Urang lin công binh daok cakong mìn nao xử lý 

Yau dom tỉnh ban karei di bhum taneran krong CL, dalam dom thun mesruh metak, Tiền Giang njauk yaok rituh tấn bom, mìn, nan ye bom, mìn, pandap patuh dok kandaong veik lac bruk kan si plaih hu. Tong abih dom janih bom mìn, pandap patuh dok kandaong veik dalam haluk tuk halei jeng mbuan ba tal metai lahik ka rahra .

Muk Phạm Thị Vui daok di  xã Phước Lộc, huyện Tân Phước, tỉnh Tiền Giang khan lac, bilan dahlau, muk mboh sa  boh mbom dok kandong veik hadei di mesruh metak dok di tapen sang muk, muk biak duh hatai, mbang ndih oh bingi, tok hu sahanang hatai hadei di tuk  bom nan, hu gah công binh mai mek, ba nao. Mboh bruk kham merat di dom saai bộ đội, piah khik siam mekre selamat ka boh sang di drei, muk Phạm Thị Vui drut droi ndom lac. “Dom cei abih hatai lo. Trun ia  meng kak nyu hu, nyu dok ala ia, meyah dok angaok habar ngak hu.. njauk caluai trun ia, mboh anit lo. Caik di pak ni meyah nyu patuh ye nyu parah tame danieng sang drei ”.

Meng akaok thun 2019 tal ni, gah Công binh di  Bộ CHQS tỉnh Tiền Giang hu duah palai, pataom mek hu labaih 500 boh bom, mìn dom janih, jao ka dom gah chức năng di Quân khu 9 langyah, palai klaak. Trung tá Lê Văn Bình, Trưởng ban Công binh, Bộ CHQS tỉnh Tiền Giang brei thau, bruk siam mekre salamat ka bhap bini tuk halei jeng lac bruk dang akaok: “Tuk urang mboh bom, mìn njauk klaak sang tabiak nao, nan ye drei njauk ngak jip. Hu rilo mbang drei khan brei chỉ huy thau piah drei trun drei ngak bruk nan. Bloh drei khan hadei song langyah dom bruk patui di nan ”.

Labaih 40 thun tapa, dom urang lin Lữ đoàn Công binh 25, Quân khu 9 hu duah palai, pataom mek, langyah yaok rituh  tấn bommìn, pandap patuh di rilo labik dok kandong veik.

  Duah, talaih bom mìn biak kan kandah, min ngak ka nyu patuh lac dak kan kandah song nguy hiểm. Tong abih dom janih bom, mìn pandap patuh tuk pataom mek mai jeng craih abih, meda patuh dalam tuk halei oh thau. Kayua Yau nan ye dalam tuk ngak bruk, yaok urang lin công binh tuk halei jeng khang hatai, mong iek cambaih, biak caik hatai sangka. Khan ka bruk ngak ni, Trung úy Thạch Nhân, urang dalam kapul pataom mek langyah bom, mìn, pandap patuh, Lữ đoàn Công binh 25-Quân khu 9 brei thau: “Janih sui  bo lac sui  pakat 5, ka sa lac drei ngak yau habar piah pajeng ba, dak ka nyu hanjul tangin, patrun bruk gaok khang. Meyah ngak njauk bruk ye kuac lubang 4m dalam song gar labaih 5m, bloh drei mek hareik, atau hala kayau pacang tagok sa tal piah patrun bruk taparah nao atah ”.

Việt Nam lac sa dalam dom negar njauk nerak bom, mìn song kanyah jhak di bom, mìn dok kandong veik trak abih di dunya. Tui yaok pataom oh ka ginup abih, tui kuhira ,bom, mìn dok kandong veik hadei di mesruh metak di negar drei lac labaih  800 ribau tấn, abih tih mblang taneh nerak song medhi lac nerak labaih 6,1 triệu héc ta, meblah 18,71% abih tih taneh dalam negar. Taeng di Quân khu 9, dom tỉnh dok nerak rilo di abih lac: Cà Mau, Kiên Giang, Bạc Liêu, Sóc Trăng, Hậu Giang song Tiền Giang.

Labik ngak bruk di dom urang lin công binh Lữ đoàn Công binh 25 biak prong, nao tapa jaik abih dom tỉnh, ban bhum taneran krong Cửu Long. Meyah bom, sui mìn dok di labik taneh thu ye takik gleih glar. Meyah dok di ala ia, brei tram ia dalam rilo tuk piah duah cambaih labik, kuac duah oh lac mbuan si, oh caik hatai sangka meda ba tal metai menuac. Meng thau jum pataom gauk, kham merat glaong, dom bom, mìn pataom mek yaok thun rilo jang, tong abih jeng hu  dom urang lin công binh vô hiệu hóa. Kuhria meng thun 2010 tal ni, Lữ đoàn Công binh 25 hu pataom mek palai hu labaih 400 tấn bom mìn, pandap patuh  dom janih. Đại tá Đậu Đức Phượng, khan lac: “Tui khol hulin pasang iek  hu ye urak ni di tỉnh Tiền Giang dok biak rilo bom sui song di tỉnh Kiên Giang lac 2 tỉnh dok hu biak rilo bom sui… Anak tal daok pataom mek di 2 tỉnh nan piah khik siam mekre môi trường, jang yau patagok  kinh tế ka  xã hội”.

Yaom lac bruk mesruh song metai lahik  dok kandong veik hadei di mesruh metak oh ka thau tuk halei meng abih, min oh huac kan kandah glaih glar, dom urang lin công binh jeng dok khang hatai pataom mek, palahik abih bom sui. Bruk ngak nan hu rik dong patagok kinh tế - xã hội, pakajap  quốc phòng – an ninh dak harei dak khang kajap, njauk song bruk meng kan “Peih jalan jayah” bo Wa Hồ hu alin brei ka Bộ đội công binh Việt Nam Anh hùng./.

Urang lang: Hanipha - 21/12