Thau hu labik dang, yaom glaong di urang hu angan je di bhum bhap bini bangsa takik dalam bruk dak padang saong khik caga taneh ia, dalam dom thun tapa, hu bruk sangka di Trung ương, Tỉnh ủy, UBND tỉnh, gah công an dom pakat hu khan ka dom pakat, karja padang ngak dom sarak piah jhul patagok bruk ngak mbang, ilamu, xã hội, khik kajap an ninh trật tự bhum bhap bini bangsa takik. 

Lingiu di nan, gah công an dom pakat hu khan brei thau dom sarak di Đảng, hukum di Karja hu pambuak pagam tal bhap bini bangsa takik ka dom urang hu angan je dalam bhum bhap bini bangsa takik, meng nan, urang hu angan je hu pathau khan veik piah ka mikva ngak njauk tui. Jak ba urang hu angan je dalam bhum bhap bini bangsa takik tame kapul tự quản, kapul langyah piah samar langyah dom bruk, dom kadha pambuak tal an ninh trật tự di puk palei, pacang cakak oh caik brei jeng labik pandiak, ngak srau kadau tal puk palei.

Meng paglong bruk ngak, dom urang hu angan je dalam bhum bhap bini bangsa takik samar mboh, khan brei karja thau piah pacang cakak rilo bruk ngak suan adat hukum, pathau khan, hu mbaok tame langyah yaok ratuh bruk kandah gauk, meriak gauk dalam bhap bini, tui iek, pato tacei yaok pluh urang ngak suan adat hukum mai veik jalan njauk. Abih di nyu nan lac, dom urang hu angan je hu pambuak bruk haong pakat ủy, karja saong gah Công an langyah hu siam rilo bruk kandah gauk, meriak gauk gah taneh riya saong dom bruk mbuan laik tame gah hình sự yau bruk taong gauk di dom thanh thiếu niên dom bangsa, oh caik ka kol kanjah jhak nyu pacuh pajarak ngak brei srau kadau puk palei, ba tal neh rabha bruk jum pataom bangsa. Lingiu di nan, urang hu angan je dalam bhap bini bangsa takik jeng abih drei jak ba mikva urang nong paglaong hatai sahneng pacang caga tội phạm; pato pakai anek bhik, gauk gar dalam sang, but pajaih di drei oh ngak suan adat hukum; tari taring ngak mbang, pala drak, khik ramik adat cambat tanarakun, khik ramik ilamu bangsa, oh pang, oh tui panuac pacuh pajarak di kol kanjah jhak, ngak siam tui adat di puk, di palei…

Meda lac, dalam tukvak tapa, urang hu angan je dalam bhap bini bangsa takik dalam tỉnh biak biai patagok hu bruk ngak, labik dang di drei saong hu dom rik daong praong dalam bruk khik ramik siam mekre, sron mbon puk palei. Hatai jia di bhap bini bangsa takik brei ka Đảng, Karja drei dak harei dak khang, kajap./.

Nguyễn Phương