Dom harei tapa, khaol dahlak hu mai xã Tân Thuận, huyện Hàm Thuận Nam, tỉnh Bình Thuận duah thau ka bruk jah tak glai lih mek taneh dalam Khu bảo tồn thiên nhiên Tà Cú tui panuac khan di bhap bani. Meng pasak xã Tân Thuận, khaol dahlak nao tal canah klau darak, hadei di nan vaih tame jalan mòn ngoằn ngoèo nao tabiak khu Láng Mã. Klak veik sruh radaih patuh dalam mbu glai jaik mblang kabo, urang vak ngak jeng menuac nao cap mek cim glai piah plaih dom urang jah tak glai thau lac urang vak.

Harei akaok meti, tuk nao tapa labik daok trun gheng pala thanh long, khaol dahlak mboh sa sruh mac li-ua sambo màu hijao daok li-ua taneh di bìa glai. Sruh mac li-ua daok li-ua nao li-ua mai. Dom gha phun glai njauk jah tak dahlau di nan hu mek tagok, rami ramik piah jeng sa khu taneh apuh hacih. Taphia di nan, yaok rituh gheng bê tông hu padang trun piah pala thanh long.

Hadei di tuk thau hu bruk ini, harei 13/9, UBND xã Tân Thuận saong gah po glai hu brei urang jakar gam haong urang vak tame labik taneh glai daok njauk urang jah tak, lih mek. Hadei di tuk bấm máy định vị, ong Nguyễn Trọng Hiệp, urang khik iek glai Tân Thuận, Ban khik iek Khu bảo tồn thiên nhiên Tà Cú ndom lac:“Tui tọa độ brei thau, mblang taneh ini jeng hu sa binah  jaik dom pluh mét vuông daok dalam Ban khik iek, daok veik lac taneh di xã khik iek.”

Jeng hu mbaok pak labik taneh daok li-ua, ong Phan Văn Minh, Phaok Akaok Khu bảo tồn thiên nhiên Tà Cú brei thau:“Trạm hu mai ini ralo mbang piah duah manuac urang jah tak glai, min oh ka gaok. Dahlak hu tacei, meyah oh gaok urang jah tak glai, njauk pambuak bruk haong karja palei saong kiểm lâm pak nan ngak hồ sơ piah xử lý.”

Langiu di labik ini daok hu 4 labik glai karei njauk jah tak piah lih mek taneh. Tacei tame mblang taneh glai sến jaik di mblang taneh daok li-ua harei dahlau daok metai thu, bhap bani pak ini brei thau taong abih phun glai metai kayua njauk jru. Biak di nyu, di labik ini mboh lac, gha di dom phun glai jruh hala metai thu jeng hu cao gilaong dalam meng 5 tal 10cm. Taong abih phun halei njauk cao gilaong jeng metai thu. Dom phun glai njauk jru metai daok dalam Tiểu khu 302.

Tapa labik puh thanh long jaik 300 mét, hu sa glai jaik 1.000m2 jeng njauk urang tak. Phun glai jaleih ndih angaok gauk. mBlang taneh bak phun glai prong, sit. Inem kagaik saong bruk di pak nan brei mboh labik ini njauk jah tak dahlau di nan labaih sa bilan.

Oh padeih pak nan, bhap bani daok ba khaol dahlak nao tapa dom glai ram, nao takai jaik 100 mét, lac labik khu glai sến hu ralo phun prong bahrau njauk kaoh kagaik. Katak bahrau nduac tabiak angaok mbaok kayau brei mboh bruk jah tak glai bahrau rah tabiak jaik di ini. Hu Jaik yaok rituh phun kayau hu đường kính meng 20 tal 40cm njauk kagaik ndih jaleih trun haluk. Mboh rilo lac inem kagaik mac saong hu takik phun sit hu mong yau kaoh meng mara.

Oh lac di labik jaik khu Láng Mã, bo khu glai jaik ceik Đất - xóm Rẫy jeng hu mboh bruk jah tak phun glai yau nan. Dalam tuk nan, Balai khik iek glai Tân Thuận tok atah dom labik jah tak glai jaik 3 km nao tui jalan cim par, min urang jakar khik iek glai saong  kiểm lâm labik ini oh thau piah pacang cakak samar drah. Sa kadha njauk ndom lac thun bloh di Tiểu khu 302 jeng hu mboh bruk jah tak glai, dalam tuk oh ka langyah blaoh bruk klak, ye urak ini tamuh tabiak bruk bahrau.

Hadei di tuk mong iek dom thaot binguk kayua urang vak di Rayo sap ndom Việt Nam ba tabiak, ong Mai Kiều – Akaok Sở Ngak nong saong patagok palei pala tỉnh Bình Thuận brei thau, oh ka hu Ban khik iek glai khu bảo tồn thiên nhiên Tà Cú pathau khan ka bruk ini. Hadei di nan, ong Kiều hu iew phon ka dom jabat pambuak pagam tak piah tacei pato pasang iek chip bruk nan:“Urak ini, Sở Ngak nong saong patagok palei pala hu tacei pato Chi cục Kiểm lâm jeng yau Hạt Kiểm lâm Hàm Thuận Nam saong Ban khik iek glai Tà Cú langyah samar chip bruk ini; brei thau cambaih laih saong pathau khan chip bruk nan, oh brei lih mek taneh”. 

Urang pal kaok Sở Ngak nong saong patagok palei pala Bình Thuận jeng ndom lac meda peih bruk pasang iek xử lý trách nhiệm dom jabat saong urang jakar pambuak pagam tal caik rah tabiak bruk jah tak glai pak ini. Meyah mboh urang jakar halei móc nối, bảo kê ka dom urang jah tak glai lih mek taneh pala thanh long, jalan ngak di ngành nan lac langyah catang njauk tui adat hukum./.