Mik va bangsa takik pandar ilamu pala ngak bahrau 

Mai tal palei Tuy Tịnh 1, xã Phong Phú, huyện Tuy Phong, tỉnh Bình Thuận, khaol dahlak mboh biak tatuak drei tuk dom mblang hamu kurang aia urak ini jeng dom bein medar hijao, baoh bak dhar, racam yamen.

Daok cakak dhar taha caga ka mbang medar bahrau, sa-ai  Đặng Thái An, urang Cam daok di palei Tuy Tịnh 1 khan lac: dahlau diah, 1 sào taneh ngak padai di sang lac taneh tanu, kurang aia pruh, năng suất biar. Hu kapul urang nong huyện brei nao rivang iek, bac megru bruk pala medar hijao di urang nong tỉnh Ninh Thuận, mboh laghaih haong taneh hamu di sang drei, sa-ai An mai sang ngak chip. Tal urak ini, hadei di labaih 5 thun pala saong mong iek, phun medar brei rilo baoh saong kein laba glaong… Mik va thau pandar ilamu pala padai bahrau

Tỉnh Bình Thuận urak ini hu jaik 50 ribau ha taneh ngak padai. Mikva urang nong pak ini rilo meng pruh aia tui jalan meng kan lac pruh ka nyu dauk, aia pruh ka sa 1 hecta padai rilo jang jaik 2 mbang meteh dut haong phun pala kaoh karei karei .

Dom thun jaik di ini, langik tua riya pandiak bhang dak harei dak khang. Kayua yau nan ye, tỉnh pachreih bhap bani salih janih phun pala gam haong salih bahrau jalan ngak mbang ka nyu laghaih haong darak pasar. Ong Nguyễn Văn Chi, Akaok pasak dịch vụ bhum ceik tỉnh Bình Thuận – jabat pabak khak drak, pandap panda ngak nong ka bhum urang bangsa takik brei thau:

Dalam bilan pala drak thun 2020 ini, pasak hu jao bruk saong jeng hu peih ngak blaoh, dom baoh sang hu trun pajaih blaoh. Daok dom labik karei, mikva caong khin salih meng taneh ngak padai oh hu kein laba tapa pala dom janih phun mbang baoh, atau phun pala karei saong xã hu pok panuac likau ye pasak pabak chip.

Piah ka bruk ngak ini cak rok patagok khang kajap, ong Phan Văn Tấn, Phaok akaok Sở Ngak nong saong patagok palei pala tỉnh Bình Thuận brei thau, anak tal, gah ngak nong daok pachreih bhap bani salih dom taneh ngak padai oh hu kein laba tapa pala dom janih phun hu yaom glaong yau: madar, kandiuk Thái, panat Thái, pambak siam tame pren khang di taneh riya piah paglaong yaom phun pala saong patagok jien mek tame ka urang nong:

"Urak ini gah ngak nong jeng pambuak haong dom puk palei palih ruah dom phun pala ka nyu laghaih, hu labik pablei piah pambuak bruk ngak haong doanh nghiệp. Gah ngak nong jeng pasang iek veik pren khang di yaok labik hu phun pala, daong ka mikva urang bangsa takik salih dom phun pala karei yau phun mbang baoh, laghaih haong taneh riya saong jalan aia pruh piah paglaong rai diuk di mikva."

Urak ini Bình Thuận daok yam tame bilan Hè thu 2020 ngan haong mblang taneh pala drak jaik 51 ribau hecta padai saong tangeiy. Di dom labik bhian kurang aia pruh, gah ngak nong pachreih urang nong sahneng kuhria, salih janih phun pala halei ka nyu laghaih haong taneh riya saong jalan aia pruh. Hu yau nan , meng plaih hu bruk klaak taneh saoh dalam bilan tua riya pandiak bhang./.

Urang lang: Jasi- 25/6