Baoh thanh long bahrau paik 

Urak ini thanh long pablei tabiak negar langiu janih 1, baoh prong labaih meteh ký di Bình Thuận hu dom urang pablei salih mai blei yaom 3.500 đồng/ký. Janih sit jang yaom 1.000 đồng/ký saong janih daok veik tok hu 200 đồng /ký. Sa-ai Trần Tú Loan, daok di xã Hồng Thái, huyện Bắc Bình hu labaih 700 gheng thanh long hatai patih, mbang ini baoh hu rilo, nan ye sang buh jien tabiak blei khak, jru mong iek biak tani tanat. Sahneng lac 2 tấn baoh tuk tasak meda pabak hu meneing phun jien buh tabiak. Thau halei yaom kaom trun biak biar ngak ka sang gaok kan kandah. Tui kuhria di urang nong, dalam 3 bilan iek glang , thanh long hatai patih hu yaom 7.000 đồng/ký saong thanh long hatai bhong hu yaom jaik 9.000 đồng/ký,  sang bein meng hu laba.

Brei thau ka makna ngak ka yaom thanh long trun khang lac kayua darak pasa blei tame rilo abih nan lac Trung Quốc daok patrun bruk blei tame kyua jit Covid 19. Tui nan dom urang pablei salih blei takik veik saong pilih ruah catang jang.

Rilo urang pala mboh yaom blei lap, nan ye brei baoh tuan angaok dhal. Daok baoh sit hijao puac abih di bilan baoh, urang nong paik klaak abih piah raong dhal. Yau nan min,  ini oh njauk lac jalan ngak siam kayua dom harei tapa  langik hajan gam gam ngak brei ẩm độ không khí glaong ngak ka ruak đốm nâu angaok thanh long tamuh tabiak saong pambak prong.

Taphia di nan, bruk dom urang  pablei salih padang dom labik blei tame tui hatai, dom baoh thanh long jhak, rilo meng njaom đốm nâu, bimao đồng tiền oh hu dom urang pablei salih pataom klaak ye mbuan ba tal bruk patagok mblang taneh thanh long njaom ruak dalam tukvak anak tal.

Tui Sở Ngak nong saong patagok palei pala Bình Thuận, dalam tỉnh pala hu labaih 30.000 ha thanh long, năng suất labaih 550.000 tấn yaok thun. Tok hu takik  trang trại saong hợp tác xã pala thanh long chuẩn VietGAP saong GlobalGAP pablei tapa dom darak pasar kan tame yau: Đức, Mỹ, Nhật, Australia, Ả Rập, Dubai, Ấn Độ, Indonesia... Daok veik rilo meng hu pablei tapa Trung Quốc tui jalan tiểu ngạch. Ta-eng di huyện Bắc Bình hu labaih 2.000 ha thanh long, dom sang urang nong mesre phun jien di Gilang pariak Ngak nong saong patagok palei pala Việt Nam, dhal Bắc Bình piah mong iek ka phun pala ini lac labaih 7.000 baoh sang ngan haong phun jien mesre labaih 850 tỷ đồng.

Dalam tukvak daok cang dom gah, dom pakat lang talaih kan kandah dalam bruk pablei tabiak negar langiu, jit ruak pasang iek hu saong tani tanat, gah ngak nong hu panuac kakei urang nong njauk sahneng kuhria tuk bruk jien tabiak truac gom ka thanh long tabiak baoh suan bilan, plaih khat lahik jien padai tuk tal mbang paik baoh bahrau./.

Urang lang: Jasi-10/8