Phường Hàm Tiến, ban sit Phan Thiết lac labik hu ralo resort pakat dunya di tỉnh Binh Thuan. Meda lac dom urang buh jien tabiak ngak mbang palih rauh labik ini piah patagok du lịch kayua lac palei tasik Rạng - Hàm Tiến hu takai tasik biak mekre gam saong talei phun li-u biak gheih. Yau nan min, tui thun bilan, hu oh  takik talei phun li-u biak mekre njauk tak klak dalam tuk đô thị hóa, padang ngak dom danak dak pabak ka dulich, saong kayua phun li-u taha.

 Li-u palei Rạng lac thaot binguk siam gheih biak krei, dui pachreih tuai damuai dalam saong langiu negar tuk mai padeih padei di Hàm Tiến - Mũi Né. Meyah luai lahik dom talei phun li-u, labik dulich bhum tasik ini meda takik mekre. Yau nan ye, birau ini, karja palei ini hu pachreih urang nong salih bruk pala dom janih phun takik kein laba tapa pala phun li-u di bhum taneh cuah.

Pachreih tui bruk nan, 4 thun dahlau,  sang sa-ai Nguyễn Văn Hải daok di jkhu phố 2, phường Hàm Tiến tak klak bein pa-ok blait taha. Salih tame nan, sa-ai pala 100 phun li-u xiêm di taneh praong 2.000 met vuong, hadei di 3 thun, dom phun li-u nan daok hu baoh mbang camereip: “ Urak ini, yaok bilan dahlak paih baoh pablei hu 5 trieu dong. Meng nan, sang dahlak jeng duah hu jien tani tanat.”

Ong Nguyễn Sáu, sa urang daok di bhum tasik ini brei thau, bhum taneh cuah tapen tasik Rạng, phường Hàm Tiến biak lagaih piah pala phun li-u. Dahlau diah, pajaih li-u klak lac li-u Tam Quan, Bình Định hu mikva daok pak bhum Ngũ Quảng ba tame pala tui dom mbang panduan mai daok samar patao Nguyễn. Urak ini, mikva salih tapa pala pajaih li-u birau hu kein laba jang, dalam nan mboh ralo lac la-u xiêm.

Anak meta mboh lac, li-u xiêm biak lagaih haong taneh riya saong langik tasik pak ini, gam mbuan iek glang gam brei rilo baoh, yau nan ye urang nong samar mek veik hu phun jien. Ong Đặng Văn Mai brei thau: “Li-u brei baoh meng ala takai phun tagok, biak rilo baoh. Li-u xiêm oh lac li-u drei suai brei baoh. Dalam 3 thun meteh lac hu baoh paik.”

 Ngan saong dom baoh sang urang nong hu raidiuk kan kandah, Kapol Urang nong phường Hàm Tiến hu daong phun jien mesre meng Kapol urang nong ban sit Phan Thiết parabha brei piah peih praong taneh pala li-u. Urak ini, hu 10 baoh sang urang nong dalam phường hu mesre jien abih tih lac 100 trieu dong. Urang nong pala li-u hu mesre phun jien laba lap 0,7% sa bilan, bayar dalam 3 thun. Ong Nguyen Mai Luân, Pho akok Kapol urang nong phường Hàm Tiến, ban sit Phan Thiết brei thau: “Kapol urang nong phường hu brei ka urang nong mesre phun jien, daong palagaih ka mikva mesraiy phun jien pala veik phun li-u duah jien tame, langiu di nan daok padang hu labik hijao mekre, khik hu halau ia di taneh cuah palei Rạng ini.”

           Klau thun tapa, di phường Hàm Tiến, ban sit Phan Thiết, tỉnh Bình Thuận hu yaok pluh ribau phun li-u hu pala birau. Phun li-u xiêm mbuan pala, baoh li-u hu tuai du lịch mai Binh Thuan takre  nan ye pablei hu rilo. Yaom pablei sa baoh li-u di bein mneg 10 tal 12 ribau đồng, bilan pandiak hu tuk labaih 15 birau đồng sa baoh. Kayua yau nan ye, bruk pala li-u di bhum taneh cuah hu daong urang nong di palei duah hu jien tame tani tanat, gam khik hu mbaok meta gheih mekre di bhum tasik palei Rạng, rik daong tame bruk cak rok patagok di gah dulich tinh Binh Thuan./.