bruk raong pabui menek, limo menek di huyện Bù Đốp; bruk HTX pala amraih kalu hacih di huyện Lộc Ninh, bruk daong pajaih phun mbang baoh, khak drak di huyện Chơn Thành; bruk raong pabe, limo menek di huyện Hớn Quản…Min dom bruk nan daok sit sot, oh ka ba mai bruk salih bharau khang dalam sản xuất di bhum palei pala.  

Di taong abih 92 xã di tỉnh Bình Phước, kapul dam dara dang tabiak ngak meng 2 - 4 tanut dalam 19 tanut padang ngak palei pala barau min kan ngak hu. Dom pakat bộ đoàn di tỉnh daok padang dom HTX sản xuất, pablei salih piah ba bruk ngak ka dam dara palei pala yau: HTX chế biến brah, HTX in ấn, quảng cáo, HTX menyim khan bai, đan lát min oh ka hu kein laba.

Anak meta mboh lac, bruk ieu pataom pren bhap bini jaik 10%, rilo xã di tỉnh BP ieu pataom hu, min bruk ieu pataom dom nguồn lực karei meng  kadung jien karja, meng doanh nghiệp ye oh ka pachreih hu, kayua yau nan ye bhap bini njauk daok cang. Di rilo puk palei, bhap bini hu sanya rik daong, min công trình nyu suai peih ngak kayua oh ka hu bruk daong phun jien di karja. Ong Trịnh Minh Hoài, akaok UB bhap bini huyện Hớn Quản, tỉnh Bình Phước.

Taphia bruk ieu pataom nguồn lực dalam bhap bini, tỉnh BP jeng daok cang TƯ daong piah bruk padang ngak palei pala barau mek hu kein laba glaong jang. Meyah oh jak ba hu doanh nghiệp hu mbaok tame padang ngak cơ sở hạ tầng, ye bruk daok pamaong ngak lac tal thun 2020, hu 46 xã (samu meteh dom xã dalam tỉnh) mek hu chuẩn palei pala barau tui Sarak nyaom raoya Đảng bộ tỉnh Bình Phước mbang 10 ba tabiak ye biak kan ngak hu./.