Sang amuk Lê Xuân Linh daok pak xã Hàm Hiệp, huyện Hàm Thuận Bắc pala 1,5 héc-ta thanh long. Hadei di ralo thun hu mbaok tame danak dak pala ngak tui chuẩn VietGAP, urak ini sang amuk oh daok ngak tui tra kayua lac: thanh long VietGAP jeng hu yaom pablei samu, gaok mai biar jang thanh long pala tự do. Amuk Linh lac: VietGap bo yaom pablei yau ini, drei mboh bất mãn ralo. Yaom kaom biar ralo, drei oh ngak tui VietGap tra.

     Mbiah tal urak ini, baoh thanh long Bình Thuận ralo meng hu pablei tapa darak pasa Trung Quốc. Ini lac darak pasa  biak mbuan, oh pasang iek bruk kandaong labaih jru khik caga phun pala, oh caong dom tiêu chuẩn ka an toàn kaya nong; tok khin baoh  thanh long praong, mekre, hadah jangaih lac hu paje. Sa-ai Lê Thanh Trâm, sa urang blei baoh thanh long di huyện Hàm Thuận Bắc brei thau: Thanh long tal bilan, po bein iew mai, drei iek hu yaom ye drei blei. VietGap atau oh VietGap jeng blei sa yaom, oh neh rabha hagait. Blei blaoh pablei tapa Trung Quốc, gah nan oh caong VietGAP.

    Pala thanh long tui chuẩn VietGAP abih biak ralo pren yava. Urang nong njauk tapa dom mbang pathram kayua jabat karja peih tabiak. Bein pala njauk parabha lô, taong số piah khik iek catang,rami  ramik bein pala njauk ilamu. Dalam tuk pala, urang nong njauk cih nhật ký tani tanat yaok công đoạn, bhian ngak vệ sinh bein, buh khak, pruh jru njauk liều lượng, njauk quy trình...

      Anak meta mboh lac, phun jien, pren yava buh tame biak prong, min thanh long VietGAP oh ka hu darak pasar. Hadei di tuk paik, baoh thanh long hacih pablei tabiak jeng yau thanh long karei. Nan ye nyu ngak urang nong bất mãn. Sa-ai Huỳnh Công Truyền, sa dalam 31 urang daok ngak thanh long tui jalan VietGAP dalam Hợp tác xã thanh long Hữu cơ Phú Hội brei thau: Oh ba mai kein laba hagait ka urang ngak nong. Tame VietGAP yau oh VietGAP. Dalam dom baoh sang nan, dahlau diah jeng daok ngak tui. Meda ndom lac, kayua urang dang akaok jeng daok khik ngak jalan nan, yau dom baoh sang khaol dahlak jeng ngak tui. Daok dom baoh sang karei ye klaah abih paje.

        Hợp tác xã Thanh long Hữu Cơ Phú Hội lac sa dalam dom kapul pambuak bruk nao dahlau peih ngak danak VietGAP pak Bình Thuận. Tuk bahrau peih tabiak, dom xã viên biak chreih chai. Dalam thun 2009, hợp tác xã ini hu 100 baoh sang ngak abih tih labaih 110 héc-ta. Min tal harei ini, tok daok veik 31 baoh sang daok khik ngak 49 héc-ta, 69% xã viên tabiak truh danak dak thanh long hacih. Ong Ngô Xuân Hiền, Akaok Hợp tác xã Thanh long Hữu cơ Phú Hội, huyện Hàm Thuận Bắc brei thau: Tal urak ini, mikva abih chreih chai paje. Makna kayua  baoh oh mekre yau thanh long oh ngak tui VietGAP. Min jeng daok hu dom urang ngak tui  VietGAP, kayua dom urang nan saneng lac, urang njauk ngak thanh long hacih ka. Hadei ini darak pasar pasang iek catang, urang hu thanh long hacih piah pablei.

Tỉnh Bình Thuận urak ini hu jaik 8.000 héc-ta thanh long mek hu chuẩn VietGap, meblah 30% mblang taneh thanh long dalam tỉnh. Meng thun 2014 tal ini, pak dom bhum pala thanh long prong di tỉnh yau Hàm Thuận Nam, Hàm Thuận Bắc saong Bắc Bình, hu biak rilo urang nong daok klak danak dak VietGAP. Cambaih laih nan lac, mblang taneh klak VietGAP di thun 2014 lac 650 héc-ta, thun 2015 lac 485 héc-ta; 6 bilan akaok thun 2016 tagok tal labaih 1.150 héc-ta.

      Tui jabat brei harak chứng nhận (nan lac Pasak Roh duah Patagok Thanh long Bình Thuận), dom baoh sang klak pala tui VietGAP kayua  mboh kein laba anak meta. Dom baoh sang klak VietGap oh sahneng mboh ka harei hadei di baoh thanh long hacih, nan ye oh mbak carak haong bruk daok ngak. Jabat ini daok pambuak bruk haong dom puk palei daok ngak brei paglaong akaok saneng ka bruk pala thanh long hacih. Amuk Đào Thị Kim Dung, Akaok Pasak Roh duah Patagok Thanh long Bình Thuận brei thau: Khaol dahlak daok kham merat abih hatai, gam haong dom puk palei, patagok jang bruk jak ba piah ka dom baoh sang urang nong mboh kein laba harei hadei, mboh yaom glaong di bruk ngak tui VietGAP dak harei dak ralo jang. Saong dahlak jeng caong khin dalam tukvak anak tal, hatai saneng di bhao bani ka bruk ini hu patagok.

       Danak dak pala thanh long VietGAP hu tỉnh Bình Thuận buh tame ralo phun jien, peih ngak meng labaih 7 thun tapa. Ini lac jalan nao njauk haong xu thế hội nhập, piah paglaong angan je thanh long Bình Thuận, brei mboh trách nhiệm di urang nong puk palei ngan haong pren yava di urang blei pandar. Tuk pala ngak hu siam mekre an toàn, ye baoh thanh long meng hu pablei pak ralo negar angaok dunya. Dalam tuk thanh long Bình Thuận daok having akaok duah jalan piah patrun bruk pagam pambak tame darak pasar Trung Quốc, ye bruk klak chuẩn VietGAP yau urak ini meda ngak ka yaom di baoh thanh long Bình Thuận patrun tuk duah darak pasar bahrau./.