Pathau mikva saong taong abih gauk! Jaik 4 bilan ini mai, di tỉnh Bình Phước pandiak bhang biak khang saong oh hu mbang hajan halei. Yaom lac bahrau tame bilan pandiak, min labaih 7 ribau baoh sang di tỉnh ini daok kurang ia pandar, yaok  pluh ribau ha amriah kalu, cà phê saong phun mbang baoh daok metai nao. Pandiak bhang biak khang daok jhul yaok ribau baoh sang bhap bini daok di dom huyện Bù Đốp, Lộc Ninh saong ban sit Bình Long laik tame eik lipa, kan kathaot. Kadha vak di urang vak Thành Trung daok di ban raya HCM.

Xã Lộc Hưng, huyện Lộc Ninh, tỉnh Bình Phước daok thu lagu kayua pandiak bhang. Taong abih bingun dalam xã thu abih ia. 763 baoh sang bhap bini kurang ia pandar. Jaik 300 ha phun pala daok metai nao. Sa bilan ini mai, 92 baoh sang urang Khmer daok di palei 4 di xã ini njauk blei ia pandar ngan saong yaom 70 ribau đồng sa khối. Meyah pandar patak pataom biak ralo, yaok baoh sang jeng abih 30 m3 ia, samu labaih 1 triệu đồng sa bilan. Amuk Thị Hương daok di palei  4, xã Lộc Hưng, huyện Lộc Ninh lac:  

 “Urak ini bhap bini di labik ini kan kandah lo, thei jeng yau nan. Ia pandar njauk blei 70 ribau đồng sa khối min oh hu jien kayua mikva kan kathaot lô. Khin menei ia jeng oh hu ia. Dahlak oh caong khin hagait, tok di caong khin hu ia”

Daok xã Thanh Lương, ban sit Bình Long, baoh craoh Cần Lê thu abih ia. Bhap bini daok tapen craoh ini daok kham merat pacang cakak bhang ka 1 ribau 200 ha phun mbang baoh, ralo meng lac darang saong quýt. Piah khik phun, mikva njauk tak klak abih dhar, yaom lac daok dalam bilan tabiak bingu. Meyah pandiak bhang dui atah meng 3 tal 4 bilan tra ye hu takik di abih 20 ribau ha phun mbang baoh di tỉnh Bình Phước metai kayua oh hu ia pruh. Bruk nan jeng lac jaik 10 ribau baoh sang bhap bini jeng kan kathaot, jaik si kan kathaot atau kan kathaot veik. Bruk njauk duh hatai nan lac dom baoh sang mesraiy jien di gilang pariak piah pala barau cam, quýt, amriah kalu njauk khat lahik abih. Ong Nguyễn Vĩnh Thịnh, sa urang daok di palei Thanh An, xã Thanh Lương duh hatai lac: 

 “Kol dahlak daok di labik ini oh hu ia halei piah caik  mepiah tuk pandiak bhang dui atah. Mikva khoan bingun min ala nan patau saoh, khoan oh hu. Urak ini quýt ka-iu abih”.

Lac sa tỉnh jaik taphia Tây Nguyên, taneh di Bình Phước nyu glaong saong dốc nan ye ia pandar saong ia pruh ralo meng tui ia lingik. Dalam tỉnh hu 66 công trình thủy lợi meda pabak ia pandar saong công nghiệp 90 ribau m3 sa harei melam saong pabak ia pruh ka labaih 17 ribau 600 ha taneh pala drak. Min, ia di dom danao ini trun biar jang tanut báo động 1 lac 1met meteh kayua ralo kraong, craoh thu abih ia. Urak ini, tỉnh Bình Phước hu 54 ribau ha phun pala nan lac phun công nghiệp, phun mbang baoh saong phun yaok thun. Dalam nan, jaik 36 ribau ha phun njauk thu lagu kayua pandiak bhang. Daok 10 ribau ha taneh ngak padai saong phun pala takik harei oh ngak hu tui bruk ba tabiak. Ong Trần Văn Lộc, Giám đốc Sở ngak nông saong patagok palei pala tỉnh Bình Phước brei thau: 

 “Kol dahalak jeng hu tacei pato dom po đầu tư di dom công trình ba ia, ngak yau habar piah langyah hu ia pandar ka bhap bini. Kol dahlak jeng patagok bruk pathau khan dalam bhap bini piah mikva salih tapa pala dom janih phun pala diuk hu dalam pandiak bhang piah lagaih saong bruk pandiak bhang urak ini”.

Piah caga pandiak bhang, UB bhap bini tỉnh Bình Phước hu peih ginum biai chip saong dom ngành, dom puk palei saong mban khik iek dom danao thủy lợi, thủy điện dalam tỉnh piah ba tabiak dom jalan ngak chip. Anak bruk yau urak ini, Bình Phước njauk pabak dahlau ia pandar ka bhap bini, hadei di nan lac ia ka athur raong saong ia ka bruk pala drak. Daok dom labik njauk pandiak bhang trak di abih nan lac Lộc Ninh, Bù Đốp saong ban sit Bình Long brei samar duah halau ia piah khoan bingun công nghiệp, pabak ia pandar ka bhap bini. Meyah oh cang suai hu, dom huyện, ban sit brei pandar chip kadung jien dự phòng piah daong bhap bini pacang cakak pandiak bhang. Urak ini, kadung jien dự phòng di tỉnh Bình Phước daok 24 tỷ đồng. Kadung jien ini di dom huyện, ban sit daok meng 4 tal 8 tỷ đồng min. Ong Nguyễn Gia Hòa, phaok akaok Ủy ban bhap bini huyện Lộc Ninh, tỉnh Bình Phước brei thau: 

“Kol dahlak patagok bruk pathau khan brei mikva thau patak pataom ia, hu dom jalan pacang  pandiak bhang ka phun pala. Ka dua nan lac huyện buh meng kadung jien karja piah duah halau ia di dom labik pandiak bhang khang di abih yau dom labik hu ralo bhap bini, labik urang bangsa takik saong dom sang bac”.

Anak bruk pandiak bhang biak khang yau urak ini, UB bhap bini tỉnh Bình Phước hu panuac caong dom urang dang akaok dom danao thủy điện Thác Mơ, Cần Đơn, Sork Phu Miêng parabha ia lagaih, patrun công suất phát điện piah patak pataom ia, caga pabak ia ka puk palei tui adat. Anak meta, ngan saong dom labik njauk pandiak bhang, oh khoan bingun hu, karja dom puk palei di tỉnh Bình Phước brei dom radaih bồn pajeng ia tal labik brei ka bhap bini. Meyah mboh biak catang, dom puk palei brei samar khan ka UB bhap bini tỉnh piah tabiak panuac lac bala kayua pandiak bhang./.