Harei halei jeng yau harei nan, Làng Khắc Đạt, anek saih tal bac 5, Sang bac Tiểu học Hưng Phước, huyện Bù Đốp, tỉnh Bình Phước hu ong ba nao bac meng radaih juak klak. Angaok jalan nao tal sang bac akhar huroh, suh radaih nan, dom thun ini mai hu pajeng dom caong khin di adei jeng yau di ong muk, khin hu sa raidiuk siam mekre jang. Yau nan min, bruk bac da-a di Đạt jeng gaok oh takik kan kandah kayua sang kathaot, karang anak karang likuh. Meng tuk hu urang jakar, urang lin Bộ đội Biên Phòng Bình Phước daong tapa danak “ Pandon takai adei nao bac”, bruk bac da-a di adei hu hadah hadai jang. Làng Khắc Đạt khan lac:

“Anek biak anit ong muk, mboh ong muk umo taha ye, daok kuhria brei anke mabng bac saong anke baik thau dhar phol cei Bộ đội brei jien ka anek nao bac. Anek kham bac da-a naih joi piah pabak veik hatai caong di dom cei bộ đội saong ong, muk.”

Danak dak “ Pandon takai adei nao mai” hu Bộ đội Biên phòng Bình Phước peih ngak meng bilan 9 thun 2014. Mbiah tal harei ini, hu 61 anek saih hu Bộ đội Biên phòng Bình Phước taduan daong ngan saong yaom jien jaik 400 triệu đồng, dalam nan hu 1 anke saih Cam phuchia. Sa-ai Xây Niêng daok di xã Xã Srây Khơ Tum, huyện Keo Sima, tỉnh Mundunkiri, Negar Campuchia hu anek hu Bộ đội Biên Phòng Bình Phước taduan daong mbang bac, lac:

“ Sang dahlak baik kan kandah, hu Bộ đội biên phòng Việt Nam daong ka anek dahlak hu nao bac, dahlak biak uan tabuan, thau dhar phol bộ đội biên phòng Việt Nam biak ralo”

“Pandon takai adei nao bac” lac sa dalam rilo bruk ngak ndung bak hatai anit ranam di urang lin saong bhap bini bhum taphia negar. Oh lac ngak siam bruk khik caga bhum taphia negar, tui jalan “ gam mbang, gam daok, gam ngak bruk”, dom urang lin biên phòng Bình Phước daok lac labik pambak tame khang kajap di bhap bini bhum taphia negar. Dom mbang hajan ribuk nao tapa, jeng hu mboh ao hijao urang lin biên phòng mai daong bhap bini pasiam veik bruk pala drak; bilan pandiak tua riya ye mboh dom sa-ai mai daong pacang caga. Mikva kurang pandap pala drak, kurang sang daok piah pacang pandaik pacang hajan, ye dom sa-ai ak rik pataom piah ba tal tangin dom hagait mikva khin hu…Ong Điểu Đơ daok di palei Vườn Bưởi, xã Lộc Thiện, huyện Lộc Ninh, lac:

“ Hu bruk daong di Bộ đội Biên phòng tỉnh Bình Phước sang dahlak biak thau dhar phol, kham raong limo ka nyu limeh, khang kadang, oh ruak kik livang lavaih, piah hu rilo limo la-oi piah sang danaok patruh kan kathaot.”

Meng thun 2014 mbaih tal ini, Bộ đội Biên phòng Bình Phước ngak bruk labaih 3.500 harei daong ka bhap bini; pasaim veik saong padang ngak 249 baoh sang ngan saong yaom jien labaih 5 tỷ đồng; alin 36 drei limo ka baoh sang kan kathaot tui yaom jien jaik 750 triệu đồng.

Oh lac daong ka bhap bini drei, bộ đội biên phòng daok hu  caik hatai sangka daong ka bhap bini negar Campuchia bhum taphia negar…Meda lac, labik halei, kan kandah yau habar, urang lin bien phong jeng hu mbaok piah daong meng pandap pandar, tal daong prein ka bhap bini. Đại tá Nguyễn Văn Phương, Bí thư Đảng ủy, Chính ủy Bộ đội Biên phòng Bình Phước brei thau:

          “Urang jakar, urang lin Biên phòng tỉnh Bình Phước tuk halei jeng  kham merat yam tapa kan kandah, ngak siam bruk khik caga taneh ia, bhum taphia negar, tuk halei jeng pambuak siam talei rohim saong negar Campuchia, pambuak siam saong bol bhap urang bangsa takik piah ngak habar ka bhum taphia negar hu tani tanat saong bruk ngak mabng kinh tế di mikva hu khang kajap.”

          Yaok harei sron mbon salamat nao tapa, raidiuk di mikva dak hu siam jang, jalan nao tal sang bac di dom anek saih oh daok klaih klaoh…nan lac bruk bui sambai, lac prein khang pachreih ba dom urang lin quân hàm hijao dak khang kajap jang di bhum taphia negar./.