Binh Thuan pandar ia siam piah caga El Nino

Tui kuhria mboh dahlau  di Trung tâm khí tượng thủy văn Trung ương, Bình Thuận lac sa dalam dom tỉnh, ban dalam taneh ia meda gaok kan kandah trak meng bruk jhak El Nino. Urak ini, tỉnh ini daok tabiak jalan caga bruk kurang ia pala drak dalam tukvak tal. Việt Quốc, urang vak di rayo sap ndom VN daok di ban raya HCM hu kadha vak ndom ka bruk ini :

Xã Vĩnh Hảo, huyện Tuy Phong lac labik gaok khat lahik trak kayua lingik thu lagu dui atah luac dua thun tapa. Di tukvak ini, urang nong xã Vĩnh Hảo daok tame bruk pala drak veik hadei di 5 vụ gam klak hamu saoh. Dalam bilan Đông Xuân ini, yaom lac ngak jaik 200 héc-ta padai saong njam patam, min urang nong xã Vĩnh Hảo  njauk pandar ia patak pataom meng halau ia pabak brei di danao thủy lợi Đá Bạc. Ông Nguyễn Anh Tuấn, Phó akaok uy mban bhapbini xã Vĩnh Hảo, huyện Tuy Phong brei thau : Ủy ban bhapbini xã Vĩnh Hảo hu tabiak jalan pambuak bruk saong Công ty Thủy lợi peih ngak bilan Đông Xuân, pathau khan jak ba bhapbini peih jalan ia nduac, kuac ribong krong; dua tra veik mikva drei njauk peih ngak tui bruk ba tabiak piah patak pataom halau ia kayua urak ini ia  takik” 

 Lac huyện thulagu di abih dalam tỉnh, maong tame halau ia di 3 danao Phan Dũng, Sông Lòng Sông saong Đá Bạc, huyện Tuy Phong hu tabiak bruk pala drak  2.200 héc-ta padai Đông Xuân. Dom labik oh caga hu ia thủy lợi,  huyện oh ngak padai salih tapa pala njam patam saong dom phun janih phun diuk hu dalam pandiak thu.  Ông Nguyễn Trung Thông, Phó phòng ngak nong huyện Tuy Phong ndom lac : Urak ini, yaom lac kuhri kuhria ka bruk pala drak Đông Xuân 2015-2016, min kol dahlak jeng hu tabiak bruk ka bilan Hè Thu 2016. Kayua lac  meyah oh kuhri kuhria dahlau,  hadei  ini kan kandah ka ia. Bruk ngak dahlau di kol dahlak anak meta ngan saong taneh padai saong njam patam, tuk brei pala drak, njauk khik caga ia ka mikva oh caik brei khat lihik.

Tui Chi cục Thủy lợi Bình Thuận, thun ini hajan mai suai jang, ia hajan takik saong parabha oh samu gauk di dom bhum ba tal bruk ia nduac di dom kraong, rabong dalam tỉnh jeng biar jang ralo thun. Urak ini, dom danao padang piah dalam tỉnh bahrau hu 197 triệu m3, samu 91% bruk ba tabiak. Dua danao thủy điện jeng oh ka ginup ia tui dung tích thiết kế. Dalam nan, danao thủy điện Đại Ninh urak ini barau hu jaik 111 triệu m3, samu 44% thiết kế, nan ye meda kurang ia pruh ka labik hạ du Đại Ninh, bhum taneran  Phan Rí – Phan Thiết, huyện Bắc Bình jeng ye halau ia brei ka huyện Hàm Thuận Bắc. Piah plaih khat lahik ka bilan pala drak tal, langiu bruk patrun labaih 13 rabau héc-ta padai Đông Xuân di Bắc Bình saong Hàm Thuận Bắc, Chi cục Thủy lợi tỉnh Bình Thuận daok hu jalan parabha veik halau ia di abih hệ thống. Ông Phạm Văn Tuyền, phoak Chi cục Thủy lợi tỉnh Bình Thuận ndom lac : Piah langyah bruk tua riya, taphia bruk tui iek ia hajan mai jeng ye bruk lingik tasik piah parabha veik halau ia, Chi cục bhian ngak bruk saong dom trạm, xí nghiệp jeng ye karja dom puk palei brei thau ka halau ia piah dom puk palei hu jalan pala drak ka njauk, khik ka ia hu ginup di dom công trình thủy lợi urak ini.

Maong tame halau ia urak ini hu di 16 danao thủy lợi saong dua danao  thủy điện, Công ty Khai thác Công trình Thủy lợi Bình Thuận hu tabiak bruk pruh ia ka jaik 48 rabau héc-ta phun pala bilan Đông Xuân. Dalam nan, padai saong njam patam labaih 33.240 héc-ta, thanh long 17.700 héc-ta. Kayua ia hu takik, Chi cục Thủy lợi tỉnh Bình Thuận kakei urang nong dalam tỉnh oh pandar ia rilo jang ia di dom trạm thủy nông pabak brei, taphia nan ngak njauk bruk pala drak di puk palei, piah plaih khat lahik kayua kurang ia pruh./. 

Thúy Linh