Rilo urang bangsa takik hu dong anek pajaih piah patagok kinh te di boh sang 

Dalam dom sarak bangsa hu peih ngak, njauk ndom tal danak dak 135. Ini lac danak dak hu ba mai rilo pren khang, jhul ka bhum palei pala, bhum atah bayah cak rok patagok samar. Tui Ban Bangsa tỉnh Bình Thuận, tỉnh urak ini hu 34 bangsa takik ngan haong labaih 100.000 urang (meblah 8% bhap bani dalam tỉnh). Tukvak 2015 - 2016, Bình Thuận hu 10 xã saong 21 palei hu mbang tui danak dak 135. Tal vaktu ka 2 (2017 - 2020), tỉnh hu Trung ương patui veik daong padang ngak hạ tầng, cak rok patagok bruk ngak mbang di 9 xã saong 20 palei biak kan kandah tui danak dak 135.

Thau lac bruk daong ngak cơ sở hạ tầng lac sa dalam dom asal kadha prong, meng thun 2015 tal ini, tỉnh hu buh tabiak labaih 186 tỷ đồng padang ngak salah blaoh saong ba tame pandar 151 danak dak, dalam nan hu: 90 danak dak jalan mbak nao mai, 14 danak dak ribaong kraong, 21 danak dak sang bac… Meng nan, mbaok meta bhum palei pala hu rilo salih bahrau. Taong abih xã bhum urang bangsa takik hu jalan nhựa nao tapak tal pasak xã. Urak ini 98% baoh sang hu pandar điện negar. Dom baoh sang pandar aia hacih hu 88%...

Piah cak rok patagok bruk ngak mbang kinh tế, paglaong jien mek tame, grap tanat rai diuk di mikva, langiu di bruk peih ngak hợp phần daong cak rok patagok bruk ngak tabiak pabak ginup abih, samar drah pabak pajaih, pandap panda ngak nong, tỉnh jeng peih ngak siam dom sarak yau: brei mesre phun jien; sarak daong brei dahlau saong daong meneing jien pajeng ba… Tapa nan ngak jeng pren khang piah ka mikva cak rok patagok bruk ngak mbang, yam tagok tabiak truh kathaot rambah. Gam haong nan, di bhum urang bangsa takik, dom puk paei jeng hu padang dom bruk ngak mbang lagaih haong puk palei, yau: bruk pala pa-aok blait, phun katak, keo hala tràm; bruk pala thanh long VietGAP, raong limo menek, raong menuk palao di bein…

Bruk peih ngak siam dom sarak bangsa hu daong cak rok patagok rai diuk bhum urang bangsa takik, bruk patruh eik, patrun kathaot mek hu rilo siam mekre, baoh sang kathaot bhum urang bangsa takik trun biak rilo. Akaok thun 2019, bhum urang bangsa takik daok 2.327 baoh sang kathaot, saong 3.177 baoh sang jaik kathaot. Patrun kathaot dalam thun nan lac 734 baoh sang, samu  3,34% sa thun.

Dalam gah ngak nong, jaik abih bhap bani thau pandar ilamu  - kỹ thuật tame dalam bruk ngak mbang tui jalan ngak tabiak pandap panda. Mblang taneh saong sản lượng dom janih phun pala yaok thun hu cak rok patagok, daong ka mikva paglaong jien mek tame, grap tanat rai diuk. Meng nan, dom baoh sang kathaot trun samar./.

Urang lang: Jasi -13/11