Dom ar pacang hu padang di takai tasik 

Labik  du lịch Hàm Tiến – Mũi Né di ban  Phan Thiết, tỉnh Bình Thuận lac labik bhian pachreih hu rilo tuai du lịch mai rivang main, padeih padei  kayua mblang tasik  siam, ia hacih jangaih. Min, dom harei akaok bilan 12 ni, hu oh takik tuai oh njauk hatai kayua labik menia ia tasik pak ni padang ngak rilo ar pacang  liman, ngak ka bruk menei ia tasik atau nao takai gaok kan kandah. Ong Mạn Bảo Thành – sa tuai Việt kiều ndom lac: “1 thun dahlau takai tasik ni atah tabiak lingiu, urak ni, glut  jaleih ngak ka labik menei ia lahik nao. Du lịch njauk ngak habar piah daong patrun bruk glut jaleih mbang dalam tame, hu du halei siam du nan”

Dahlau deih, di kreik thun 2018, rilo  cơ sở du lịch dalam phường Hàm Tiến njauk glut jaleih trak ; rilo  nhà hàng rah tui takai tasik njauk riyak ba seik, hu labik mbang dalam tame tal  10m. Muk Cao Thị Hồng Ngọc, po labik du lịch Suối Tiên -Mũi Né brei thau: meng di tuk khu du lịch Sunny Beach daok jaik taphia  ngak ar pacang  hình chữ T lih tabiak tasik labaih 150m ye hadei di nan oh lavik , takai tasik di  resort Suối Tiên – Mũi Né njauk glut jaleih, bruk ni oh ka mboh mbang halei dalam 18 thun peih ngak  du lịch pak ni: “Meng harei njauk glut jaleih tal ni , labik du lịch oh dok ngak mbang hu. Tuai urang bayar balik  song drei njauk bayar veik jien ka tuai. Khat lihik biak prong, tuai klaak  nao biak rilo, oh mai veik. Glut jaleih ngak lahik sa mblang tasik lac biak tah, biak mekre”

Tui yaok pataom di mban khik ramik khu du lịch Hàm Tiến – Mũi Né, takai tasik  di phường Hàm Tiến, ban  Phan Thiết urak ni hu  11 cơ sở du lịch dok ngak  23 ar pacang liman, dui atah meng  khu du lịch Ngọc Bích tal  khu du lịch Hoàng Ngọc. Anak bruk ni, Mban khik ramik song  UBND phường Hàm Tiến rilo mbang hu harak ieu dom gah  chức năng samar langyah. Harei  7/5/2018, UBND tỉnh Bình Thuận tabiak văn bản 1766  pandar Sở ngak nong song patagok palei  pasang iek, tacei pato dom  cơ sở du lịch ngak ar  tạm piah pacang glut jaleih, ngak ka nyu samu gauk, siam lagaih; saong hu jalan langyah, pasiam veik ngan song dom  cơ sở eng drei ngak ar oh lagaih, ba tal glut jaleih. Min urak ni, bruk langyah jeng oh ka siam lagaih, dom ar liman padang eng jeng daok hu rilo.

Anak bruk nan, dom menuac sia pak ni brei thau, bruk padang ar tạm oh lac ngak glut jaleih, ngak oh mekre mbaok meta labik ini bo dok ngak salih jalan nao di cuah rah tui takai tasik, ngak salih jalan ia nduac, lac sa dalam dom makna ba tal mbuan si mblung ia. Saai Lê Văn Tám – sa urang cứu hộ di  phường Hàm Tiến, ban sit  Phan Thiết lac “Hulin ngak di pak ni labaih 15 thun, min, dahlau deih di pak ni, ia nyu oh nduac yau nan. Tasik  yaom lac hu riyak , min ia tok nduac tame gah. Min, urak ni hu dom ar pacang nyu ngak jeng jalan ia nduac karei, ngak ka ia nyu xoáy”.

Du lịch Hàm Tiến – Mũi Né oh neh tabiak hu haong dom mblang tasik mekre. Kayua yau nan ye, meyah karja pak ni dok caik rah tabiak bruk eng drei  padang ngak ar rah tui takai tasik, lac jalan ba tal glut jaleih dak harei dak trak, ngak khat lahik drap ar bo, cơ sở vật chất bo dok ngak brei lahik nao biak rilo tuai du lịch dok dalam song langiu negar, saong labik padeih padei  mekre meta Hàm Tiến - Mũi Né urang oh daok khin mai tal lac bruk meda rah tabiak./.

Urang lang: Hanipha- 18/12