Dom danao chraoh dok peih ia 

Jaik 2 pluh thun tapa, tỉnh Bình Thuận hu padang ngak rilo danao ia saong mboh hu siam lagaih. Yau ye danao Lòng Sông padang hu labaih 36 triệu m3, ba tame pandar di thun 2005 hu pabak ia pandar saong ia pala drak ka abih bhum pandiak thu huyện Tuy Phong. Di danao, ia hu parabha ka 2 ribaong praong lac Cây Cà saong Tuy Tịnh, pruh hu ka abih tih labaih 4.260 ha. Ong Đặng Quốc Khánh, daok di palei Tuy Tịnh, xã Phú Lạc brei thau, mikva labik ini oh hu hagait bui sambai jang tuk mboh danao Lòng Sông hu pacang ia nduac. Tacei tangin tame bein thanh long haong bein medar di sang drei, ong Khánh bui sambai khan lac, meng hu ia di danao Lòng Sông nan ye bein meng hijao, mekre, hadar veik dahlau daih, menuac daok oh hu ia menei, ndom hagait tal ia pruh ka phun pala atau ia menyum ka limo:  

Dom thun jaik di ini dom palei jaik taphia bhum kreh negar njauk pandiak bhang kurang ia biak khang. Ta-eng huyện Tuy Phong ye danao ini khik hu ia piah pala drak saong piah pandar, oh daok kurang ia yau dahlau daih.

Abih tih taneh ngak nong di tỉnh Bình Thuận lac 312.967 ha. Ta-eng phun padai lac 51.861 ha, tangei 20.354 ha, phun thanh long 26.000 ha..., nan oh ka ndom tal tapon athur raong labaih 200.300 drei. Kayua yau nan ye bo ia pruh ka bilan pandiak bhang lac  biak praong. Piah caga tuk pandiak bhang, thu lagu, tỉnh Bình Thuận hu Rajaei brei padang gac danao Sông Lũy di huyện Bắc Bình, danao La Ngà 3 di huyện Tánh Linh saong danao Ka Pét di huyện Hàm Thuận Nam. Dalam nan danao Ka Pét hu Quốc hội brei ngak, praong 51,21 triệu m3, tui kuhria hu padang ia di thun 2023. Daok danao Sông Lũy padang hu labaih 100 triệu m3 urak ini daok ngak saong meda padang ia di bilan 8 thun ini. Ta-eng danao La Ngà 3 ye 10 thun tapa jeng oh ka ngak hagait.

Tui ong Nguyễn Hữu Phước – Phaok Yam ndok Sở ngak nong saong patagok palei pala tỉnh Bình Thuận, danao La Ngà 3 padang hu 470 triệu m3, ba ia pruh ka Bình Thuận saong Đồng Nai ngan saong taneh praong labaih 67.000 ha. Min kayua tavak quy hoạch di Mintri Công thương haong Mintri ngak nong saong patagok palei pala nan ye tal urak ini jeng oh ka ngak hu:     

Thủ tướng jeng hu tacei Mintri Công thương brei ramik veik tabiak truh Quy hoạch điện 7 saong jao ka Mintri NN&PTNT dang tabiak ngak. Min mbiah tal urak ini, Mintri Công thương jeng oh ka ramik veik tui tacei pato di Thủ tướng. Caong lac dom mintri, dom gah samar ramik veik bruk padang thủy điện La Ngâu tabiak truh quy hoạch saong samar brei ngak danao La Ngà 3 dalam vaktu 2021 – 2025. Hu yau nan meng langyah hu bruk pandiak bhang di Bình Thuận.

Dalam tỉnh Bình Thuận urak ini hu 48 danao padang ia hu abih tih labaih 334 triệu m3, pruh ka labaih 115.600 ha, dalam nan taneh ngak padai dalam thun lac 95.800 ha, daok veik lac pruh ka phun lavik thun. Yaok thun pabak ia tamo labaih 32 triệu m3, tagok biak rilo duk haong 10 thun dahlau. Gam haong bruk buh jien tabiak ngak danao padang ia, Bình Thuận daok sangka ngak dom ribaong ba ia yau: dom ribaong ba ia Sông Móng - Đu Đủ - Tân Lập (jaik 40 km) pabak ia pruh ka abih bhum pala thanh long di huyện Hàm Thuận Nam; dom ribaong Châu Tá (atah 32 km) hu ba ia meng binek 812 mai tal bhum pandiak bhang Hồng Sơn, Hồng Liêm di huyện Hàm Thuận Bắc... Piah paglaong bruk ia pruh di bilan pandiak bhang, tui ong Phạm Văn Tuyền, dahlau daih ngak Phaok Chi cục Thủy lợi tỉnh Bình Thuận, njauk ngak rilo jang dom ribaong ba ia ka bhum palei:

  Kol dahlak jeng hu panuac likau brei ngak rilo jang dom ribaong ba ia ka bhum palei yau ye: ribaong Hàm Tân – Hàm Thuận Nam – La Gi, danao Sông Dinh - danao Núi Đất, Biển Lạc – Tân Hà… Dom ribaong ini piah ba ia labaih meng labik labaih ia tapa ka labik kurang ia. Yaom lac hu danao padang ia min kol drei brei hu dom ribaong ba ia, yau nan meng pabak hu bruk pruh ia dalam bilan pandiak bhang)

Lingiu di bruk pabak ia ka bruk ngak nong, dom danak dak thủy lợi daok hu ba ia pandar ka bhap bini dalam tỉnh, jeng yau pabak ka bruk caong pandar di dom gah ngak mbang karei karei, daong jhul kinh tế xã hội di Bình Thuận cakrok patagok dalam dom thun anak tal./.

Urang lang: Mousaphuong-19/4