BINH THUAN PACANG CAGA KHUAH GLAI 

Di tỉnh Bình Thuận, pandiak bhang dui atah jaik dua bilan ini mai nan ye biak mbuan si khuah glai. Piah trun takik bruk mbuan si khuah glai, dom gah chuc nang di tinh ini daok peih ngak rilo jalan khik iek glai. Urang pambuak bruk The Nhan brei thau :

 Labik khik ramik thiên nhiên Tà Kóu, huyện Hàm Thuận Nam urak ini hu jaik 12 rabau hecta glai. Pak ini, rilo meng lac glai lipik, phun họ menhek pablak saong mblang hareik nan ye bilan thu mbuan si khuah praong. Piah trun takik bruk mbuan si khuah saong khat lahik kayua khuah glai, meng akaok bilan thu thun ini, mban khik ramik Khu Bảo tồn thiên nhiên Tà Kóu hu ba tabiak rilo jalan nghak piah pacang caga khuah glai. Ông Mai Văn Quỳnh, akaok mban khik ramik Khu Bảo tồn thiên nhiên Tà Kóu brei thau :Meng akaok bilan thu, mban khik ramik jeng thau cambaih bhum mbuan si khuah glai. Kol dahlak brei cuh dahlau dom bhum mbuan si khuah,  dom labik kol dahlak hu li-ua jalan pacang apui. Kol dahlak brei dom kapul padam khuah hu mbaok di dom labik mbuan si khuah, meyah khuah praong jang pren pacang padam di kapul, kol dahlak ieu pataom dom kapul karei mai daong.

Jeng dreih yau nan, mban khik ramik glai phòng hộ Hồng Phú daok khik ramik labaih 6.200 hecta glai. Dalam nan hu jaik 4.700 hecta glai pala di dom xã Hàm Đức, Hồng Sơn dalam huyện Hàm Thuận Bắc saong xã Tiến Thành, Tiến Lợi, Phú Hài dalam ban sit Phan Thiết. Dalam dom labik ini, hu rilo glai daok di mbon ceik saong jaik labik pala drak di bhapbini nan ye biak mbuan si khuah, abih di nyu nan lac dalam bilan thu. Kayua yau nan ye, bruk pacang caga khuah glai pak ini jeng hu mban khik ramik biak caik hatai sangka. Mban hu pambuak bruk saong dom kapul kiem lam di labik saong karja dom puk palei hu glai phòng hộ dak padang jalan ngak saong brei kapul gam gam nao khik iek pacang caga khuah glai. Rilo jalan pacang caga karei yau: cuh thực bì, ngak jalan băng cakak apui…jeng hu peih ngak. Ông Nguyễn Thiện Lưu, urang jakar Hạt Kiểm lâm huyện Hàm Thuận Bắc brei thau Kol dahlak ngak ginup dom bruk pacang padam khuah glai, padam glai biak cambaih, akaok bilan thu hu li-ua abih jalan băng cakak apui. Daok Đảng ủy, karja palei hu ginum biai saong gah quận sự, công an, dom akaok palei kuhria caga pandap panda, menuac urang halan hatian hu mbaok tame padam khuah.

Bình Thuận daok lac sa dalam dom labik mbuan si ghuah glai di pakat 5, lac pakat biak nguy hiểm ngan saong taneh glai abih tih labaih 351 rabau hecta, dalam nan hu labaih 200 rabau hecta daok mbuan si khuah. Anak dom bruk kan kandah di lingik thun ini, meng akaok bilan thu, dom puk palei dalam tinh hu ngak dom bruk pacang caga khuah glai. Dom bruk ngak chip yau: pakhang pasiam mBan tacei pato pacang caga khuah glai dom pakat; padang dom tổ, kapul ba akaok nao dahlau tame khik caga glai, pacang caga khuah glai. Ông Huỳnh Hiếu, Phó Chi cục Kiểm lâm Bình Thuận brei thau :Tui panuac khan  meng Cục Kiểm lâm, kol dahlak patagok tanut mbuan si khuah glai dalam tinh meng pakat 4 tagok pakat 5, pakat biak nguy hiểm. Kol dahlak tacei pato dom Po glai pasang iek veik saong pabak tame dom bruk ghuah glai di dom bhum mbuan si khuah).

Anak bruk biak mbuan si khuah glai dalam tuk lingik pandiak bhang yau urak ini, taphia bruk chu dong di dom gah chuc nang dalam bruk pacang caga khuah glai, brei hu bruk paglaong akaok sahaneng saong hatai trach nhiem di bhap bini, abih di nyu nan lac bhapbini daok di labik tapen glai./.

Thúy Linh