Urang tame blei tamekai dong urang nong 

Kayua jit ruak Corona, rilo urang nong di tỉnh Gia Lai dok having akaok kayua  tamekai dok veik biak rilo, oh pablei hu. Urang blei tamekai di bein yaom 1.000 đồng/sa kg ngak ka urang laik tame bruk yau daok dua plak tangin saoh . Piah klah rabha kan kandah song mik va, saai Lê Thị Tưởng, palei Phú Yên song urang dalam sang buh jien kadung tabiak labaih  40 triệu đồng piah blei 10 tấn tamekai  di urang  nong  Gia Lai yaom 4.000 đồng/sa kg, bloh pah radeih pajeng mai ban raya HCM alin brei saoh ka urang. Yaom blei ni lac urang nong laba takik min jeng ginup phun jien uh tabiak ngak. Saai Tưởng khan lac: Drei bhian nao ngak pahla nan ye mboh bruk njauk dong dalam tangin drei ngak hu ye ngak . Mboh tamekai dok labaih veik biak rilo, ye drei blei mai bloh alin brei ka mik va. Mik va rik tame dong ka urang nong hu hadom ye rik tame piah klah rabha kan kandah.

        Labaih 10 tấn tamekai mai tal  ban raya HCM hu pajeng mai caik di tapen jalan An Dương Vương, quận 5 song labaih  2 maong hadei  brei abih ka bhap bini. Rilo menuac mek 2 boh tamekai  ye rik daong meng  10 tal  50 ribau  đồng. Ngan song yaom jien labaih  21 triệu đồng pataom mek hu, saai Tưởng song gauk gar dalam sang nao tal  Long An blei  thanh long ka urang nong. Saai Trần Thị Lan, dok di  quận 3, TPHCM mai mek tamekai song yar jien, lac: Drei sahaneng  urang nong luac thun biak gleih glar bo gaok bruk tamekai oh pablei hu, urang nong oh hu jien pandar cai. Drei mai blei tamekai ye dahlau Tết yaom siêu thị pablei yau habar drei bayar veik jien yau nan.

Jeng piah dong ka urang nong patrun khat lahik  kayua kaya nong dok gar veik  kayua jit ruak, dom siêu thị điện máy Thiên Hòa di  ban raya HCM jeng hu buh tabiak jiak  100 triệu đồng blei yaok pluh  tấn tamekai  yaom  4.000/kg piah dong urang ngak bein  di  tỉnh Gia Lai. Tamekai ni hu ba mai sa  siêu thị angaok jalan  Nguyễn Văn Linh, quận 7, alin brei saoh ka labaih  1.000 urang jakar,  công nhân viên song tuai di công ty.

Dom bruk ngak hu makna yau nan  hu pambak prong hatai siam, daong pren ka  urang nong yam tapa kan kandah.  Muk Nguyễn Thị Ngọc Liên, Giám đốc Maketing Hệ thống điện máy Thiên Hòa brei thau:Khol hulin cong khin hu ngak rilo bruk hu makna yau nan. Cong khin dom bruk ngak sit nihu dong pambak hatai anit ranam gauk , daong gauk dalam tuk kan kandah ni )

Anak bruk jit ruak cúm Corona oh ka mboh trun, ngak kan kandah tal bruk ngak mbang, pablei salih, dalam nan hu bruk pablei kaya nong di mik va urang nong, dom bruk ngak siam di dom menuac urang, dom kapul nyaom, doanh nghiệp biak njauk pok meyaom song pambak prong dalam bol bhap rahra./.

Urang lang: Hanipha- 15/2