Kayau jak tak glai di Bình Thuận saong Lâm Đồng

Thau lac glai tapen tỉnh Lâm Đồng lac labik bhian rah tabiak bruk jak tak glai suan hukum, tỉnh Bình Thuận hu tabiak rilo harak văn bản tacei pato. Tui nan, dom gah chức năng hu patagok bruk pambuak gauk duah thau, pasang iek, pagui mek piah samar duah mboh, pacang cakak, langyah dom bruk urang ngak suan. Meng akok thun mbiah tal ini, gah khik iek glai di huyện Bắc Bình peih labaih 210 mbang pagui mek, gam patagok bruk pasang iek dom labik tak kayau, padauk piah, dom jalan pajeng kayau suan hukum, pataom ralo di dom labik praong saong glai tapen xã: Phan Sơn, Phan Lâm, Phan Tiến di taneh glai kayua dom Mban khik iek glai  pacang caga Cà Giây, Sông Mao, Sông Lũy. Tapa pasang iek, pagui mek, gah chức năng chap hu 9 mbang ngak suan takik jang 15 mbang dut saong tukvak ini thun dahlau). Tui nan brei buac klak  labaih 6 hecta phun pala suan hukum di tiểu khu 60 labik glai kayua Mban khik glai pacang caga Cà Giây, pateok yaok pluh mbang radaih li-ua, radaih kuac haluk.

Ngan saong dom bruk ngak suan Hukum ngak glai hu duah mboh tapa pasang iek, pagui mek, urak ini Hạt kiểm lâm huyện Bắc Bình hu taong phạt hành chính labaih 220 trieu đồng, chap mek rilo pandap panda. Hạt Kiểm lâm huyện Bắc Bình brei thau, langiu bruk langyah hành chính, daok hu pambuak bruk saong Viện Kiểm sát, Công an huyện pasang iek, langyah hình sự dom bruk jak tak glai suan hukum rah tabiak dom thun dahlau kayua ngak khat lahik trak tal kaya glai. Tal tukvak ini hu khởi tố 2 bruk jak tak glai suan hukum. Nan lac bruk jak tak glai di tiểu khu 57, 58 kayua Mban khik iek glai pacang caga Sông Lũy saong bruk jak tak glai tiểu khu 63 ngan saong taneh praong labaih 1,4 hecta taneh glai khik iek di Mban Khik iek glai pacang caga Sông Mao.

Langiu di nan, tui duah thau di urang vak, bruk mek kayau, pajeng ba kaya glai suan hukum di bhum taneh jiak Bắc Bình saong Đức Trọng urak ini mboh lih tapa labik karei, meng labik glai khik iek di Mban khik iek glai pacang caga Sông Lũy tapa taneh glai  khik iek di Mban khik iek glai pacang caga Cà Giây saong Sông Mao. Njauk caik hatai lac bruk bhian rah tabiak di taneh Đồi Chè, Trường Bắn, Dốc Dài, ceik Gió Hú, Cha Răng Hao, Ka Long Bong, jalan Ma Am…Di dom labik nan, gah khik iek glai gam gam mboh rilo menuac peih radaih ngak eng, ba tui pandap panda tame glai kaoh kayau, pajeng ba kaya glai. Tapa duah thau taneh glai kayua Mban Khik iek glai pacang caga Cà Giây di glai xã Phan Lâm, tok dalam klau bilan akok thun, gah khik iek glai duah mboh di labik ini rah tabiak 18 mbang tak mek kayau glai suan hukum ngak khat lahik jaik 90m3 kayau. Urak ini, dom jabat chức năng daok duah thau, ngak harak hồ sơ piah langyah tui quy định, dalam 18 mbang jak tak glai angaok nan hu sa mbang ngak suan hukum trak njauk pasang iek, langyah hình sự.

Tui Hạt Kiểm lâm huyện Bắc Bình, tỉnh Bình Thuận, caik rah tabiak bruk jah tak glai lac kayua rilo makna. Taphia dom kan kandah jeng yau dom bruk karei, urak ini dom po glai oh ka ngak siam bruk bhian khik iek glai. Lingiu di nan, bruk pambuak gauk khik iek glai  haong dom gah khik iek glai di huyện Đức Trọng daok ngak mengak, oh hu siam.  

Kayua yau nan ye, Hạt Kiểm lâm huyện hu tacei pato gah khik iek glai di huyện langiu di bruk pambuak gauk khik iek glai tui caong khin di po glai, brei pasang iek glai,  daong ka UB bhap bini xã khik iek tani tanat taneh glai dalam labik di drei. Langiu di nan, pandar gah khik iek glai samar ba tabiak jalan langyah meyah po khik iek glai caik rah tabiak bruk jak tak glai, lih mek taneh glai, min oh mboh, oh hu jalan pacang caga, langyah samar. Hạt Kiểm lâm huyện jeng caong khin UB bhap bini huyện Bắc Bình ngak bruk saong UBND huyện Đức Trọng hu jalan pacang caga, taong phạt catang radaih công nông, radaih patuh ngak eng, radaih abih tukvak pandar tame glai. Kayua meyah khik iek catang dom janih radaih angaok nan, meda pacang caga hu siam bruk tame glai di Bắc Bình meng huyện Đức Trọng piah jak tak glai, pajeng ba kayau suan hukum./.

 Urang lang: A.Nghiêm   13/5/2020