Bilan tuai dunya di Bình Thuận meng akaok bilan 11 tal bilan 5 thun hadei, tukvak tuai dom taneh ia la-ar bhian nao plaih bilan barak. Bahrau yam tame bilan tabung glaong, min labik du lịch cao cấp Hàm Tiến – Mũi Né (ban sit Phan Thiết, Bình Thuận) dom harei tapa mboh chrai chrai tagok. Tuai damuai tuh mai ini biak rilo. Dom labik menei ia tasik bak tuai nao me-in, cambu pandiak, tram rup dalam ia li-an jangaih. Tal bhum tasik hoang sơ Mũi Né – Bình Thuận, tuai dunya mboh biak takre. 

   Sa-ai Erin Phillips saong ayut likei meng Australia bahrau mai tal Mũi Né. Sa-ai Erin brei thau: “Kol dahlak tagok Google piah duah dom labik nao me-in sambai, kol dahlak mboh Mũi Né. Labik ini biak mekre, hu rilo mbon cuah saong mlang tasik mekre, karei jang duk saong rilo labik di Việt Nam. Labik ini nyu kandang joa saong meda ieu hu taxi. Dahlak mboh lac labik ini biak siam piah padeih padei” 

    Tuai tal Mũi Né – Bình Thuận mai meng rilo taneh ia karei di gauk. Hu dom tuai meng Bắc Âu saong tuai Nga bhian randap meng livik mai, Mũi Né jeng daok taduan raok rilo tuai Trung Quốc mai padeih padei. Sa-ai Đào Thái Tuyết Nhung, urang dang akaok gah raok tuai Khu du lịch PôShaNư (Phan Thiết) brei thau, tui mai ini rilo meng đặt phòng trực tuyến tapa internet. Yaom lac oh tapa jalan di dom hãng lữ hành, min tuai mai pak ini biak rilo:  “Tal tukvak ini,bilik ndih daok ka tuai bak hu 65%. Tui kuhria mboh dahlau, urang bhian mai saong đặt phòng tuk jaik harei mai rilo jang yaok thun. Tuk ini tuai meng Bắc Âu saong Úc mboh rilo jang” 

    Labik padeih padei Seahorse rilo meng lac labik mai tal di tuai Nga. Labik ini hu 151 bilik ndih daok meda raok hu labaih 300 tuai. Tame bialn tuai dunya, bilik di labik ini bak tuai labaih 85%. Ong Trần Anh Thi, Giám đốc điều hành labik padeih padei Seahorse brei thau, thun ini tuai dunya mai rilo jang yaok thun, dom hãng lữ hành khan lac daok ba rilo tuai tal Bình Thuận,  saong hu panuac ieu dom labik ngak mbang gah  du lịch paglaong jang chất lượng duh tuai damuai. Ong Thi lac: Dom hãng lữ hành dunya lingiu di bruk ngak mbang duah jien, urang daok hu panuac kakei brei ngak yau habar piah bruk duh ka tuai damuai hu siam jang, nan lac anek menuac Mũi Né, menuac ngak du lịch di Mũi Né njauk ngak siam jang. Brei rap ar tuai damuai. Ini lac kadha biak praong.” 

    Amuk  Nguyễn Lan Ngọc, Phó Giám đốc Sở Ilamu - Thể thao saong Du lịch Bình Thuận brei thau, tui pambuak bruk di dom hãng lữ hành saong dom labik ngak du lịch pak ini, mboh lac Bình Thuận meda hu tuai biak rilo dalam bilan du lịch thun ini. Gah du lịch Bình Thuận hu tacei patao dom labik ngak du lịch paglaong chất lượng duh tuai, khik kajap angan du lịch Mũi Né – Phan Thiết – Bình Thuận dalam hatai tuai damuai “Ini lac bilan tuai du lịch dunya mai Bình Thuận biak rilo di abih. Kayua yau nan ye, dom doanh nghiệp du lịch dalam tỉnh saong dom labik ngak mbang gah du lịch hu kuhria caga biak siam, meng labik laboa tal menuac urang piah pabak hu siam di abih ka tuai damuai tuk mai tal Bình Thuận.” 

    Dalam 10 bilan tapa, tỉnh Bình Thuận taduan raok jaik 4 triệu mbang tuai damuai. Dalam nan, tuai du lịch dunya hu jaik 434.000 mbang, rilo jang 17% dut saong tukvak ini thun dahlau, dom tuai mai meng dom taneh ia: Nga, Trung Quốc, Hàn Quốc, Đức, Anh, Mỹ, Pháp, Úc saong dom taneh ia karei. Pasiam dom bruk gah môi trường, jalan nao mai di dom labik du lịch, Bình Thuận daok kham merat khik angan lac labik siam piah mai tal di tuai dalam taneh ia saong lingiu negar./.