Pathau mikva saong taong abih gauk! Yaom lac daok atah di pasak y tế, sang iek ruak tuyến huyện, tuyến tỉnh labaih kurang pluh mbiak jalan, min blai y tế xã Tài Văn, huyện Trần Đề, tỉnh Sóc Trăng harei halei jeng hu tal yaok pluh mbang urang mai iek ruak. Hu yau nan meng hu urang jakar y tế labik ini ngak brei bhap bini jia. Kadha vak di Thạch Hồng, urang vak di rayo sap ndom VN daok di bhum taneran kraong Cửu Long: 

Oh ka tal 7 tuk mesup, min blai y tế xã Tài Văn hu biak ralo mikva mai iek ruak. Gah dalam, urang jakar y tế jeng daok ngak bruk. Saai Kim Sương daok di palei Tài Công, ba kamuan mai iek ruak brei thau, urang jakar y tế blai biak abih hatai jai saong urang ruak, mikva biak njauk hatai.

 “Rilo thun ini mai, blai ini ngak bruk biak siam, sangka tal pren yava di bhap bini. Tuk mai iek ruak, urang jakar y tế di labik ini tangi sua biak cambaih laih ruak kik di drei. Taong abih urang jakar di labik ini biak siam saong urang ruak”.

Daok amuk Thạch Thị Cao daok di palei Hà Bô lac, yaom lac sa blai y tế xã, min amuk biak jia tame bruk iek glang pren yava di urang jakar y tế di labik ini. Amuk ruak tagok drah nan ye gam gam mai tal blai piah mek jru menyum:

 “Pren yava oh siam dahlak mai ini iek ruak, khám bloh menyum jru dahlak mboh khang kajap pren yava veik. Urang jakar y tế di labik ini biak abih hatai jai, dahlak biak njauk hatai”.

Tui akaok blai y tế xã Tài Văn, Y sĩ Phạm Hồng Gấm brei thau, yaok harei, blai taduan iek ruak meng 70 tal 80 mbang urang ruak, dalam nan, ralo meng lac mikva Khmer. Bruk njauk biai nan lac, jaik abih urang ruak di labik ini jeng hu BHYT dalam bruk khám iek ruak.

Yaom lac hu ralo mikva mai iek ruak, min jaik 9 tuk mesup, bruk khám iek ruak jeng jaik salah abih, tok di daok dom urang barau mai.   

 Akaok blai y tế xã Phạm Hồng Gấm brei thau, Tài Văn lac xã ngak nông, bruk ngak mbang duah jien di mikva lac ngak padai saong raong glang. Yaok harei, mikva tabiak hamu biak avar; ini jeng lac makna blai jak ba urang jakar mai dahlau tukvak 7 tuk  piah iek glang pren yava ka mikva.

“Di labik ini hu mô hình iek ruak avar jang piah urang ruak oh cang suai. Mboh mô hình bo blai peih ngak brei ka nhân viên, ye dom adei jeng mai ngak avar, cuk khan ao siam mekre njauk lac sa urang gru jru. Ndom puac bingi pang haong urang ruak, tacei pato njauk hatai urang ruak”.

Blai Y tế xã Tài Văn urak ini daok biak sit sot, min oh lac yau nan bo ngak kan kandah tal bruk iek glang pren yava di mikva. Salih tame nan, duk khám hu rami ramik tani tanat, meng trang thiết bị tal yaok nhiệm vụ di urang jakar y tế; nan ye bruk khám, iek ruak, brei jru tuk halei jeng rah tabiak dalam siam mekre, darah samar. Taphia di nan, yaom lac oh ka hu bác sĩ min blai biak sangka pato pasram urang jakar, nhân viên, meng nan, dak harei dak pabak hu bruk iek glang pren yava ka bhap bini. 

Meda lac, bruk abih hatai jai di urang jakar y tế blai Y tế xã Tài Văn huyện Trần Đề, tỉnh Sóc Trăng ka pren yava di bhap bini, di xã hội saong ka rai diuk di mikva biak njauk iek praong; blai jeng rik daong ngak patrun tải ka sang iek ruak tuyến angaok; lac sa kapul njauk bac megru, ngak tui dalam tukvak urak ini./.