Di dom huyện Đồng Phú, Phú Riềng, Bù Đăng, Bù Gia Mập… ralo sang bein tame bilan paik baoh. Yaom lac thun ini pa-aok blait tabiak bingu suai jang min dom mbang bingu tabiak hadei jeng biak siam, oh thu lagu. Langiu di langik tasik siam laghaih, mikva daok hu mong iek, pacang caga halak halin.

Sang ong Lê Thanh Lâm, xã Tân Phước, huyện Đồng Phú, tỉnh Bình Phước hu  4 ha pa-aok bleit. Thun dahlau, pa-aok blait pala oh njauk, ong paik hu jaik 7 tạ. Thun ini, pa-aok blait tabiak bingu, ndam baoh rilo jang thun dahlau. Meng langik tasik siam laghaih, oh hu hajan suan bilan yau urak ini, ong Lâm caong hu sa vụ pa-aok blait  bội thu tuk abih thun 2018. Ong Lê Thanh Lâm lac: Akaok thun 2018,  urak ini sang dahlak paik hu 4 tạ pa-aok blait. Tui kuhria mboh dahlau, tal puac thun ini dahlak paik hu jaik 7 tấn.

  Tui dom chuyên gia, thun ini mikva urang nong pala njauk, meda pabak veik hu ka vụ pa-aok blait thun blaoh. Meyah tukvak kreh saong puac thun 2017, yaom pa-aok blait gaok tuk laik trun khang, daok  25.000 đồng sa kg ye thun ini mikva daok chreih chrai kayua yaom di nyu tagok meng 35.000 tal 45.000 đồng sa kg. Ong Đặng Văn Đông, urang jakar gah ngak nong ndom lac: “Bilan pa-aok blait thun ini jeng hu hajan min pa-aok blait nyu ndam baoh biak ralo, nan ye urang nong meda hu jien mek tame ralo”

Tui Sở Ngak nong saong patagok palei pala tỉnh Bình Phước, dalam tỉnh daok hu jaik 134.000 hecta pa-aok bleit. Urang jakar Pasak pacheih nong tỉnh kham merat nao tal mblang bein tacei pato urang nong ilamu pacang caga jit ruak, pataom tame ka vaktu phun pa-aok blait tabiak bingu, ndam baoh. Bruk ngak ini hu pataom tame jhul khang di dom huyện Bù Đăng, Bù Gia Mập, Phú Riềng saong Đồng Phú, labik meblah labaih 90% mblang taneh pala pa-aok blait dalam tỉnh./.