Gu radaih apui Thống nhất SE5/SE6 meda hu peih viek hadei di tuk padieh nduac kayua hajan ribuk gah krieh negar

“Samar ngak salah bản đồ brei thau dahlau bruk mbuan glut jaleih, ia dauk, khik siam lagaih dalam bruk pacang caga bala meng langik tasik, trun tal tanut biar di abih” nan lac panuac kakei di Phó Thủ tướng Trịnh Đình Dũng, akaok mban pato tacei di Trung ương ka bruk pacang caga bala meng langik tasik di mbang nyaom biai pacang caga ribuk ka 10 peih tabiak di harei kabroi. Mintri Tài nguyên Môi trường brei thau, meng thun 2019 tal thun 2020, dom tỉnh bhum cek gah barak saong gah Bắc Trung bộ padang ngak hu bản đồ brei thau dahlau. Thun 2020, mintri hu pambuak haong dom tỉnh Quảng Nam, Quảng Ngãi padang ngak bản đồ dom labik mbuan glut jaleih di dom labik ni. Pambuak tal bruk pacang caga ribuk ka 10, Phó Thủ tướng ieu kakei dom tinh, bal oh iek lap, pataom tame pasang iek gilai di tasik, pato tacei, ba tame labik salamat.

Anak bruk kan kandah di ribuk ka 10, bộ đội Biên phòng dom tỉnh, ban tapen tasik meng Thanh Hóa tal Khánh Hòa hu pambuak bruk song dom puk palei, boh sang po kapan, thuyền trưởng pathau khan song tacei pato ka 49.877 gaiy kapan piah samar plaih nyaik atau tabiak truh labik mbuan gaok ribuk. Dom tỉnh ban song gah bộ đội ieu pataom hu jiak 255 ribau urang song 2.294 pandap panda dom janih, dalam nan hu 8 sruh kapan haoh, halan hatain pacang cakak tuk rah tabiak bruk kanyah jhak. Pagam tal bruk 23 urang tong ikan lahik di 2 kapan tong ikan Bình Định, kayua langik tasik oh siam angaok tasik, dom kapan Hải quân brei padeih bruk dong duah urang gaok bala, mai veik căn cứ piah khik caga siam mekre salamat. 

Tổng công ty jalan pasei Việt Nam brei thau, meng harei 5/11, gu radaih apui Thống nhất SE5/SE6 meda hu peih viek hadei di tuk padieh nduac kayua hajan ribuk gah krieh negar. Yau nan, di sruh radaih apui gah Bắc - Nam yaok harei hu 4 gu radaih apui Thống nhất duac luac meng Hà Nội - Sài Gòn saong duac gilai viek. Piah klah rabha dom kan kandah haong bhap bini bhum krieh negar, Tổng công ty jalan pasei Việt Nam meda trun 20% yaom harak vé ka tuai damaui nao – mai tal dom mblang radaih pui di Quảng Ngãi, Quảng Nam, Đà Nẵng, Huế, Quảng Bình saong Hà Tĩnh tal puac harei 15/11.

Công an tỉnh Đồng Nai bahrau tabiak mbaok Kapul ngak bruk khik caga an ninh trật tự piah peih ngak danak dak mblang kapan haoh Long Thành hu 50 urang jakar, urang lin di công an tỉnh. Kapul nan hu brei bruk daong ka Giám đốc Công an tỉnh Đồng Nai peih bruk pasang iek khik caga siam mekre salamad luac harei melam di dom jalan, palei pala dalam labik padang ngak mblang kapan haoh Long Thành. Mblang kapan haoh Long Thành hu padang ngak angaok taneh prong labaih 5.000ha song duh ka 100 triệu mbang tuai damuai song 5 triệu tấn pandap panda yaok thun. Ni lac danak dak prong di negar piah patagok gah pajeng ba meng kapan haoh, patagok bruk meriak gauk song dunya, patagok talei pambuak gauk di Việt Nam song dunya. 

Anak bruk bhap bini rilo mbang duah mboh baya nduac tabiak truh var, UBND tỉnh Cà Mau hu pato tacei dom jabat jaka paglaong bruk khik ramik athur hoang dã raong dalam tỉnh. Tui nan, jao ka Sở ngak nong saong patagok palei pala pambuak haong dom kapul pasang iek bruk raong glang, prien raong di dom labik raong athur hoang dã saong anek baya. gam tui di nan pato tacei bhap bini dom kadha khik ka salamat; langyah dom bruk ngak chung. Dahlau di nan, harei 22/10, bhap bini xã Tân Phú (huyện Thới Bình) mboh hu drei baya trak 15 kg. Harei 18/10, bhap bini xã Tân Tiến (huyện Đầm Dơi) jeng cap mek hu 1 drei baya trak labaih 10kg di danao raong hadang.

Njauk ngak pakhang meng dong hu ka dom urang pal akaok châu Âu pasang iek hu jit ruak Covid-19 – nan lac panuac di Tổng Giám đốc WHO Tedros Adhanom Ghebreyesus dalam kadha ndom puac jiak di ni anak harak mbao.. Tui nan, bruk patagok urang njom mbak Covid-19 di châu Âu song di labik Bắc Mỹ tuk vak jiak di ni brei mboh dom urang pal akaok di 2 labik ni dok dang anak tuk vak cuang kandah . Panuac di WHO hu batabiak dalam tuk rilo negar châu Âu njauk brei dok atah di gauk sa binah atau tong abih labik dalam negar piah pasang iek jit prong Covid-19.

Mblang kapar haoh dunya Narita (lac mblang kapar haoh praong abih di Nhật Bản) hu peih pakak pasak duk iek PCR Covid-19. Nan lac bruk kuhria caga hu makna praong piah ka negar ni peih viek dom mbang par dunya njauk padieh rilo bilan tapa kayua jit Covid-19. Tuk ba tame ngak, pasak PCR meda duk iek urang negar langiu tame Nhật Bản. Dahlau di nan, di harei 30-10, Nhật Bản brei pacadu bruk patakik nao mai ngan saong 9 negar saong bhum châu Á. Meng labaih 100.000 urang njom saong 1.773 urang metai, Nhật Bản lac nagar pacang cakak jit siam jang abih duk saong rilo negar hu gah kinh tế patagok praong karei.

Tui khaw tin Áo, melam 2/11 rah tabiak sa bruk cuh gauk angaok jalan jiak sa sang megris Do Thái di pasak ban ine Viên (Vienna). Hu takik di abih sa urang metai song labaih 15 njauk rambuac. Dahlau di nan, Rayo papar binguk Áo brei thau sa nyom khủng bố hu chap sa urang dok dalam sa nhà hàng di labik karei di Vienna njauk di tuk vak hu bruk cuh gauk di pasak ban. Tui dom harak mbao di negar ni brei thau, sa dalam dom khol khủng bố tong bom pametai rup eng . Mintri Nội vụ Áo brei thau sa nghi phạm njauk chap mek./.

Urang lang: Hani Pha – Thu Thảo – 03/11 10:25:14