Dua sruh radaih 3 gong di metro ka 1 (Bến Thành - Suối Tiên) kuhria ba mai Ban raya HCM di akok bilan 5

Page ini 23/4, Mentri Y tế brei thau hu veik 8 urang birau njom Covid-19, taong abih jeng lac dom urang tame negar. Yau nan, mbiah tal harei ini dalam negar hu 2.824 urang ruak, dalam nan hu 2.490 urang taong dhit ruak brei nao sang. Harei 22/4 jeng lac harei klauk jru rilo abih ngan saong 20.200 urang klauk jru dalam harei, taong abih tih urang hu klauk jru tagok tal 128.000 urang.

Bộ đội Biên phòng Long An gam haong dom jabat jaka pak ni bahrau cap khik 6 urang tabiak negar meng jalan tapen negar tapa Campuchia, di labik ấp 3, xã Hưng Điền A, huyện Vĩnh Hưng. Dom urang ni khan brei thau daok caga nao tapa Campuchia duah bruk ngak. Dom urang nan daok brei daok karei saong ngak harak gar langyah tui adat hukum. Meng akaok thun tal urak ni, taeng di gah jalan tapen negar atah 22km meteh, kayua Đồn Biên phòng Bến Phố, huyện Vĩnh Hưng, tỉnh Long An pasang iek hu mboh 17 bruk nao tapa jalan tapen negar suan hukum, cap mek 58 urang, dalam nan hu 18 urang negar langiu.

Dua sruh radaih 3 gong di metro ka 1 (Bến Thành - Suối Tiên) kuhria ba mai Ban raya HCM di akok bilan 5, dua bilan hadei di nan, hu veik 4 sruh radaih janih 6 gong ba tame. Tui Mban khik iek jalan pasei ban sit Ban raya HCM, 6 sruh radaih nan hadei ba tame depot Long Bình, po thầu Hitachi kuhria caga ba 5 sruh radaih trun jalan pasei T1; radaih daok veik brei ba trun jalan pasei karei. Metro ka 1 kuhria abih tih phun jien buh tame labaih 43.700 tỷ đồng, atah jaik 20 km ngan saong 3 ga ala taneh saong 11 ga angaok glaong. Danak dak urak ini ngak hu labaih 83% , kuhria ba tame pandar di thun 2022.

Tỉnh Bình Phước hu 40 bangsa, dalam nan bangsa takik meblah labaih 20% rahra. 5 thun tapa, mban bangsa HÐND tỉnh hu peih pasang iek bruk padang ngak sarak ka labik daok, bruk ngak mbang, buh jien tame ngak hạ tầng, pato magru, y tế… ka bhap bini bangsa takik. Dalam nan, iek glaong bruk pato tacei bruk ngak, sarak patrun kathaot, brei masre jien hu laba bier, daong cak rok patagok bruk pala drak, ngak mbang, khik ramik taneh riya saong pabak brei harak chứng nhận quyền pandar taneh … Rilo panuac likau hu UBND tỉnh caik hatai tui pang saong pato tacei dom sở, gah, bhum palei peih ngak siam lagaih jang sarak bangsa.

Meng harei 30/4 tal harei 3/5, di Cần Thơ peih ngak Harei pataom “Ahar – baoh kayau Mỹ Khánh” ngan saong kadha “Pahe bhum Pei negar”. Ini lac bruk ngak piah pahadar 46 thun harei peih paha gah Meraong negar, yasa taneh ia (30/4/1975 - 30/4/2021), harei Dunya urang ngak 1/5. Harei pataom nan piah pachreih bruk sahneng duah di urang ghieh tangin ngak ahar di bhap bini, pala saong patagok dom janih phun mbang baoh yamen bingi, daong tuai damuai duah thau ka ilamu gah Meraong negar tapa danak dak kaya mbang menyum “ Darak palei” ngan saong yaok rituh pandap mbang pahe bingi Nam Bộ, labik sang ilamu kiến trúc di 4 bangsa Kinh – Hoa – Khmer – Cam saong palei ngak meng kan.

Jit Covid-19 di dunya jeng daok rahtabiak sarau kadhau, 3 adit jaik ni yaok adit tui kuhria hu 5 triệu urang njom bahrau, 80.000 urang metai, dom urang njom dalam 3 adit lac 15 triệu urang, meblah jaik 10% dom urang njom Covid-19 dalam jaik 1 thun mateh tapa. Di Đông Nam Á, Thái Lan hu mboh mbang tamuh jit ka 3 pambuak tal dom quán alak, mbia di Bangkok; Lào hu pacang cakak ban ine Vientiane dalam 2 adit meng harei 21/4; di Campuchia, dom urang njom bahrau yaok harei jeng daok tagok...

Prang lac taneh ia akok meti di Liên minh châu Âu brei klauk iek jru vaccine Covid-19 di puac bialn ini ngan saong bruk brei ka bhap bini dalam khối nao mai tui hatai di drei di bilan hè thun ini. Tui Mentri Y tế Prang, ba tame pandar TousAntiCovid lac sa binah dalam danak duah urang taom gaok urang ruak Covid-19 di Prang, meng harei 29/4 hu paglong piah urang pandar tame duah thau ka bruk dut iek ruak saong bruk klauk jru vaccine caga ruak Covid-19.

Tổng thống Indonesi Joko Widodo hu panuac ieu pataom abih dom gah piah duah gilai njuk ia lahik, dalam bruk kham marat piah duah 53 urang peih gilai dalam tuk dưỡng khí di gilai tok ginup tal harei paguh (24/4). Dom bruk roh duah hu duah mboh labik sre manyek, meda lac meng gilai njauk khut atau lac tín hiệu di dom urang peih gilai payua tal dom kapul roh duah. Rilo negar daok daong Indonesia duah sruh gilai. Tui kuhria mintri Quốc phòng Mỹ harei ni hu mbang ginum biai haong gah Indonesia ka dom jalan bo Mỹ meda daong ka Indonesia./.

Urang lang: Thu Thảo – Ái Nghiêm – 23/04 10:25:32